మహిళ లో దుస్తులు చోరీ చేసిన పొరుగింటి వ్యక్తి,,,దొంగను పట్టుకోవడంతో ఇరు వర్గాల మధ్య కొట్లాట

ఓ మహిళ లోదుస్తులు దొంగతనం కాస్తా.. ఒకే కులానికి చెందిన రెండు వర్గాల మధ్య కొట్లాటకు దారితీసింది. ఈ కొట్లాటలో పది మందికి గాయాలు కాగా.. 20 మందిని పోలీసులు అదుపులోకి తీసుకున్నారు. వినడానికి ఫన్నీగా ఉన్న ఈ సీరియస్ ఘటన గుజరాత్‌లోని అహ్మదాబాద్ తాలూకాలో ఉన్న ధంధుకా అనే గ్రామంలో చోటు చేసుకుంది. అసలు ఏమైందంటే..

పచ్చం అనే గ్రామానికి చెందిన 30 ఏళ్ల మహిళ లోదుస్తులు గత 8 నెలలుగా మాయం అవుతున్నాయి. ఉతికి తీగ మీద ఆరేసిన తర్వాత అవి కనిపించకుండా పోతున్నాయి. దీంతో దొంగ ఎవరో కనిపెట్టి, రెడ్ హ్యాండెడ్‌గా పట్టుకోవాలని ఆమె భావించింది. అందుకోసం పక్కా ప్లాన్ వేసింది. ఆ రోజు ఎప్పటిలాగే ఆరుబయట దండెం మీద దుస్తులు ఆరేసి వచ్చి.. సెల్‌ఫోన్ కెమెరాతో నిఘా పెట్టింది.

జూన్ 26వ తేదీన ఫోన్‌లో వీడియో రికార్డింగ్‌ను పరిశీలించగా.. పొరుగింట్లో ఉండే వ్యక్తే తన లోదుస్తులను దొంగిలిస్తున్నాడని తేలింది. మరుసటి రోజు అతడిని జాగ్రత్తగా కనిపెట్టుకుంటూ ఉన్న ఆమె.. తన లోదుస్తులు దొంగిలిస్తుండగా.. అతణ్ని అడ్డుకుంది. దీంతో వారిద్దరి మధ్య ఘర్షణ తలెత్తింది. ఆ పొరుగింటి వ్యక్తి కోపం పట్టలేక ఆమెపై దాడికి దిగాడు.

రక్షించండి అంటూ ఆమె కేకలు వేయడంతో.. కుటుంబ సభ్యులతో కర్రలతో రంగంలోకి దిగి అతణ్ని, అతడి సంబంధీకులను చితకబాదారు. దీంతో పగతో రగిలిపోయిన వారు.. ఆ తర్వాత మహిళ కుటుంబంపై ప్రతీకార దాడికి దిగారు. ఈ లోదుస్తుల కొట్లాట కాస్తా మరుసటి రోజు పోలీసు స్టేషన్‌కు చేరింది. దీంతో పోలీసులు 20 మందిని అదుపులోకి తీసుకున్నారు.

ఈ పరస్పర ఘర్షణల్లో పది మంది గాయపడ్డారని.. ఇరు వర్గాలకు చెందిన 20 మందిని అదుపులోకి తీసుకున్నామని ధంధుకా పోలీస్ ఇన్స్‌పెక్టర్ పీఎన్ జింజువాడియా తెలిపారు. వారంతా ఒకే సామాజిక వర్గానికి చెందిన వారని ఆయన చెప్పారు. ‘పొరుగింటి వ్యక్తి సంబంధీకులపై దాడికి దిగడంతో మహిళ బంధువులపై ఎఫ్ఐఆర్ నమోదు చేశాం.. వేధింపులు, దాడి, అల్లర్లకు సంబంధించి ఆ వ్యక్తి సంబంధీకులపై మరో ఎఫ్ఐఆర్ నమోదు చేశాం’ అని ఇన్‌స్పెక్టర్ తెలిపారు.