జనసేన పార్టీ వెరైటీ ఎంట్రీ పాసులు,,,,రూపాయి నోటుపై జనసేన పార్టీ ముద్ర

జనసేన పార్టీ అధినేత పవన్ కళ్యాణ్ వారాహి విజయయాత్ర తణుకుకు చేరింది. జనసేనాని నియోజకవర్గానికి చెందిన నాయకులు, వీరమహిళలతో సమావేశం నిర్వహించారు. ఈ కార్యక్రమానికి హాజరయ్యే వారి కోసం వినూత్నమైన ఎంట్రీ పాసులు పంపిణీ చేశారు. రూపాయి నోట్లపై జనసేన పేరును ముద్రించారు.. దీంతో ఈ నోట్లు వైరల్ అయ్యాయి. జనసేన పార్టీ సమావేశాలకు సాధారణ పాసులు జారీ చేస్తే వాటిని అభిమానులు జిరాక్సు తీసుకుని.. అనుమతి లేకున్నా సభలకు వస్తున్నారట. దీంతో నకిలీ పాసులకు చెక్ పెట్టేందుకుఇలా వినూత్నంగా పాసులు జారీ చేశారట. ఇవి జనసేన కేంద్ర కార్యాలయం నుంచే పంపిస్తున్నట్లు చెబుతున్నారు.

పవన్ కళ్యాణ్ నిర్వహించే సమావేశాలకు భారీగా అభిమానులు తరలివస్తున్నారట.. అందుకే పాస్‌లు తప్పనిసరి చేసినట్లు చెబుతున్నారు. నియోజకవర్గాల్లో ఏర్పాటు చేసే సమావేశాలకు ఇలా ఎంట్రీ పాసులు జారీ చేస్తున్నారు. అంతేకాదు ఈ సమావేశాలు ఫంక్షన్ హాల్స్‌లో ఏర్పాటు చేస్తుండటంతో ఎక్కువమందికి పాల్గొనే అవకాశం దక్కడం లేదు. అందుకే ఇలా పాసులు ఇస్తున్నారు.

వాలంటీర్ల వ్యవస్థపై తాడేపల్లి గూడెంలో జరిగిన సమావేశంలో పవన్ కళ్యాన్ మరోసారి వ్యాఖ్యలు చేశారు. పంచాయతీ వ్యవస్థ బలంగా ఉంటే.. ఈ సచివాలయ వ్యవస్థ ఎందుకని ప్రశ్నించారు. వైఎస్సార్‌సీపీకి వాలంటీర్లు ప్రైవేట్ సైన్యంలా పనిచేస్తున్నారని.. వారు సేకరిస్తున్న డేటా అంతా ఎక్కడికి వెళ్తోందని ప్రశ్నించారు. డేటా ఇవ్వకపోతే, ఓటు వేయకపోతే పథకాలు రద్దుచేస్తామని బెదిరిస్తే.. పింఛను తీయడానికి నువ్వెవడివని ప్రశ్నించాలన్నారు. కొంతమంది తప్పు చేసినవారిని అంటే అందరూ భుజాలు తడుముకోనక్కర్లేదు.. రాష్ట్ర శ్రేయస్సు కోసమే తన పోరాటమన్నారు. పార్టీలను నడపాలంటే వేలకోట్లు ఉంటే సరిపోదు.. సైద్ధాంతిక బలం, పట్టుదల ఉండాలన్నారు.

శ్రీకాళహస్తిలో జనసైనికుడిపై సీఐ దాడి చేసిన ఘటనపై పవన్ స్పందించారు. శాంతియుతంగా నిరసన వ్యక్తం చేస్తున్న సాయి అనే జనసైనికుడిని పోలీసు అధికారిణి రెండు చెంపలపై కొట్టడం దారుణమన్నారు. జనసైనికుడు మాత్రం సంయమనం కోల్పోకుండా ఉన్నారంటే అదే జనసేన సిద్ధాంత బలం అన్నారు. శాంతియుతంగా నిరసన వ్యక్తం చేస్తున్న వ్యక్తిని కొట్టే హక్కు పోలీసులకు ఎక్కడిది అని ప్రశ్నించారు. విశాఖలో ఓ మహిళ జనసేన పార్టీలో చేరి మూడో రోజే ఫ్లెక్సీ కట్టిన పాపానికి ఆమెపై హత్యాయత్నం కేసు నమోదు చేశారన్నారు. తెలుగువారిలో ఉదాసీనత పెరిగిపోయిందని.. ప్రశ్నించటం మర్చిపోయారన్నారు. జగ్గుభాయ్ అంటే భయం వదిలేయాలని.. వ్యవస్థల్లో తప్పు జరిగితే కచ్చితంగా అడగాల్సిందే.. తప్పు చేస్తే తనను కూడా ప్రశ్నించాలన్నారు. జగన్ యువశక్తిని నిర్వీర్యం చేస్తున్నారని.. జనసేన ప్రభుత్వంలో యువతను స్వయంశక్తి సాధకులుగా తయారుచేస్తామన్నారు. అవినీతి జలగల మీదనే పోరాటం అన్నారు పవన్.