ప్రతిపక్షం చూస్తూ ఊరుకోదు,,,సిద్ధరామయ్య ప్రభుత్వంపై బొమ్మై విమర్శలు

త్వరలోనే రాష్ట్ర ప్రజలు ఎమర్జెన్సీ పరిస్థితులను ఎదుర్కొంటారని మాజీ ముఖ్యమంత్రి, బీజేపీ నేత బస్వరాజ్ బొమ్మై దాడి తీవ్రతరం చేశారు. అసెంబ్లీ ఎన్నికల్లో ఘోర పరాజయంపై జిల్లా స్థాయిలో బీజేపీ నాయకులు, ఎమ్మెల్యేలతో జరిగిన అంతర్మథన సమావేశం అనంతరం బొమ్మై మీడియాతో మాట్లాడుతూ ఈ వ్యాఖ్యలు చేశారు. ‘అధికారంలోకి వచ్చిన కొద్ది రోజుల్లోనే గోహత్య నిరోధక చట్టాన్ని ఉపసంహరించుకోవాలని, పాఠ్యపుస్తకాలను సవరించాలని, హిందూ కార్యకర్తలను జైలుకు పంపాలని వారు (కాంగ్రెస్ నేతలు) ఇప్పటికే మాట్లాడటం మొదలుపెట్టారు.. వారిని వ్యతిరేకించే ప్రతి గొంతును అణిచివేసేందుకు ప్రయత్నిస్తూ వాక్‌స్వేచ్ఛపై దాడి చేస్తున్నారు.. నేను చెబుతున్నాను.. ప్రజలు త్వరలో ఎమర్జెన్సీ వంటి పరిస్థితిని చూస్తారు’ అని బొమ్మై జోస్యం చెప్పారు. అంతేకాదు, కాంగ్రెస్ పార్టీ అధికార దుర్వినియోగానికి పాల్పడుతోందని ఆరోపించారు.

‘పేదలను ఆదుకునేందుకు, రాష్ట్రాన్ని అభివృద్ధిపథంలోకి తీసుకెళ్లేందుకు ప్రజలు కాంగ్రెస్‌ పార్టీని ఎన్నుకున్నారు.. అధికారాన్ని దుర్వినియోగం చేసేందుకు కాదు. మేము (బీజేపీ) బాధ్యతాయుతమైన ప్రతిపక్ష పార్టీగా మౌనంగా ఉండలేం’ అని స్పష్టం చేశారు. అసెంబ్లీ ఎన్నికల్లో బీజేపీ ఓటమి గురించి మీడియా ప్రశ్నించగా.. చాలా చోట్ల స్వల్ప ఓట్ల తేడాతోనే బీజేపీ అభ్యర్థులు ఓడిపోయారన్నారు.

‘ప్రజలతో టచ్‌లో ఉంటాం.. కొత్త ముఖాలకు అవకాశం ఇచ్చిన నియోజకవర్గాల్లో ఓట్లను ఏకీకృతం చేయడంలో వైఫల్యం చెందడంతో పాటు అసెంబ్లీ ఎన్నికల్లో అభ్యర్థులను ఆలస్యంగా ప్రకటించడం మూల్యం చెల్లించుకున్నాం.. బెలగావి జిల్లా విషయానికొస్తే సహకార రంగం పార్టీని నీడలా వెంటాడింది’ అని మాజీ ముఖ్యమంత్రి బొమ్మై అన్నారు.