ఆ అధికారికి జరిమానా... ఛత్తీస్‌గఢ్ ప్రభుత్వం తాజా నిర్ణయంం

ఇటీవల తన చర్యలతో వార్తల్లో నిలిచిన ఓ అధికారికి ఛత్తీస్‌గఢ్ ప్రభుత్వం గట్టి షాక్ ఇచ్చింది. సెల్ఫీ తీసుకుంటూ జలాశయంలో పడిపోయిన ఖరీదైన మొబైల్ ఫోన్ కోసం ఓ అధికారి అందులోని నీటిని మోటార్లతో బయటకు తోడించిన ఘటనపై ఛత్తీస్‌గఢ్ ప్రభుత్వం తీవ్రంగా స్పందించింది. ఇప్పటికే ఆ అధికారిని విధుల నుంచి తప్పించింది. జరిగిన నష్టాన్ని అతడి వేతనం నుంచి ఎందుకు వసూలు చేయకూడదని నీటిపారుదల శాఖ సూపరింటిండెంట్ ఇంజినీర్.. ఉన్నతాధికారికి లేఖ రాశారు. తాజాగా, జలాశయంలోని నీటిని తోడించాలని మౌఖిక ఆదేశాలిచ్చిన అధికారికి జరిమానా విధించారు. ఐదు అడుగుల మేర నీటిని బయటకు తోడేయడానికి అనుమతించిన సీనియర్ అధికారికి రూ.53 వేల జరిమానా చెల్లించాలని ఆదేశించింది.

కాంకేర్ జిల్లా కొయిల్‌బెడా బ్లాక్ ఫుడ్ ఆఫీసర్ రాజేశ్ విశ్వాస్.. మే 20న ఆదివారం నాడు తన మిత్రులతో కలిసి ఖేర్‌కట్టమ్ డామ్‌ పరిధిలోని పరల్‌కోట్‌ జలాశయ సందర్శనకు వెళ్లాడు. అక్కడ తన శాంసంగ్ ఎస్23 మొబైల్ ఫోన్‌తో సెల్ఫీలు తీసుకుంటుండగా అది కాస్తా జారిపడి నీళ్లలో పడిపోయింది. ఖరీదైన ఫోన్‌ పడిపోవడంతో 15 అడుగుల లోతైన ఆ రిజర్వాయర్‌ నీటిలో గాలించడానికి తొలుత గజ ఈతగాళ్లను రప్పించారు. కానీ, నీటి కింద బురద, రాళ్లు చేరడంతో మొబైల్ ఫోన్‌ను వారు కనిపెట్టలేకపోయారు.

అయితే, నీటిని తోడితే మొబైల్ దొరకుతుందని స్థానికులు చెప్పారని, నీటి పారుదల శాఖలో తనకు తెలిసిన అధికారులను సంప్రదించాడు. ఆయన ఐదు అడుగల మేర నీటిని బయటకు పంపడానికి మౌఖికంగా ఆదేశించారు. అనంతరం రెండు 30 హెచ్‌పీ భారీ మోటార్లతో హుటాహుటిన అక్కడికి చేరుకున్న సిబ్బంది వాటి సాయంతో నీటిని బయటకు తోడటం ప్రారంభించారు. ఇలా మూడు రోజుల పాటు 21 లక్షల లీటర్ల నీటిని బయటకు తోడిన తర్వాత మొబైల్ ఫోన్‌ ఆచూకీ లభ్యమయ్యింది.

అయితే, అధికారిక సమాచారం ఉండటం వల్లే మొబైల్ ఫోన్ కోసం తాను ప్రయత్నించానని రాజేశ్ విశ్వాస్ చెప్పడం గమనార్హం. ‘నీటికి బయటకు తోడేయడానికి సబ్-డివిజినల్ ఆఫీసర్ సాయం కోరితే.. ఆయన మౌఖికంగా ఆదేశాలిచ్చారు... సమీపంలోని కాల్వలోకి నీటిని పంపితే ఎటువంటి సమస్య ఉండదని చెప్పారు.. మూడు-నాలుగు అడుగుల లోతులో నీరు తోడితే సమస్య లేదని, ఎక్కువ నీరు వల్ల రైతులకు మేలు జరుగుతుందని అన్నారు.. అందుకే సుమారు మూడు అడుగుల నీరు తోడిపోయడానికి స్థానికుల సహాయం తీసుకుని.. ఫోన్‌ను తిరిగి పొందాను’ అని వివరించారు. ఇది కాస్తా బయటకు రావడంతో రాజకీయంగా తీవ్ర విమర్శలు వెల్లువెత్తాయి. దీంతో కాంగ్రెస్ ప్రభుత్వం చర్యలు చేపట్టింది.