రెండో భర్తకు సంతానం కోసం కూతుళ్లు బలి,,,మేనమామ సాయంతో పోలీసులకు ఫిర్యాదు

ఓ మహిళ మాతృత్వానికి మచ్చతెచ్చేలా నీచంగా ప్రవర్తించింది. రెండో భర్తకు సంతానం కోసం కన్న కూతుళ్లనే అతడి వద్దకు బలవంతంగా పంపి పిల్లలు పుట్టేలా చేసింది. ఏలూరులో జరిగిన ఈ ఘటన కలకలంరేపింది. ఏలూరు సమీపంలోని ఓ గ్రామానికి చెందిన మహిళకు ఇద్దరు కుమార్తెలు.. ఆమె కుటుంబ నియంత్రణ ఆపరేషన్‌ చేయించుకుంది. 2007లో భర్త అనారోగ్యంతో మరణించాడు. దీంతో ఆమె మేనత్త కుమారుడ్ని వివాహం చేసుకుంది. తన ఇద్దరు కూతుళ్లను విశాఖలోని తన పుట్టింటికి పంపించేసింది.

భర్త ఆమెను వేధించడం మొదలు పెట్టాడు.. తనకు పిల్లలు కావాలని, లేదంటే మరో పెళ్లి చేసుకుంటానని చెదిరించాడు. ఇంతలో తన కూతుళ్లు ఇద్దరు యుక్త వయసుకు వచ్చారు. అప్పుడు ఆమెకు నీచమైన ఆలోచన వచ్చింది.. వేరే పెళ్లి వద్దని, తన కుమార్తెల ద్వారా సంతానం పొందాలని తన రెండో భర్తను ఆమె ఒప్పించింది. పుట్టింటి దగ్గర ఉన్న ఇద్దరు కుమార్తెలను తీసుకొచ్చింది. పెద్ద కుమార్తె 8వ తరగతి చదువుతున్న సమయంలో కన్న తల్లి ఆమెను భర్త దగ్గరకు పంపించింది.. ఓసారి గర్భవతి కాగా.. చదువుకు ఇబ్బంది అవుతుందని అబార్షన్ చేయించింది. ఆమె 2021లో ఆడపిల్లకు జన్మనిచ్చింది.

భర్త మళ్లీ తనకు మగ పిల్లవాడు కావాలని వేధిస్తుండటంతో.. తన రెండో కుమార్తెనూ భర్తకు అప్పగించింది. ఆమెకు ఏడాది క్రితం మగశిశువు పుట్టి చనిపోయాడు.. అయితే ఇంట్లోనే పురుడు పోసే ప్రయత్నంలో శిశువు చనిపోయినట్లు తెలుస్తోంది. ఆ తర్వాత ఆ మృతదేహాన్ని తీసుకెళ్లి కాలువలో పడేశారు. కొద్ది రోజుల క్రితం భర్తతో భార్యకు విభేదాలు వచ్చాయ.. దీంతో ఇద్దరు కుమార్తెలను గ్రామంలోనే వదిలేసి.. ఆమె విశాఖలోని పుట్టింటికి వెళ్లిపోయింది. ఆ తర్వాత కూడా అతడు ఇద్దరు కూతుళ్లను అతడు హింసించడం మొదలు పెట్టాడు.

ఈ క్రమంలో చిన్న కుమార్తె ఈ విషయాన్ని తనకు తెలిసినవాళ్ల ద్వారా మేనమామకు చేరవేసింది. ఆ వెంటనే మేనమామ బంధువులను తీసుకెళ్లి.. ఏలూరులో బాధితులతో దిశ పోలీసుస్టేషన్‌లో ఫిర్యాదు చేయించగా.. నిందితులపై పోక్సో కేసు నమోదు చేశారు. ఇద్దరినీ అదుపులోకి తీసుకుని విచారణ చేస్తున్నారు. ప్రస్తుతం పెద్ద కుమార్తె మూడో నెల గర్భిణి అని పోలీసులు గుర్తించారు. కన్న తల్లిని అనే సంగతి మర్చిపోయి.. ఇద్దరు కూతుళ్లను దారుణంగా భర్త దగ్గరకే పంపించింది. ఈ ఘటన ఏపీలో సంచలనంగా మారింది. ఈ కేసుకు సంబంధించిన పూర్తి వివరాలు తెలియాల్సి ఉంది.