ప్రపంచంలోనే అత్యంత ఖరీదైన కూరగాయలు.. కిలో లక్షల్లో

టమాట ధరలు కొండెక్కడంతో సామాన్యుడి నుంచి మెక్‌ డొనాల్డ్స్ లాంటి ప్రపంచ ప్రసిద్ధ సంస్థ వరకూ అందరూ బెంబేలెత్తిపోతున్నారు. దేశంలో కిలో టమాట రూ.250 వరకూ పలుకుతోంది. అయితే, ప్రపంచంలో అత్యంత ఖరీదైన కూరగాయ ఏంటో తెలుసా? కొన్ని కూరగాయలు కిలో ధర లక్షల్లో పలుకుతుందని తెలుసా? ఏంటా కూరగాయలు? ఏమిటీ అంత ప్రత్యేకత?

టమాటా ధరలు కొండెక్కాయి. కిలో రూ. 140 నుంచి రూ.180 వరకూ పలుకుతున్నాయి. తెలుగు రాష్ట్రాల్లోనే కాదు దేశవ్యాప్తంగా ఇదే పరిస్థితి ఉంది. కొన్ని చోట్ల కిలో టమాట రూ. 250కి అమ్ముతున్నారు. బర్గర్లు, పిజ్జాలకు పెట్టింది పేరైన ప్రముఖ కంపెనీ మెక్ డొనాల్డ్స్.. తమ మెనూ నుంచి టమాటాను తొలగిస్తున్నట్లు ప్రకటించింది. అంటే.. టమాట రేట్ల సెగ ఏ స్థాయిలో ఉందో అర్థం చేసుకోవచ్చు. టమాటాలను దొంగతనం చేస్తున్న నేపథ్యంలో.. ఉత్తర ప్రదేశ్‌లో ఓ టమాట వ్యాపారి రక్షణ కోసం బౌన్సర్లను ఏర్పాటు చేసుకున్న దృశ్యాలు వైరల్ అవుతున్నాయి. ఒక్క టమాటానే కాదు.. పశ్చిమిర్చి, బీరకాయ, బీన్స్, కాలీఫ్లవర్, ఆకుకూరల ధరలు కూడా సాధారణకం కంటే ఎక్కువగానే ఉన్నాయి. దీంతో సామాన్యులు, మధ్యతరగతి వారిపై మరింత భారం పడుతోంది. అయితే, కిలో లక్ష రూపాయల వరకూ పలికే కూరగాయలు (కూడా ఉన్నాయని మీకు తెలుసా..? ఆ ఆసక్తికర వివరాలు మీకోసం..

​తైవాన్ మష్‌రూమ్

తైవాన్‌లో మాత్రమే పండించే ఓ ప్రత్యేక పుట్టగొడుకు అంతర్జాతీయంగా భారీ డిమాండ్ ఉంది. తైవాన్ మార్కెట్ నుంచి భారత్‌కు దిగుమతయ్యే ఈ పుట్టగొడుగు ధర మన దేశంలో ఒక్క పీస్‌ (ముక్క)కు రూ. 80,000 పలుకుతుంది. అంటే, కిలో ధర ఎంత ఉంటుందో మీరే ఊహించుకోవచ్చు. అంతేకాదండోయ్.. ప్రధాని నరేంద్ర మోదీకి అత్యంత ఇష్టమైన వంటకాల్లో తైవాన్ మష్‌రూమ్ ఒకటి. వారంలో ఒక రోజు ఆయన ఇలాంటి పుట్టగొడుగు 5 ముక్కలను ఆహారంలో తీసుకుంటారట. అయితే, వీటికి అంత ధర ఎందుకు? అది కూడా తెలుసుకుందాం..

​యస్త్ర గుంబు లేదా హిమాలయన్ వయాగ్రా

యస్త్ర గుంబు అనేది హిమాలయాల్లో మాత్రమే దొరికే ఒక ప్రత్యేకమైన పుట్టగొడుగు. ప్రపంచంలోనే అత్యంత ఖరీదైన కూరగాయగా దీనికి పేరుంది. దీని ధర కిలోగ్రాముకు రూ. 56 లక్షల నుంచి రూ.60 లక్షల వరకూ పలుకుతుంది. ఇది క్యారెట్‌ మాదిరిగా పొడవుగు పెరుగుతుంది. రంగు మాత్రం బ్రౌన్ కలర్‌లో ఉంటుంది. వాస్తవానికి ఇది కూరగాయ కాదు. ఇదొక ఔషధ మూలిక. హిమాలయ పర్వత శ్రేణుల్లో 9000 నుంచి 16 వేల ఎత్తులో యస్త్ర గుంబు మష్‌రూమ్ దొరుకుతుంది. టిబెట్ ప్రాంతంలో ఇది ఎక్కువగా లభిస్తుంది. వీటిని సేకరించేందుకు వెళ్లే వాళ్లు తమ ప్రాణాలను సైతం ఫణంగా పెడతారు. ఇది శృంగారంలో పాల్గొనే శక్తి (లైంగిక శక్తి)ని పెంచుతుందని, సంతానోత్పత్తికి తోడ్పడుతుందని చెబుతారు. అందువల్ల దీన్ని ‘హిమాలయన్ వయాగ్రా’ (Himalayan Viagra) అని కూడా పిలుస్తారు.

