రోడ్డు ప్రమాదంలో విద్యార్థిని మృతి
Andhra Pradesh Telugu | Suryaa Desk | Published : Tue, May 30, 2023, 01:25 PM
గాజువాక నియోజక వర్గ పరిధిలోని ఆగనంపూడి ప్రధాన రహదారిపై సోమవారం జరిగిన రోడ్డు ప్రమాదంలో ఓ విద్యార్థిని మృతి చెందింది. దీనికి సంబంధించి దువ్వాడ పోలీసులు తెలిపిన వివరాలు ఇలా వున్నాయి. లేమర్తి ఫార్మాసిటీ కాలనీకి చెందిన కొల్లిమల్ల పెదనరసింగరావు తన కుమార్తె సాహితి(15), భార్య గోవిందమ్మతో కలిసి ద్విచక్ర వాహనంపై మల్కాపురం నుంచి తన ఇంటికి వెళుతున్నారు. ఈ క్రమంలో అగనంపూడి దరి శనివాడ వద్దకు వచ్చే సరికి వీరి వాహనాన్ని వెనుక నుంచి వస్తున్న లారీ బలంగా ఢీకొంది. దీంతో సాహితి రోడ్డుపై పడిపోయింది. దీంతో ఆ బాలిక తలకు బలమైన గాయాలు కావడంతో సంఘటన స్థలంలోనే మృతి చెందింది. ఆమె తల్లిదండ్రులు స్వల్ప గాయాలతో బయటపడ్డారు. సమాచారం అందుకున్న దువ్వాడ పోలీసులు సంఘటన స్థలానికి చేరుకుని వివరాలు సేకరించి మృతదేహాన్ని కేజీహెచ్‌కి తరలించారు. దువ్వాడ పోలీసులు కేసు నమోదు చేసి దర్యాప్తు చేస్తున్నారు. తమ కళ్ల ఎదుటే కుమార్తె మృతి చెందడంతో ఆ తల్లిదండ్రులు కన్నీరుమున్నీరయ్యారు. కాగా మృతురాలు సాహితి ఓ ప్రైవేట్‌ పాఠశాలలో పదో తరగతి చదువుతోంది.
|
|