తిరుమల ఘాట్ రోడ్డులో రెండు వేర్వేరు ప్రమాదాలు జరిగాయి

తిరుమల ఘాట్ రోడ్డులో ఇటీవల  ప్రమాదాల పరంపర కొనసాగుతోంది. వారం రోజులు కూడా గడవకముందే తిరుమల ఘాట్ రోడ్డులో మరోసారి ప్రమాదాలు జరిగాయి. . కొండ దిగుతున్న సమయంలో ఓ టెంపో దిగువఘాట్‌లోని ఆరో మలుపు వద్ద బోల్తాపడింది. ఈ ఘటనలో 13 మందికి గాయాలయ్యాయి. వీరందరినీ తిరుపతిలోని రుయా ఆస్పత్రికి తరలించారు.  కర్ణాటకకు చెందిన కొంతమంది శ్రీనివాసుడి దర్శనం కోసం తిరుమలకు వచ్చారు. బాలాజీ దర్శనం చేసుకుని కొండ దిగుతున్న సమయంలో ఆరో మలుపు వద్ద వారు ప్రయాణిస్తున్న టెంపో అదుపుతప్పి బోల్తాపడింది. డ్రైవర్ బ్యాలెన్స్ తప్పడంతోనే ప్రమాదం జరిగినట్లు టెంపోలోని ప్రయాణికులు చెబుతున్నారు. గాయపడిన వారందరినీ తిరుపతిలోని రుయా ఆస్పత్రికి తరలించారు. అయితే కేవలం 13 కిలోమీటర్ల దూరంలోని ఆస్పత్రికి తరలించేందుకు రెండుగంటల సమయం తీసుకున్నారని గాయపడినవారు ఆరోపిస్తున్నారు. ఆస్పత్రి సిబ్బంది కూడా వెంటనే ప్రథమ చికిత్స చేయకుండా... ఓపీ తీసుకోవాలని చెప్పారని విమర్శిస్తున్నారు.

మరోవైపు 12వ కిలో మీటర్ వద్ద జరిగిన మరో ప్రమాదంలో తెలంగాణకు చెందిన ఇద్దరు మహిళలకు గాయలయ్యాయి. ఓ కారు అదుపుతప్పి రోడ్డుపక్కనే ఉన్న ఆర్చ్‌ను ఢీ కొట్టింది. ఈ ఘటనలో ఇద్దరు మహిళలు గాయపడగా.. వీరిద్దరినీ స్విమ్స్ ఆస్పత్రికి తరలించారు. గతవారం కూడా ఎలక్ట్రిక్ బస్సు తిరుమల ఘాట్ రోడ్డులో బోల్తాపడింది. అయితే ఎవరికీ ఎలాంటి గాయాలు కాకపోవటంతో అందరూ ఊపిరిపీల్చుకున్నారు.

ఐదు రోజుల క్రితం కూడా తిరుమల మొదటి ఘాట్ రోడ్డులో మరో ప్రమాదం‌ జరిగింది. 28వ మలుపు దగ్గర ఎలక్ట్రిక్ బస్సు అదుపు తప్పి బోల్తా పడింది. బస్సులో 30 మంది ప్రయాణికులు ఉండగా.. ఇద్దరికి గాయాలయ్యాయి. వెంటనే వీరిని రుయా ఆసుపత్రికి తరలించారు. ఈ బస్సు తిరుమల నుంచి తిరుపతికి వస్తుండగా బోల్తా పడింది. ఆ సమయంలో బస్సులోనే ఉన్న ఓ కానిస్టేబుల్ కిటికీ అద్దాలు పగులగొట్టి ప్రయాణికుల్ని బయటకు తీసుకొచ్చారు. బ్రేక్ ఫెయిల్ అవ్వడంతో ప్రమాదం జరిగిందని డ్రైవర్ అంటున్నారు.. అతి వేగమే కారణమని చెబుతున్నారు. పోలీసులు ఘటనా స్థలానికి చేరుకొని ట్రాఫిక్‌ను నియంత్రించారు.