వైసీపీతో తమకు ఎలాంటి సత్ సంబంధాలేవు: సోమువీర్రాజు

 వైసీపీ ప్రభుత్వ వైఫల్యాలను బీజేపీ మొదటి నుంచి ప్రశ్నిస్తుందని, ఏపీ ప్రభుత్వంతో తమ పార్టీకి ఎలాంటి సత్సంబంధాలు లేవని ఏపీ బీజేపీ చీఫ్ సోము వీర్రాజు తెలిపారు. నిన్న శ్రీకాళహస్తి సభలో కూడా నడ్డా అదే స్పష్టంగా చెప్పారని వ్యాఖ్యానించారు. అమిత్ షా సభలో పొత్తులపై ప్రకటన ఉండొచ్చు లేదా ఉండకపోవచ్చంటూ సోము వీర్రాజు ఆసక్తికర వ్యాఖ్యలు చేశారు. పొత్తులపై ఈ రోజు ప్రకటన ఉండకపోవచ్చని తాను అనుకుంటున్నట్లు సోము వీర్రాజు స్పష్టం చేశారు. రాష్ట్ర ప్రభుత్వ వైఫల్యాలను తాము ఎండగడుతూనే ఉంటామని, మోదీ 9 ఏళ్ల పాలనపై సభలో అమిత్ షా మాట్లాడతారని అన్నారు. కమ్యూనిస్టులు మోదీ పాలనను ఎందుకు విమర్శిస్తున్నారో తెలియదని, చైనా కళ్లజోళ్లుతో వాళ్లు చూస్తున్నారని విమర్శించారు. అటు పురంధేశ్వరి మాట్లాడుతూ.. జగన్ ప్రభుత్వ వైఫల్యాలను ఎండగడతామని తెలిపారు. అమిత్ షా బహిరంగ సభలో పొత్తులపై ఎలాంటి ప్రకటన ఉండదని స్పష్టం చేశారు. పార్టీ తనకు అవకాశం ఇస్తే విశాఖ నుంచే పోటీ చేస్తానని పురంధేశ్వరి పేర్కొన్నారు.

అటు నిన్న జగన్ సర్కార్‌పై జేపీ నడ్డా చేసిన వ్యాఖ్యలకు మాజీ మంత్రి పేర్ని నాని ఇవాళ కౌంటర్ ఇచ్చారు. ఏపీలో ల్యాండ్ స్కాం జరుగుతుందని నడ్డా చెప్పారని, విశాఖ ఉక్కు పీక కోసి దానిపై కన్నేయడం ల్యాండ్ స్కాం కాదా? అని విమర్శించారు. తమ ప్రభుత్వంలో ఇసుక దోపిడీ జరిగిందని నడ్డా ఆరోపించారని, ఇసుకపై వచ్చిన డబ్బులు ఎవరి జేబుల్లోకి వెళ్లాయో నడ్డానే చెప్పాలని డిమాండ్ చేశారు. లిక్కర్ స్కాం ఎవరో చెవిలో చెబితే నడ్డా మాట్లాడారని, లిక్కర్ సిండికేట్ నడిపింది మీరు కాదా? అని ప్రశ్నించారు.