​హాప్ షూట్స్ 

కిణ్వ ప్రక్రియ ద్వారా వీటిని పండిస్తారు. అందువల్ల ధర చాలా ఎక్కువ. కిలోగ్రాము హాప్ షూట్స్ ధర రూ. 70,000 నుంచి రూ. 80 వేల వరకు ఉంటుంది. వీటిని ప్రత్యేక పద్ధతుల్లో మొక్కల నుంచి వేరుచేసి తయారు చేయడమే అందుక్కారణం. ఎక్కువ శ్రమతో కూడుకున్న పని. రుచిలో కాస్త వగరుగా ఉంటాయి.

​లా బోన్నోట్ బంగాళాదుంపలు

పశ్చిమ ఫ్రాన్స్-నోయిర్‌మౌటియర్ తీరంలో ఒక ద్వీపంలో మాత్రమే ఈ లా బోనోట్ బంగాళాదుంపలు పండుతాయి. ఏటా 100 టన్నుల కంటే ఎక్కువ ఉత్పత్రి కావు. ప్రత్యేక పరిస్థితుల్లో పండించే వీటిని చేతులతోనే సేకరించి, వేరుచేయాల్సి ఉంటుంది. అందువల్ల కిలో రూ. 54,000 నుంచి రూ. 60 వేల వరకు ఉంటుంది.

​వాసాబి వేరు 

వాసాబిని జపనీస్ హార్స్‌‌ర్యాడిష్ అని కూడా అంటారు. వాసాబి వేరును ఉపయోగించి పచ్చడి మాదిరిగా చేసుకొని తింటారు. గ్లోబల్ మార్కెట్‌లో ఇది పౌండ్‌ (0.45 kg)కి సుమారు 73 డాలర్లు (ఇండియన్ కరెన్సీలో సుమారు రూ. 6 వేలు) పలుకుతుంది. ఒక్క వేరు నుంచి కిలోగ్రాము కంటే ఎక్కువ వాసాబిని తయారు చేయవచ్చు. యూరప్‌లోని ఒక ప్రత్యేకమైన ఫామ్‌లో ఈ వాసాబి వేర్లను పండిస్తారు.

​మాంగే టౌట్ బఠానీలు 

వెస్టర్న్ రెస్టారెంట్లలో ఈ బఠానీలకు మంచి డిమాండ్ ఉంది. ప్రత్యేక పరిస్థితుల్లో పండించే ఈ బఠానీలను తీసుకునేందుకు పాశ్చాత్యులు ఎక్కువగా ఆసక్తి కనబరుస్తారు. ఇండియన్ కరెన్సీలో ఈ బఠానీల ధర కిలో రూ. 2200 నుంచి రూ. 3,000 వరకూ పలుకుతుంది.

​యమషిత బచ్చలికూర 

ఈ ఆకుకూర ప్రధానంగా ఫ్రాన్స్‌లో పండుతుంది. వీటిని కిలోల లెక్కన అమ్మరు గానీ.. ధర అంచనా కోసం కిలోల లెక్కన చెబితే.. కిలో యమషిత బచ్చలికూర రూ. 2500 నుంచి రూ. 4000 వరకూ ఉంటుంది.

​పింక్ లెట్యూస్ 

దీన్ని పింక్ పాలకూర, ఇన్‌స్టాగ్రామ్ పాలకూర అని పిలుస్తారు. రుచిలో కొద్దిగా చేదుగా ఉంటుంది. సోషల్ మీడియాలో బాగా పాపులర్ అయ్యింది. ప్రస్తుతం దీన్ని ఎక్కువగా ప్లేటింగ్ కోసం వాడుతున్నారు. దీని ధర కిలోగ్రాముకు రూ. 1700 నుంచి రూ. 2 వేల వరకు పలుకుతుంది.

​ఈ కూరగాయలకు ఎందుకింత డిమాండ్

కూరగాయల్లో ప్రోటీన్లు, విటమిన్లు, ఇతర ముఖ్యమైన పోషకాలు ఉంటాయి. ఆరోగ్యం విషయంలో ప్రత్యేక శ్రద్ధ వహించేవారు పోషక విలువలతో కూడిన ఆహారంపై ఎంతైనా ఖర్చు చేసేందుకు సిద్ధంగా ఉంటారు. నివేదికల ప్రకారం.. సగటు అమెరికా పౌరుడు ప్రతి నెలా కూరగాయలపై రూ. 14 వేలు, కిరాణా సామగ్రిపై రూ. 28 వేలు ఖర్చు చేస్తారట. కొన్ని కూరగాయలు కొన్ని సీజన్లలో మాత్రమే దొరకుతాయి. అంతేకాదు, ప్రపంచంలో కొన్ని కూరగాయలు ప్రత్యేక ప్రాంతాల్లో మాత్రమే పండుతాయి. అంతేకాదు, వాటిని పండించడం ఎక్కువ శ్రమతో కూడుకున్న పని. ఈ కారణాల వల్ల పైన పేర్కొన్న కూరగాయల ధర వాటి డిమాండ్‌ను బట్టి అంత ఎక్కువగా ఉంది. కాలంతో పాటు వీటి ధర అంతకంతకూ పెరుగుతోందని నివేదికలు చెబుతున్నాయి.