ఇక చైనా వెళ్లకుండానే కైలాస పర్వత సందర్శన,,,ఉత్తరాఖండ్‌లోని లిపులేఖ్ శిఖరం నుంచి వీక్షించే అవకాశం

కైలాస మానస సరోవరం యాత్ర ఎంతో విశిష్టమైంది. హిందువులు, బౌద్దులకు కైలాస పర్వతం పవిత్రమైన ప్రదేశం. ఈ పర్వతాన్ని సాక్షాత్తూ పరమశివుడి నివాస స్థలంగా హిందువులు భావిస్తారు. అందుకే జీవితంలో ఒక్కసారైనా కైలాస పర్వతాన్ని సందర్శించాలని భావిస్తారు. ఈ పర్వతం ఉన్న ప్రాంతం చైనా ఆధీనంలో ఉన్న టిబెట్ పరిధిలోకి వస్తుంది. గత నాలుగేళ్లుగా ఏదో ఒక కారణంతో కైలాస మానస సరోవర యాత్ర వాయిదా పడుతోంది. కోవిడ్, చైనాతో ఉద్రిక్తతలు.. ఇలా అనేక కారణాలతో భక్తులకు మాత్రం నిరాశే మిగులుతోంది.

ఇక మీదట చైనా వెళ్లకుండానే.. భారత్ నుంచే ఆ కైలాస పర్వతాన్ని దర్శించుకునే వెసులుబాటు లభించనుంది. ఉత్తరాఖండ్ నుంచి కైలాస పర్వతాన్ని వీక్షించే మార్గాన్ని ఉత్తరాఖండ్ పర్యాటక శాఖ గుర్తించింది. చైనా సరిహద్దులకు అత్యంత చేరువగా ఉండే.. పిత్రోగఢ్ జిల్లాలోని లిపులేఖ్ పర్వత శిఖరం మీది నుంచి చూస్తే.. కైలాస పర్వతం కనిపిస్తోంది. ఈ విషయం తెలుసుకున్న ఉత్తరాఖండ్ ప్రభుత్వం అక్కడికి అధికారుల బృందాన్ని పంపించింది. లిపులేఖ్ పర్వత శిఖరానికి చేరుకునే క్రమంలో ఎదురయ్యే ఇబ్బందులను అధికారులు స్వయంగా అధ్యయనం చేశారు. త్వరలోనే ఉత్తరాఖండ్ ప్రభుత్వానికి వారు నివేదికను సమర్పించనున్నారు.

చివరిసారిగా 2019లో కైలాస మానస సరోవరయాత్రను చేపట్టారు. ఈ ఏడాది యాత్ర రిజిస్ట్రేషన్ మే 1న ప్రారంభమైంది. కానీ చైనా ప్రభుత్వం వీసా నిబంధనలను కఠినతరం చేయడంతోపాటు.. యాత్ర ఖర్చును సైతం రూ.90 వేల నుంచి రూ.1.85 లక్షలకు పెంచింది. దీంతో యాత్రికులు ప్రత్యామ్నాయ మార్గాలను అన్వేషిస్తున్నారు.

పాత లిపులేఖ్ శిఖరం.. టిబెట్‌కు గేట్‌వేగా భావించే లిపులేఖ్ కనుమకు పశ్చిమ భాగంలో ఉంటుంది. ఇది సముద్ర మట్టానికి 17500 అడుగుల ఎత్తులో ఉంటుంది. లిపులేఖ్ పర్వత శిఖరం మీది నుంచి కైలాస పర్వతం స్పష్టంగా కనిపిస్తుండటంతో.. ఈ ప్రాంతాన్ని ఆధ్యాత్మిక పర్యాటక కేంద్రంగా అభివృద్ధి చేయాలని ఉత్తరాఖండ్ ప్రభుత్వం భావిస్తోంది. లిపులేఖ్ శిఖరం నుంచి 50 కి.మీ. (ఏరియల్ డిస్టెన్స్) దూరంలో ఉన్న కైలాస పర్వతం స్పష్టంగా కనిపిస్తోందని ఉత్తరాఖండ్ అధికారులు తెలిపారు.

‘లిపులేఖ్ పర్వత శిఖరం నుంచి కైలాస పర్వత శిఖరం అద్భుతంగా కనిపిస్తోంది. తీవ్రగాలులు వీస్తుండటం, శిఖరాన్ని చేరుకునే క్రమంలో కష్టమైన నాలుగు మలుపులను దాటడం మాత్రమే ఛాలెంజ్’ అని లిపులేఖ్ పర్వత శిఖరాన్ని అనేకసార్లు అధిరోహించడంతోపాటు అక్కడి నుంచి కైలాస పర్వతాన్ని వీడియో తీసిన భూపాల్ సింగ్ రోంకలి అనే వ్యక్తి తెలిపారు. కాగా భారత్ నుంచి కైలాస పర్వతానికి చేరుకోవడానికి ప్రస్తుతం మూడు మార్గాలున్నాయి. ఓం పర్వతానికి చేరువలోని లింపియధుర పర్వత శిఖరం మీది నుంచి కూడా కౌలాస పర్వతం కనిపిస్తుందని స్థానికులు చెబుతున్నారు.