లైంగిక నేరాల కేసులకు సంబంధించి మద్రాస్ హైకోర్టు కీలక వ్యాఖ్యలు

లైంగిక నేరాలకు సంబంధించిన కేసుల్లో లైంగిక పటుత్వ పరీక్ష (పొటెన్సీ టెస్ట్) కోసం ఇప్పుడు ఉన్న ప్రాసెస్‌ను మార్చాలని మద్రాస్ హైకోర్టు కీలక వ్యాఖ్యలు చేసింది. ప్రస్తుత ఆధునిక యుగంలో వైద్య రంగంలో ఎన్నో విప్లవాత్మక మార్పులు వచ్చాయని పేర్కొన్న ధర్మాసనం.. పురుషులకు వీర్య నమూనాల సేకరణ, ఆడవారికి రెండు వేళ్ల పరీక్ష ఇంకా అవసరం లేదని గుర్తు చేసింది. అవి కాకుండా మిగితా పద్దతుల్లో ఈ ప్రక్రియను నిర్వహించాలని తమిళనాడు పోలీసులకు సూచించింది. దీని కోసం వీర్య నమూనాలు అవసరం లేకుండా నిందితుడి రక్త నమూనాల ఆధారంగా లైంగిక పటుత్వ పరీక్ష చేసేందుకు విధానాన్ని రూపొందించాలని మద్రాస్ హైకోర్టు ఆదేశాలు జారీ చేసింది. ఈ సందర్భంగా ఇప్పటివరకు అనుసరిస్తున్న వీర్య నమూనాల సేకరణ, రెండు వేళ్ల పరీక్ష విధానాన్ని తప్పుపట్టింది.

బాలిక, బాలుడు దాఖలు చేసిన హెబియస్‌ కార్పస్‌ పిటిషన్‌పై మద్రాస్ హైకోర్టు విచారణ జరిపింది. ఈ సందర్భంగా జస్టిస్‌ ఎన్‌. ఆనంద్‌ వెంకటేష్‌, జస్టిస్‌ సుందర్‌ మోహన్‌లతో కూడిన ద్వి సభ్య ధర్మాసనం ఈ ఆదేశాలు జారీ చేసింది. వాటిని పరిశీలించిన తర్వాత తదుపరి ఉత్తర్వులు ఇస్తామని వెల్లడిస్తూ.. తదుపరి విచారణను ఆగస్టు 11 వ తేదీకి వాయిదా వేసింది. లైంగిక సామర్థ్య పరీక్షల్లో వీర్యం సేకరించడానికి బదులుగా రక్త నమూనాలను తీసుకోవచ్చని తెలిపింది. ప్రస్తుత కాలంలో ఇలాంటి పద్దతులు ప్రపంచంలోని చాలా దేశాలు పాటిస్తున్నాయని పేర్కొంది. ఈ సందర్భంగా రెండు వేళ్ల పరీక్షను తొలగించాల్సిన అవసరాన్ని కోర్టు నొక్కి చెప్పింది. లైంగిక నేరాల నుంచి బాలల రక్షణ చట్టం మరియు జువైనల్ జస్టిస్ (కేర్ అండ్ ప్రొటెక్షన్) చట్టాల అమలును పరిశీలించేందుకు ఈ ఇద్దరు జడ్జిలతో కూడిన డివిజన్ బెంచ్ జులై 7 న ఈ ఆదేశాలు జారీ చేసింది.

దీనికి సంబంధించి తమిళనాడు డీజీపీకి స్పష్టమైన ఆదేశాలు ఇచ్చింది. వివిధ జోన్లలో ఉన్న సమాచారాన్ని సేకరించాలని ఆయా జోన్ల ఇన్‌స్పెక్టర్ జనరల్ ఆఫ్ పోలీస్‌లకు సూచించాలని పేర్కొంది. 2023 జనవరి 1 నుంచి ఉన్న అన్ని లైంగిక కేసుల్లో మెడికల్ రిపోర్టులు తయారు చేసి అందులో రెండు వేళ్ల పరీక్ష నిర్వహించినట్లైతే అది కోర్టు దృష్టికి తీసుకురావాలని సూచించింది. అలాటి కేసులను విచారణకు తీసుకుని తదుపరి ఉత్తర్వులు ఇస్తామని కోర్టు వ్యాఖ్యానించింది. పురుషులకు కూడా వీర్య సేకరణ పద్దతి కాకుండా రక్త నమూనాలతోనే పరీక్ష నిర్వహించవచ్చని తెలిపింది.