తాడిపత్రిలో హై టెన్షన్ వాతావరణం,,,జేసీ ప్రభాకర్ రెడ్డి హౌస్ అరెస్ట్

తాడిపత్రిలో మరోసారి పొలిటికల్ హీట్ పెరిగింది. ఎమ్మెల్యే కేతిరెడ్డి పెద్దారెడ్డి చీనీ తోటను పరిశీలించడానికి వెళ్తానంటూ జేసీ ప్రభాకర్ రెడ్డి సవాల్ చేయడంతో.. ఆయన నివాసం దగ్గర ఉద్రిక్త వాతావరణం నెలకొంది. ఎమ్మెల్యే కేతిరెడ్డి పెద్దారెడ్డి చీనీ మొక్కలు నాటిన ఏడాదికే రూ. 13.89 లక్షల పరిహారం అందిందని ప్రభాకర్ రెడ్డి ఆరోపించారు. పుట్లూరు మండలం కోమటికుంట్లలో ఉన్న ఎమ్మెల్యే చీనీ తోటను పరిశీలించడానికి వెళ్లాలని ప్రయత్నించారు. అందుకే ఎలాంటి అవాంఛనీయ సంఘటనలు జరగకుండా భారీగా పోలీసు బలగాలు మోహరించారు. జేసీ ప్రభాకర్ రెడ్డిని హౌస్ అరెస్ట్ చేశారు.

తాడిపత్రి ఎమ్మెల్యే కేతిరెడ్డి పెద్దారెడ్డిపై జేసీ ప్రభాకర్ రెడ్డి ఘాటు వ్యాఖ్యలు చేశారు. పంటల బీమాలో రైతులకు న్యాయం జరగలేదని.. వైఎస్సార్‌సీపీ నేతలకే న్యాయం జరిగిందన్నారు. క్రాప్ ఇన్సూరెన్స్ రూపంలో 13.89 లక్షల రూపాయలు ఎమ్మెల్యే పెద్దారెడ్డి కొట్టేశారని ఆరోపించారు. ఎమ్మెల్యే కేతిరెడ్డి పెద్దారెడ్డి చీనీ తోటకు వస్తానని.. దమ్ముంటే ఆపాలన్నారు. చీనీ తోటలో పంట లేకుండానే.. ఎమ్మెల్యే పెద్దారెడ్డి పంట బీమా సొమ్ము కొట్టేశారన్నారు. ఏడాది వయస్సున్న చీనీ చెట్లకు పంట నష్టం భీమా ఎలా వచ్చిందో అధికారులు చెప్పాలన్నారు. దీనిపై వచ్చే సోమవారం స్పందనలో ఫిర్యాదు చేస్తానన్నారు. 'ఎమ్మెల్యే పెద్దారెడ్డి పాడె ఎత్తే.. నేను పోతా.... థూ నీ బతుకు చెడ' అంటూ మండిపడ్డారు.

జేసీకి ఎమ్మెల్యే పెద్దారెడ్డి కూడా అదే రేంజ్‌లో కౌంటర్ ఇచ్చారు. క్రాప్ ఇన్స్యూరెన్స్‌ అందరి రైతులకు వచ్చినట్లే నాకూ పంట బీమా వచ్చిందన్నారు. ప్రభాకర్ రెడ్డికి వ్యవసాయం అంటే తెలియదు.. కాబట్టి ఇలా నోటికి వచ్చినట్లు మాట్లాడుతున్నారన్నారని ధ్వజమెత్తారు. జేసీ ప్రభాకర్ రెడ్డి అంత పనికిమాలిన వ్యక్తిని ఈ రాష్ట్రంలో ఎవరిని చూడలేదన్నారు. పుట్లూరు, ఎల్లనూరు మండలాలలో మగాడు అనే వాడు ఉంటే జేసీ ప్రభాకర్ రెడ్డితో పాటు తన తోటలో అడుగు పెట్టి చూడాలన్నారు.

తనకు ఎమ్మెల్యే పదవి జగన్మోహన్ రెడ్డి ఇచ్చిన భిక్ష అని.. ఈ పదవి లేకపోతే జేసీిని ఇంటిలో నుంచి లాక్కుని వచ్చి చెప్పు తీసుకొని కొట్టి తాడిపత్రి పట్టణమంతా ఊరేగించేవాడిని అన్నారు. తాను కొడితే సానుభూతి వస్తుందని ఆలోచిస్తున్నానని.. తాను కనుక ఎమ్మెల్యే కాకపోతే తాడిపత్రి వీధుల్లో పరిగెత్తించి కొడతాను అన్నారు. ఎమ్మెల్యేలకు పొలాలు ఉండకూడదా ఇన్స్యూరెన్స్‌లు రాకూడదా అని ప్రశ్నించారు. దొంగతనాలు చేసే కుటుంబం జేసీది.. తనది నీతి నిజాయితీ గల కుటుంబం అన్నారు. స్వర్గీయ రాజశేఖర్ రెడ్డి కుటుంబాన్ని తిట్టినప్పుడు.. జేసీపై ప్రజలు సోషల్ మీడియాలో ఏ విధంగా పోస్టులు పెట్టారో గుర్తు చేసుకోవాలన్నారు. జేసీ తాడిపత్రికి పట్టిన దరిద్రమన్నారు.