పంట పొలంలోకి దూసుకొచ్చిన సింహం,,,మేత కోసం వచ్చిన ఆవుపై మెరుపు దాడి

మృగరాజు బారి నుంచి తన ఆవును కాపాడుకోడానికి ఓ రైతు క్రూర జంతువుతో పోరాటం చేశాడు. సింహం దాడి నుంచి తన పెంపుడు జంతువును రైతు కాపాడుకున్న ఆ వీడియో ప్రస్తుతం సామాజిక మాధ్యామాల్లో వైరల్ అవుతోంది. ఈ ఘటన గుజరాత్‌లోని గిర్‌ సోమ్‌నాథ్‌ జిల్లా అలీదార్‌ ప్రాంతంలో చోటుచేసుకోగా.. స్థానిక బీజేపీ నేత వివేక్‌ కొటాడియా ట్విటర్‌లో వీడియోను పోస్ట్‌ చేశారు. ఆ వీడియోలో ఆవుపై దాడి చేసిన సింహం.. దాని గొంతు పట్టుకుని ఉంది. ఆవును కిందపడేయడానికి ప్రయత్నిస్తుంటే.. ఆవు కూడా దానిని ప్రతిఘటించింది. సింహం నోటికి చిక్కి నొప్పితో విలవిల్లాడిపోయిన ఆవు పెద్దగా అరుస్తుండటం రైతు అక్కడకు పరుగెత్తుకొచ్చాడు.

సింహాన్ని చూసి భయపడని అతడు ఎలాగైనా ఆవును కాపాడుకోవాలని ధైర్యంగా ముందుకెళ్లాడు. చెయ్యెత్తి అరుస్తూ సింహాన్ని భయపెట్టే ప్రయత్నం చేశాడు. సింహం నుంచి తప్పించుకునే ప్రయత్నంలో రోడ్డు పక్కకు ఆవు జరిగింది. దీంతో రైతు అక్కడ ఉన్న ఓ రాయిని తీసుకుని సింహం వైపుగా రావడంతో అది భయపడి.. ఆవు గొంతు విడిచిపెట్టి అక్కణ్నుంచి వెళ్లిపోయింది. ఈ దృశ్యాలను అటుగా కారులో వెళ్తోన్న ఓ వ్యక్తి తన మొబైల్ ఫోన్‌లో వీడియో తీయగా.. జనాగఢ్‌లోకి కేషోడ్ కార్పొరేటర్ వివేక్ కొటాడియా ట్విట్టర్‌లో షేర్ చేశారు.

ఈ వీడియో చూసిన నెటిజన్లు ఆ రైతు తెగువను మెచ్చుకోకుండా ఉండలేకపోతున్నారు. ఆయన రియల్ హీరో అని, రైతుల శక్తి ఇలాగే ఉంటుందని కొనియడుతున్నారు. ఆవు కోసం తన ప్రాణాలను సైతం లెక్కచేయకుండా పోరాటం చేయడంపై ప్రశంసలు కురిపిస్తున్నారు. రైతు గుండె ధైర్యం అలా ఉంటుందని, ఎటువంటి కష్టాన్నైనా ఎదుర్కొగలరని కొందరు కామెంట్లు చేస్తున్నారు.