విశాఖపట్నంలో బయటపడ్డ మరో మోసం

విశాఖలో జిల్లాలో మరో మోసం బయటపడింది. వంట గ్యాస్‌ తనిఖీల పేరుతో కొంతమంది వ్యక్తులు అక్రమ వసూళ్లు చేస్తున్నారు. ఈ గ్యాంగ్‌ను కైలాసపట్నంలో స్థానికులు పట్టుకొని పోలీసులకు అప్పగించారు. గ్యాస్‌ వాడుతున్న లబ్ధిదారుల ఆధార్‌, ఫోన్‌ నంబర్లను ఆన్‌లైన్‌ చేయాలని చెప్పి కైలాసపట్నం వెళ్లారు.. అక్కడ స్థానికంగా దండోరా వేయించారు. ఈ గ్యాంగ్ తమ దగ్గరకు వచ్చిన ఒక్కొక్కరి దగ్గర నుంచి రూ. 150 చొప్పున డబ్బులు వసూలు చేశారు. రాజగోపాల ఇండియన్‌ గ్రామీణ విట్రాక్‌ పేరుతో కొందరు బిల్లు బుక్స్ ప్రింట్ చేశారు.

స్థానికులకు వీరిపై అనుమానం వచ్చింది.. ప్రభుత్వ చేసే కార్యక్రమం అయితే ఉచితంగా చేయాలి.. కానీ డబ్బులు వసూలు చేయడంపై అనుమానం వచ్చింది. ఈ డబ్బులు ఎందుకు తీసుకుంటున్నారో చెప్పాలని గ్రామ ఉప సర్పంచి, మరో రాజకీయ నేత స్థానికులతో కలిసి ప్రశ్నించారు. వారి నుంచి సరైన సమాధానం రాలేదు.. దీంతో వారికి అనుమానం వచ్చి పోలీసులకు సమాచారం ఇచ్చారు.. వీరిని అప్పగించారు.

పోలీసులు అనుమానంతో స్థానికంగా ఉన్న గ్యాస్ ఏజెన్సీ ప్రతినిధిని పిలిపించి ప్రశ్నించారు. ఆ తర్వాత గ్యాస్ కంపెనీ ప్రతినిధులతో ఫోన్‌లో సంప్రదించగా, తాము తనిఖీలకు ఎటువంటి అనుమతులు ఇవ్వలేదన్నారు. దీంతో డబ్బులు వసూలు చేసిన వ్యక్తులను పోలీసులు అదుపులోకి తీసుకున్నారు. ఎవరైనా ఇలా అధికారిక సమాచారం లేకుండా వచ్చి డబ్బులు వసూలు చేస్తే తమకు సమాచారం ఇవ్వాలంటున్నారు. ఆ ఇద్దరు వ్యక్తుల్ని పోలీసులు ప్రశ్నిస్తున్నారు.

మరోవైపు నక్కపల్లి ప్రాంతంలో నకిలీ నోట్లు కలకలంరేపాయి. స్థానిక పోలీస్‌ వెల్ఫేర్‌ పెట్రోల్ బంకులో పనిచేస్తున్న సిబ్బంది దగ్గర ఉన్న డబ్బుల్లో.. ఆరు రూ.500 నోట్లు నకిలీవని ఆలస్యంగా గుర్తించారు. ఈ ఫేక్ కరెన్సీని మిషన్‌లో పెడితే తప్ప మామూలుగా గుర్తించ లేకపోతున్నారట.. దీంతో వీటిని ఎలా గుర్తించాలో తెలియడం లేదంటున్నారు. ఇలా నకిలీ నోట్ల దెబ్బకు వ్యాపారులు కూడా భయపడుతున్నారు. ఈ నకిలీ నోట్లపై ఇంకా ఎలాంటి ఫిర్యాదులు రాలేదని పోలీసులు చెబుతున్నారు.