రన్నింగ్ బస్సులో మంటలు,,,25 మంది అక్కడిక్కడే సజీవదహనం

మహారాష్ట్రలో రన్నింగ్ బస్సులో ఒక్కసారిగా మంటలు చెలరేగాయి. ఈ ప్రమాదంలో 25 మంది బస్సులోనే సజీవదహనమయ్యారు. ఈ ఘటనలో మరో 8 మందికి తీవ్ర గాయాలవ్వగా.. క్షతగాత్రులను హుటాహుటిన సమీపంలోని ఆస్పత్రికి తరలించారు. అగ్నిప్రమాదం సమయంలో బస్సులో 33 మంది ప్రయాణికులు ఉన్నట్లు అధికారులు చెబుతున్నారు. బస్సు మహారాష్ట్రలోని యావత్మాల్ నుంచి పుణె వెళ్తుండగా బుల్దానాలోని సమృద్ధి మహామార్గ్‌ ఎక్స్‌ప్రెస్‌వేపై ఈ ప్రమాదం జరిగినట్లు తెలుస్తోంది. మంటలకు బస్సు పూర్తిగా కాలి బూడిదైంది.

శుక్రవారం అర్థరాత్రి రెండు గంటల సమయంలో ఈ ప్రమాదం చోటుచేసుకున్నట్లు తెలుస్తోంది. హఠాత్తుగా టైర్ పేలడంతో బస్సు పల్టీ కొట్టిందని, ఈ సమయంలో బస్సులో మంటలు చెలరేగినట్లు సమాచారం. బస్సు డ్రైవర్ ప్రమాదం నుంచి బయటపడినట్లు తెలుస్తోంది. స్థానికుల నుంచి సమాచారం అందుకున్న పోలీసులు.. వెంటనే ఘటనా స్థలానికి చేరుకుని సహాయకచర్యలు చేపట్టారు. క్షతగాత్రులను అంబులెన్స్‌లలో వెంటనే బుల్ధానా సివిల్ హాస్పిటల్‌కు పోలీసులు తరలించారు. మరణించినవారి మృతదేహాలను కూడా పోస్టుమార్టం కోసం ఆస్పత్రికి తరలించారు. మృతులు, క్షతగాత్రుల వివరాలు గుర్తించి వారి కుటుంబసభ్యులకు సమాచారం అందించారు.

అగ్నిప్రమాదంతో బస్సు నుంచి మంటలు ఎగిసిపడ్డాయి. దీని నుంచి వచ్చిన దట్టమైన పొగలు చుట్టుపక్కల ప్రాంతాలకు వ్యాపించాయి. దీంతో స్థానికులు ఒక్కసారిగా భయభ్రాంతులకు గురయ్యారు. బుల్దానా పోలీస్ డిప్యూటీ ఎస్పీ బాబూరావు మహాముని ప్రమాద స్థలాన్ని పరిశీలించారు. ఈ ఘటనపై కేసు నమోదు చేసుకుని దర్యాప్తు చేపడతామని ఆయన తెలిపారు. ఈ ప్రమాదానికి సంబంధించి మరిన్ని వివరాలు తెలియాల్సి ఉంది.