లండన్‌లో వెయిటర్‌గా పని చేసిన ఎమ్మెల్యే కేతిరెడ్డి

శ్రీసత్యసాయి జిల్లా ధర్మవరం వైఎస్సార్ కాంగ్రెస్ పార్టీ ఎమ్మెల్యే కేతిరెడ్డి వెంకట్రామిరెడ్డిపై తాడిపత్రి మున్సిపల్‌ ఛైర్మన్‌, మాజీ ఎమ్మెల్యే జేసీ ప్రభాకర్‌ రెడ్డి తీవ్ర విమర్శలు గుప్పించారు. కేతిరెడ్డి కుటుంబం ఎలా బతికిందో తాను చెబుతానని.. చెప్పుతో కొడుదువురా అంటూ ఎమ్మెల్యే కేతిరెడ్డికి సవాల్‌ విసిరారు. గత శనివారం ఎమ్మెల్యేలు కేతిరెడ్డి వెంకట్రామిరెడ్డి, పెద్దారెడ్డిలపై జేసీ ప్రభాకర్‌ రెడ్డి ఆరోపణలు చేసిన విషయం తెలిసిందే. దీంతో తమపై తప్పుడు ఆరోపణలు చేస్తే జేసీ ప్రభాకర్ రెడ్డిని చెప్పుతో కొడతామంటూ ఎమ్మెల్యే కేతిరెడ్డి వెంకట్రామిరెడ్డి తీవ్రంగా స్పందించారు.

ఈ నేపథ్యంలో సోమవారం జేసీ ప్రభాకర్‌ రెడ్డి మరోసారి మీడియా సమావేశం నిర్వహించారు. ఈ సందర్భంగా జేసీ ప్రభాకర్ రెడ్డి మాట్లాడుతూ.. కేతిరెడ్డి కుటుంబం ఎలా బతికిందో చెబుతానని.. వాళ్ల తాత చనిపోతే శవాన్ని తీసుకెళ్లే ధైర్యం కూడా వారికి లేదన్నారు. చల్లా సుబ్బరాయుడు సహాయం చేయకపోతే కేతిరెడ్డి వెంకట్రామిరెడ్డి తాత శవాన్ని కూడా తీసుకెళ్లలేని పరిస్థితిలో వారు ఉన్నారని చెప్పారు.

మీ చిన్నాన్న ఎమ్మెల్యే కేతిరెడ్డి పెద్దారెడ్డి పేదలకు దక్కాల్సిన పంటల బీమాను అక్రమంగా లక్షల రూపాయలు కొట్టేశారని.. ముందు ఆయనను చెప్పుతో కొట్టుపో అంటూ జేసీ ప్రభాకర్ రెడ్డి అన్నారు. లండన్‌ హోటల్‌లో వెయిటర్‌గా పని చేసిన కేతిరెడ్డి వెంకట్రామిరెడ్డి.. ఇక్కడికి వచ్చి గొప్పలు చెబుతున్నారని ఎద్దేవా చేశారు. ఇప్పటికే ధర్మవరం, పుట్టపర్తి నియోజకవర్గాల నుంచి ఎమ్మెల్యే కేతిరెడ్డి బాధితులు ఆధారాలు ఇస్తామంటూ ఫోన్లు చేస్తున్నారని జేసీ విమర్శలు గుప్పించారు.