ఉద్యోగుల తప్పిదంతోనే ఒడిశా రైలు ప్రమాదం,,,బహిర్గతం కాని కమిషన్ నివేదిక

జూన్ 2 రాత్రి 7 గంటల సమయంలో ఒడిశాలోని బాలేశ్వర్ జిల్లా బహనాగా బజార్ రైల్వే స్టేషన్ సమీపంలో జరిగిన అత్యంత ఘోర రైలు ప్రమాదం.. యావత్ దేశాన్ని తీవ్రంగా కలిచి వేసింది. ఈ ఘటనపై దేశవ్యాప్తంగానే కాకుండా.. వివిధ దేశాల్లోని వారు కూడా తీవ్ర దిగ్భ్రాంతి వ్యక్తం చేశారు. ఈ ఘటనకు గల కారణాలను అన్వేషించేందుకు కేంద్ర దర్యాప్తు సంస్థ సీబీఐ రంగంలోకి దిగింది. అయితే ఈ క్రమంలో విచారణ జరుగుతుండగానే కమిషన్ ఆఫ్ రైల్వే సేఫ్టీ చేసిన అధ్యయనంలో సంచలన విషయాలు వెలుగులోకి వచ్చాయి. ఉద్యోగుల అజాగ్రత్త వల్లే 3 రైళ్లు ఢీకొని ఈ దుర్ఘటన చోటు చేసుకుందని పేర్కొంది.

రైల్వే శాఖ ఏర్పాటు చేసిన కమిషన్ ఆఫ్ రైల్వే సేఫ్టీ ఈ అధ్యయనం చేసింది. సిగ్నలింగ్‌, టెలి కమ్యూనికేషన్‌ విధుల్లో ఉన్న ఉద్యోగులు సరైన విధంగా స్పందించకపోవడం వల్లే ఒడిశాలోని బాలేశ్వర్‌ జిల్లా బహానగాలో అత్యంత ఘోరమైన రైలు ప్రమాదం జరిగినట్లు కమిషన్‌ ఆఫ్‌ రైల్వే సేఫ్టీ నివేదిక రూపొందించింది. దానికి సంబంధించి రైల్వే శాఖ ఉన్నతాధికారులకు నివేదికను కూడా అందజేసింది. సంబంధిత సిబ్బంది విధుల్లో నిర్లక్ష్యం వహించడంతోనే లూప్‌లైన్‌లో ఆగి ఉన్న గూడ్స్ రైలును కోరమాండల్ ఎక్స్‌ప్రెస్ ఢీకొట్టిందని తెలిపింది. ఆ తర్వాత దాని బోగీలు పక్క ట్రాక్‌పై పడగా.. అటుగా వస్తున్న మరో రైలు ఢీకొట్టి పట్టాలు తప్పినట్లు అందులో పేర్కొంది.

అయితే కమిషన్ ఆఫ్ రైల్వే సేఫ్టీ అధికారులు తయారు చేసిన నివేదిక మాత్రం రైల్వే శాఖ బయట పెట్టడం లేదు. అయితే ఈ ఘోర రైలు ప్రమాదంపై సీబీఐ అధికారుల బృందం దర్యాప్తు చేస్తున్న నేపథ్యంలోనే నివేదికను బహిర్గతం చేయడం లేదని తెలుస్తోంది. ఒడిశా రైలు ప్రమాదంలో ఏదైనా కుట్ర కోణం ఉందా అన్న కోణంలో సీబీఐ బృందం దర్యాప్తు చేస్తోంది. ఈ దర్యాప్తులో భాగంగా రైల్వే శాఖ ఉద్యోగులు, సిబ్బంది సహా పలువురిని ఇప్పటికే సీబీఐ అధికారులు విచారణ జరిపారు. మరోవైపు ఆగ్నేయ రైల్వేలో జనరల్‌ మేనేజర్‌గా ఉన్న అర్చన జోషిని ఉన్నతాధికారులు బదిలీ చేశారు. అర్చన జోషి స్థానంలో అనిల్‌కుమార్‌ మిశ్రను నియమించినట్లు రైల్వేశాఖ ప్రకటించింది.

ఈ ఘోర రైలు ప్రమాదంలో మృతి చెందిన మరో 13 మంది ప్రయాణికుల మృతదేహాలను అధికారులు శనివారం వారి కుటుంబాలకు అప్పగించారు. ఈ మృతదేహాలు అన్నింటిని భువనేశ్వర్‌ ఎయిమ్స్‌లో భద్రపరిచారు. ఇటీవల డీఎన్‌ఏ టెస్టుల ద్వారా గుర్తించిన 29 మృతదేహాలలో శుక్రవారం 6.. శనివారం 13 మృతదేహాలను వారి బంధువులకు అప్పగించినట్లు రైల్వే శాఖ అధికారి ఒకరు వెల్లడించారు. ఈ 13 మృతదేహాలలో 4 బిహార్‌ 8 పశ్చిమ బెంగాల్‌, ఒక మృతదేహం జార్ఖండ్‌కు చెందినవారిది అని తెలిపారు. మరోవైపు.. భువనేశ్వర్‌ ఎయిమ్స్‌లో ఇంకా గుర్తుపట్టని మృతదేహాలు 62 ఉన్నాయని అధికారులు వెల్లడించారు.