రైలు ప్రమాదంలోని మృతి చెందిన 278 మందిలో 177 మృతదేహాల కుటుంభ సభ్యులకు అప్పగింత

ఒడిశా బాలాసోర్ వద్ద జరిగిన రైలు ప్రమాదంలో 278 మంది మృతిచెందగా.. మరో 1000 మందికిపైగా గాయపడిన విషయం తెలిసిందే. అయితే, ఇంకా 101 మృతదేహాలను గుర్తించాల్సి ఉందని అధికారులు తెలిపారు. తూర్పు మధ్య రైల్వే డివిజినల్ మేనేజర్ రింకేశ్ రాయ్ ఏఎన్ఐతో మాట్లాడుతూ.. ఒడిశాలోని ఆస్పత్రుల్లో దాదాపు 200 మంది క్షతగాత్రులు చికిత్స పొందుతున్నారని చెప్పారు. ‘ప్రమాదంలో 1,100 మంది గాయపడ్డారు.. చికిత్స అనంతరం వీరిలో 900 మంది ఆస్పత్రుల నుంచి డిశ్చార్జ్ అయ్యారు.. రాష్ట్రంలోని వివిధ ఆస్పత్రుల్లో 200 మంది వరకూ చికిత్స పొందుతున్నారు.. మృతిచెందిన 278లో ఇంకా 101 మందిని గుర్తించాల్సి ఉంది’ అని తెలిపారు.

మరోవైపు, భువనేశ్వర్ మున్సిపల్ కార్పొరేషన్ కమిషనర్ విజయ్ అమృత్ కులాంగే మాట్లాడుతూ.. ‘భువనేశ్వర్‌లో భద్రపరిచిన 193 మృతదేహాల్లో ఇప్పటి వరకూ 80 మృతదేహాలను గుర్తించాం.. 55 వారి బంధువులకు అప్పగించాం.. తమ హెల్ప్‌లైన్ నెంబరు 1929కు 200కుపైగా కాల్స్ వచ్చాయి.. మృతదేహాలను గుర్తించి బంధువులకు అప్పగిస్తున్నారు’ అని తెలిపారు.

ఇదిలావుంటే ఒడిశా శుక్రవారం రాత్రి రైలు ప్రమాదం చోటుచేసుకోగా.. శనివారం ఉదయమే ఘటనాస్థలానికి రైల్వే మంత్రి అశ్వినీ వైష్ణవ్‌ చేరుకున్నారు. రెండు రోజుల పాటు ఆయన అక్కడే తిష్టవేసి ఆదివారం రాత్రి రైళ్లు పునరుద్ధరించే వరకూ కదల్లేదు. ప్రమాదం తర్వాత ప్రతి పనినీ రైల్వే మంత్రి దగ్గరుండి పర్యవేక్షిస్తూ, అధికారులకు సూచనలు ఇస్తూనే ఉన్నారు. 51 గంటల్లో రైలు మళ్లీ పట్టాలపై పరుగులు తీసేవరకూ మంత్రి అక్కడే గడిపారు. దెబ్బతిన్న బోగీల తొలగింపు, ట్రాక్‌ల పునరుద్ధరణ, ఛిన్నాభిన్నమైన ఎలక్ట్రిక్‌ సిగ్నల్‌ వ్యవస్థకు మరమ్మతులన్నీ ఆయన దగ్గరుండి పర్యవేక్షించారు. రెండురోజుల పాటు నిద్రపోకుండా కేంద్ర మంత్రినన్న హోదా పక్కనపెట్టి కార్మికుల్లో ఒకరిలా కలసిపోయారు.