అమ్మ కోసం విదేశంలో మంచి ఉద్యోగాన్ని వదిలేశాడు,,,ఊరికొచ్చి పానీపూరీ బండి పెట్టాడు

దుబాయ్‌లో చక్కటి ఉద్యోగం.. మంచి జీతం.. ప్రేమించి పెళ్లి చేసుకున్న భార్య. జీవితం సాఫీగా సాగిపోతోంది.. కానీ ఇంతలో ఓ వార్త అలజడి రేపింది. కని పెంచిన అమ్మ రుణం తీర్చుకోవడానికి ఉద్యోగం వదిలేసి సొంత ఊరికి రావాల్సి వచ్చింది. ఇప్పుడు పానీపూరీ బండితో జీవితాన్ని లాగుతున్నాడు. తన తల్లి ముందు ఉద్యోగం, విలాసవంతమైన జీవితం పెద్ద విషయమేమీ కాదనుకున్నాడు.. కష్టాల్లో ఉన్న తల్లి బాగోగుల్ని పక్కనే ఉండి చూసుకోవడం ఎంతో ఆనందంగా ఉందంటున్నాడు విజయనగరం జిల్లా గంట్యాడ మండలంలోని గింజేరుకు చెందిన దాసరి వేణు.

వేణు తండ్రి వెంకటరావు తాపీ మేస్త్రి కాగా..తమ్ముడు చంద్రశేఖర్‌ టూరిస్టు గైడ్‌. వేణుకు దుబాయ్‌లో మెరైన్‌ ఇంజినీర్‌గా ఉద్యోగం వచ్చింది.. నెలకు రూ.80వేలు జీతం. ప్రేమించిన యువతినే పెళ్లి చేసుకున్నారు.. దుబాయ్‌లోని ఎన్‌ఎస్‌ఎల్‌ కంపెనీలో రెండేళ్లపాటు మెరైన్‌ ఇంజినీర్‌గా పనిచేసి.. సెలవులు తీసుకుని సొంత ఊరికి వచ్చి.. మళ్లీ ఏప్రిల్‌లో వెళ్లారు. దుబాయ్ వెళ్లిన 15 రోజులకే అమ్మ రాజేశ్వరికి క్యాన్సర్ బారినపడ్డారని తెలిసింది. కుమారుడికి ఫోన్ చేసిన తల్లి బాధపడింది.. 'నువ్వు అక్కడుంటే నా చివరి చూపు కూడా దక్కదేమో’అంటూ ఆవేదన వ్యక్తం చేసింది.

అమ్మ అన్న మాటలకు అతడు దుబాయ్‌లో ఉండలేకపోయాడు. ఉద్యోగాన్ని వదిలేసి భార్య పావనితో కలిసి సొంత ఊరికి తిరిగి వచ్చేశారు. స్థానికంగా మెరైన్‌ ఇంజినీరింగ్ ఉద్యోగాలు లేకపోవడంతో.. ఉపాధి కోసం కొటారుబిల్లి సెంటర్‌లో పానీపూరీ బండి ప్రారంభించారు. అలా ఉపాధి పొందుతూ కుటుంబాన్ని పోషిస్తూ.. అమ్మకు తోడుగా ఉన్నాడు. తన తల్లి ఉన్నంతకాలం జాగ్రత్తగా చూసుకుంటానని చెబుతున్నారు వేణు. తాను ఉద్యోగం వదిలేశాననే బాధ లేదని.. అమ్మను చూసుకునే అదృష్టం తనకు దక్కిందన్నారు.

తనకు పానీపూరి వ్యాపారంలో ఖర్చులు పోనూ నెలకు బాగానే ఆదాయం వస్తోందని వేణు చెబుతున్నారు. ప్రతిరోజూ సాయంత్రం భార్యాభర్తలిద్దరం కష్టపడి వ్యాపారం చేస్తున్నామని.. ఉదయం అమ్మకు సేవ చేస్తున్నామని ఆనందంతో చెబుతున్నారు వేణు. అయితే తాను పనిచేసిన దుబాయ్ కంపెనీలో అమ్మ ఆరోగ్య పరిస్థితి గురించి చెప్పానని.. ఒకవేళ మళ్లీ వెళ్తే ఉద్యోగంలో చేర్చుకుంటారని చెప్పుకొచ్చారు. అమ్మ కోసం ఓ విధంగా తన జీవితాన్ని త్యాగం చేశారు వేణు.. వృద్ధాప్యంలో తల్లిదండ్రుల్ని పట్టించుకోకుండా.. వారిని ఇంటి నుంచి గెంటేస్తున్న ఈ రోజుల్లో వేణు వంటి వాళ్లు చాలా అరుదుగా ఉంటారనే చెప్పాలి. వేణును కూడా స్థానికులు కూడా అభినందిస్తున్నారు.. అమ్మ కొడుకు అంటూ పొగడ్తలు కురిపిస్తున్నారు.