నోట్ల కట్టలతో సెల్ఫీలు దిగిన ఎస్సై ఫ్యామిలీ,,,ఫోటోలను సోషల్ మీడియాలో పెట్టడంతో తీవ్ర దుమారం

ఈ రోజుల్లో ప్రతి ఒక్కరికి సెల్పీ పిచ్చిపట్టుకొంటోంది. ఇంటిలో నోట్ల కట్టలు చూసి పట్టరాని సంతోషానికి గురైన ఓ ఎస్సై ఫ్యామిలీ.. వాటితో సెల్ఫీలు దిగింది. దాదాపు 30 వరకూ రూ.500 నోట్ల కట్టలు వరుసగా పేర్చి.. చుట్టూ కూర్చుని సెల్ఫీలకు ఫోజులిచ్చారు. అంతటితో ఆగకుండా అత్యుత్సాహంతో వాటిని సోషల్ మీడియాలో షేర్ చేశారు. దీంతో ఇది కాస్తా సోషల్ మీడియాలో వైరల్‌గా మారడంతో సదరు ఎస్సై చిక్కుల్లో పడ్డారు. అతడ్ని తక్షణమే బదిలీ చేసిన ఉన్నతాధికారులు.. ఘటనపై దర్యాప్తు కూడా చేపట్టారు. ఉత్తర్ ప్రదేశ్‌లో జరిగిన ఈ ఘటనకు సంబంధించిన ఫోటోలు ప్రస్తుతం సోషల్ మీడియాను షేక్ చేస్తున్నాయి.

ఉత్తర్‌ ప్రదేశ్‌కు చెందిన రమేశ్ చంద్ర సహానీ.. ఉన్నావ్‌ జిల్లా బెహ్తా ముజవార్‌ పోలీసు స్టేషన్‌లో స్టేషన్‌ హౌస్‌ ఆఫీసర్‌ గా విధులు నిర్వర్తిస్తున్నారు. అయితే, ఇటీవల ఆయన కుటుంబసభ్యుల నోట్ల కట్టలతో తీసుకున్న ఫోటోలు సోషల్‌ మీడియాలో వైరల్‌ అయ్యాయి. ఆయన భార్య, ఇద్దరు పిల్లలు బెడ్‌పై కూర్చుని దాదాపు 30 వరకు రూ.500 నోట్ల కట్టలను పరిచి సెల్ఫీలు, ఫొటోలు తీసుకున్నారు. ఈ ఫొటోలను తమ సోషల్‌ మీడియా ఖాతాల్లో పోస్ట్‌ చేయడంతో వివాదాస్పదంగా మారింది.

దీనిని తీవ్రంగా పరిగణించిన పోలీసు ఉన్నత అధికారులు.. ఘటనపై విచారణకు ఆదేశించారు. మరోవైపు, ఆయనను తక్షణమే విధుల నుంచి రిలీవ్ చేసి, పోలీసు లైన్స్‌కు బదిలీ చేసినట్లు స్థానిక ఉన్నావ్ ఎస్పీ సిద్ధార్థ్ శంకర్ మీనా తెలిపారు. ‘స్టేషన్ హౌస్ ఆఫీసర్ ఫోటో ఒకటి సోషల్ మీడియాలో వైరల్ అయ్యింది.. అధికారి భార్య, అతడి పిల్లలు నోట్ల కట్టలు చుట్టూ కూర్చుని ఫోటోలు తీసుకున్నారు.. ఈ అంశాన్ని మేము తీవ్రంగా పరిగణించాం.. సదరు హౌస్ ఆఫీసర్‌ను పోలీస్ లైన్‌కు బదిలీ చేశాం.. దర్యాప్తు మొదలుపెట్టాం’ ఎస్పీ పేర్కొన్నారు.

సర్కిల్ ఆఫీసర్ పంకజ్ సింగ్ మాట్లాడుతూ.. సహానీ కుటుంబం రూ.500 నోట్ల కట్టలు చుట్టూ కూర్చుని ఫోటో షూట్ చేశారని అన్నారు. దీనిపై విచారణ చేపట్టామని తెలిపారు. కాగా, ఈ వివాదంపై స్పందించిన రమేశ్ చంద్ర సహానీ.. ఆ ఫొటోలు 2021 నవంబరు 14న తీసుకున్నవని తెలిపారు. తమ కుటుంబానికి చెందిన ఓ ఆస్తిని విక్రయించినప్పుడు ఆ సొమ్ము వచ్చినట్లు చెప్పారు. దీనిపై అధికారులు దర్యాప్తు చేపట్టారు. అయితే, ఆ నోట్ల కట్టల విలువ ఎంతో పోలీసులు వెల్లడించలేదు గానీ.. రూ.14లక్షల వరకు ఉండొచ్చని తెలుస్తోంది.