ఈ పార్లమెంట్ సమావేశాల్లో... యూనిఫామ్ సివిల్ కోడ్ బిల్లు పెట్టే యోచనలో బీజేపీ

పార్లమెంటు వర్షాకాల సమావేశాలకు సంబంధించి షెడ్యూల్ విడుదలయింది. వర్షాకాల సమావేశాలు జులై 20 న ప్రారంభమై.. ఆగస్టు 11 వరకూ సాగుతాయని పార్లమెంటరీ వ్యవహారాల శాఖ మంత్రి ప్రహ్లాద్ జోషి వెల్లడించారు. 23 రోజుల్లో 17 పనిదినాలు ఉంటాయి. ఈ నేపథ్యంలో సమావేశాలు సజావుగా సాగేందకు అన్ని పార్టీలు సహకరించాలని ఆయన ట్విట్టర్ వేదికగా విజ్ఞ‌ప్తి చేశారు. అన్ని అంశాలపై ఫలవంతమైన చర్చ జరిగేలా అందరూ వ్యవహరించాలని కేంద్ర మంత్రి కోరారు. కొత్త భవనం పనులు ఇంకా పూర్తికానందున పాత భవనంలోనే వర్షాకాల సమావేశాలు నిర్వహించే అవకాశం ఉంది. ముందుగా పాత భవనంలో ప్రారంభించాక.. పనులు పూర్తయితే మధ్యలో కొత్త భవనంలోకి మార్చనున్నారు.

ఈ సమావేశాల్లో ఉమ్మడి పౌరస్మృతి బిల్లును (యూసీసీ) కేంద్రం ప్రవేశపెట్టే యోచనలో ఉంది. దీనిపై ప్రధాని నరేంద్ర మోదీ ఇప్పటికే సంకేతాలు ఇచ్చారు. గత కొద్ది రోజులుగా ఆయన యూసీసీ గురించే ప్రధానంగా ప్రస్తావిస్తున్నారు. వచ్చే ఎన్నికల్లో బీజేపీని ఓడించే లక్ష్యంతో ప్రతిపక్షాలు ఏకమవుతున్నాయి. ఒకవేళ, ఈ తరుణంలో యూసీసీ బిల్లును కేంద్రం ప్రవేశపెడితే పార్లమెంటు అట్టుడికిపోవడం ఖాయం. ఇదే సమయంలో ఆప్ తీవ్రంగా వ్యతిరేకిస్తున్న ఢిల్లీ ఆర్డినెన్స్ (గవర్నమెంట్ ఆఫ్ నేషనల్ క్యాపిటల్ టెర్రిటరీ ఆఫ్ ఢిల్లీ ఆర్డినెన్స్) బిల్లును కూడా పార్లమెంట్‌ ముందు వచ్చే సూచనలు ఉన్నాయి. దీనిని అడ్డుకోవాలని బీజేపీయేతర పార్టీలను ఆప్ కోరుతోంది.

మణిపూర్ హింసపై ప్రధాని నరేంద్ర మోదీ మౌనంపై కూడా ప్రతిపక్షాలు నిలదీసే అవకాశాలు ఉన్నాయి. రెండు నెలలుగా ఈశాన్య రాష్ట్రంలో కొనసాగుతున్న అశాంతిపై ప్రధాని మాట్లాడాలని ప్రతిపక్షాలు డిమాండ్ చేస్తున్నాయి. ఈ నేపథ్యంలో పార్లమెంట్ వర్షకాల సమావేశాల్లో కేంద్రాన్ని ఇరుకుపెట్టే యోచనలో ప్రతిపక్షాలు ఉన్నాయి. నిత్యావసరాల ధరలు, నిరుద్యోగం పెరుగుదలపై నిలదీయాలని నిర్ణయించాయి.

‘ప్రజాస్వామ్యాన్ని పరిరక్షించడానికి, ఉద్యోగాల కల్పన కోసం పోరాడుతున్న పార్టీలు ఒకదానికొకటి ఫోటోలకే పరిమితం కాదు... పాట్నా సమావేశం తర్వాత రెండో భేటీ 100% ఒప్పందం ఉన్న సమస్యలను ఏకీకృతం చేస్తుంది.. కొన్ని విషయాల్లో అన్ని పార్టీల ఆలోచనలు, అభిప్రాయాలు మాటపై ఉండవనేది అవగాహన చేసుకోవచ్చు.. కానీ, స్థూలంగా స్పష్టత ఉంది’ టీఎంసీ ఎంపీ డెరిక్ ఒబ్రెయిన్ ట్విట్ చేశారు.