కుమారుల వస్తారనే భయంతో,,,,భర్తకు ఇంట్లోనే అంత్యక్రియలు
Andhra Pradesh Telugu | Suryaa Desk | Published : Mon, May 29, 2023, 08:07 PM
ఇంట్లోనే భర్త శవానికి దహన సంస్కారాలు చేసింది ఓ భార్య. ఈ అమానవీయ ఘటన కర్నూలు జిల్లా పత్తికొండలో జరిగింది. తేరు బజార్‌లో హరి ప్రసాద్, లలిత అనే దంపతులు నివాసం ఉంటున్నారు. హరి ప్రసాద్‌కు 60 ఏళ్లు.. మెడికల్ షాప్ నిర్వహించేవాడు. పిల్లలిద్దరూ అమెరికాలో సెటిల్ అయ్యారు. అంతా సాఫీగా సాగిపోతున్న కుటుంబం.. ఏం జరిగిందో తెలీదు కానీ.. హరిప్రసాద్ శవం కాలుతూ కాలనీవాసుల కంట పడింది. భయాందోళనలతో వాళ్లు పోలీసులకు సమాచారం అందించారు.
ఇక హుటాహుటిన తేరు బజార్ చేరుకున్న పోలీసులు ఘటన జరిగిన తీరు చూసి విస్తుపోయారు. ఏం జరిగిందని భార్య లలితను ఆరా తీశారు. తన భర్త గుండెపోటుతో చనిపోయారని ఆమె సమాధానమిచ్చిందట. ఎవరూ అందుబాటులో లేకపోవడంతో.. ఇంటి ఆవరణలోనే దహన సంస్కారాలు చేయాలని నిర్ణయించుకున్నట్లు తెలిపిందట. ఇక ఆలస్యం చేయకుండా భర్త శవంపై పాత పుస్తకాలు, పాత చీరలు వేసి తానే దహనం చేసినట్లు చెబుతోందట. ఇదే విషయాన్ని అమెరికాలో ఉన్న తమ పిల్లలకు ఫోన్ చేసి చెప్పానని లలిత అంటోంది.
తమ కుమారులిద్దరూ సరిగా చూసుకోవడం లేదని.. ఆస్తి కోసమే తమ వద్దకు వస్తున్నారని ఆమె చెబుతున్నారు. తండ్రి చనిపోయిన విషయం తెలిస్తే కుమారులిద్దరూ వచ్చి ఆస్తి కోసం గొడవ చేస్తారని.. ఆ భయంతో తానే భర్తకు అట్టపెట్టెలతో దహన సంస్కారాలు పూర్తిచేసినట్లు కూడా చెబుతున్నారు. ఇంకాస్తా లోతుగా విచారణ చేసిన పోలీసులకు లలిత మానసిక స్థితి సరిగా లేదని అర్థమైంది. ఈ ఘటనపై కేసు నమోదు చేసుకుని దర్యాప్తు కొనసాగిస్తున్నారు.
|
|