గుంటూరు చోరీ కేసులో నిందితుడు అరెస్ట్,,,పాత నేరస్థుడిగా గుర్తించిన పోలీసులు

రోజూ టిప్‌టాప్‌గా రెడీ అవుతాడు.. డాక్టర్ అంటూ చుట్టుపక్కలవారిని నమ్మిస్తాడు. కారులో షికారు చేస్తూ చక్కగా పని ముగించుకుని వెళతాడు. ఇదంతా ఎవరి గురించి అనుకుంటున్నారా.. ఓ ఘరానా దొంగ గురించి. గుంటూరు కొత్తపేటలో జరిగిన చోరీ కేసులో అతడ్ని పోలీసులు అదుపులోకి తీసుకున్నారు. మనోడి గురించి ఆరా తీస్తే పాత కేసులు కూడా బయటకొచ్చినట్లు తెలుస్తోంది. గతవారం ఓ ఇంట్లో భారీ చోరీ జరిగింది. పోలీసులు స్పెషల్ టీమ్‌లను రంగంలోకి దించారు.

స్థానికుల ఇచ్చిన సమాచారంతో పాటుగా దొంగతనం జరిగిన ప్రాంతంలో సీసీ కెమెరాల ఫుటేజ్ పరిశీలించారు. ఈ కేసులో పాత నిందితుడిని నిందితుడిగా తేల్చారు. నిందితుడు రిచ్ లుక్‌తో కనిపిస్తూ డాక్టర్‌ అవతారంలో చోరీలు చేస్తున్నట్లు గుర్తించారు. అతడే కొత్తపేటలోని ఇంటిని టార్గెట్ చేసి తాళం పగలగొట్టి లోపలకు వెళ్లి బంగారం, వెండి ఆభరణాలు, నగదు తీసుకుని తన కారులో పారిపోయినట్లు గుర్తించారు. నిందితుడిని ప్రకాశం జిల్లా చీరాలకు చెందిన పాత నేరస్థుడిగా తేల్చారు.

అతడి గురించి ఆరా తీస్తే తెలుగు రాష్ట్రాలతో పాటుగా మహారాష్ట్ర, కర్ణాటక రాష్ట్రాల్లో కూడా దొంగతనాలు చేసినట్లు గుర్తించారు. అతడిపై చాలా కేసులు ఉన్నట్లు చెబుతున్నారు. హైదరాబాద్‌‌తో పాటుగా చుట్టుపక్కల రాష్ట్రాల్లో చోరీలు చేస్తున్నట్లు గుర్తించారు. నేరం చేసిన వెంటనే హైదరాబాద్‌ వెళ్లి అక్కడ వ్యాపారులకు బంగారం విక్రయించి వచ్చిన డబ్బులతో జల్సాలు చేస్తుంటాడని తెలుస్తోంది.

అతడు గతంలోను గుంటూరులో కొంతకాలం ఓ ఇంటిని అద్దెకు తీసుకొని వైద్యుడిగా నమ్మించి చోరీలు చేసినట్లు సమాచారం. హైదరాబాద్‌ నుంచి పోలీసుల వచ్చి అతడ్ని అరెస్టు చేసి తీసుకువెళ్లినట్లు తెలుస్తోంది. మళ్లీ ఇప్పుడు గుంటూరు వచ్చి చోరీకి పాల్పడినట్లు చెబుతున్నారు. హైదరాబాద్‌లో నిందితుడిని అదుపులోకి తీసుకొని గుంటూరు తీసుకువచ్చినట్లు సమాచారం. ఈ కేసుకు సంబంధించి పూర్తి వివరాలను పోలీసులు అధికారికంగా ప్రకటించాల్సి ఉంది. అతడి దగ్గర నుంచి పూర్తి సమాచారం సేకరించే పనిలో ఉన్నారు. ఒకటి, రెండు రోజుల్లో పోలీసులు వివరాలను వెల్లడించనున్నారు. ఖరీదైన డ్రెస్ వేసుకుని, డాక్టర్ అని నమ్మించి ఇళ్లను ఎంపిక చేసుకుంటాడు.. ఎవరూ లేని సమయంలో ఇంటి తాళాలు పగలగొట్టి లోపలకి చొరబడి చోరీ చేస్తాడు.

గతవారం కొత్తపేటలో నివాసం ఉంటున్న కుటుంబ వారి కుమారుడిని రైలు ఎక్కించేందుకు వెళ్లింది. తిరిగొచ్చి చూసే సరికి ఇంట్లో దొంగతనం జరిగింది.. యజమాని వెంటనే పోలీసులకు ఫిర్యాదు చేశారు. స్పెషల్ టీమ్‌లను రంగంలోకి దించి దర్యాప్తు వేగవంతం చేశారు.