తిరుమలలో మరోసారి ఆలయం మీదుగా విమానం చక్కర్లు
Andhra Pradesh Telugu | Suryaa Desk | Published : Tue, Jul 18, 2023, 07:28 PM
తిరుమలలో మరోసారి తప్పు జరిగింది. శ్రీవారి ఆలయంపై నుంచి మళ్లీ విమానం వెళ్లింది.. కొందరు భక్తులు వీడియోను తీశారు. ఈ విమానం రేణిగుంట విమానాశ్రయం నుంచి వచ్చిందా.. లేక ఇతర ప్రాంతాల నుంచి వచ్చిందా అనేది క్లారిటీ లేదు. ఇటీవల కాలంలో తరచూ ఇలాంటి ఘటనలు జరుగుతున్నాయి. గత నెలలో కూడా ఇలాగే విమానాలు శ్రీవారి ఆలయం మీదుగా చక్కర్లు కొట్టాయి.. గతంలో ఒక రోజు ఏకంగా 6 విమానాలు ఆలయం మీదుగా వెళ్లాయి. తిరుమల ఆలయం మీదుగా తరచూ విమానాలు వెళ్తుండటంపై శ్రీవారి భక్తులు ఆందోళన వ్యక్తం చేస్తున్నారు.
అసలు ఈ విమానాలు ఎక్కడి నుంచి ఎక్కడికి వెళుతున్నాయో అన్నది క్లారిటీ ఉండటం లేదు. అంతేకాదు ఆగమ శాస్త్రం శ్రీవారి ప్రకారం ఆలయంపై నుంచి విమానాలు, హెలికాప్టర్లు వంటివి ఎగరకూడదు అంటున్నారు. టీటీడీ గతంలోనే పలుసార్లు పౌర విమానయాన శాఖ అధికారులతో సంప్రదింపులు జరిపింది. ఇది భక్తుల మనోభావాలకు సంబంధించిన అంశం కావటంతో ఎన్నో సందర్భాల్లో ఈ విషయాన్ని వివరించింది.. కానీ ఎలాంటి స్పందన మాత్రం రాలేదు.
తిరుమల శ్రీవారి ఆలయానికి ఉన్న ప్రత్యేకత, విశిష్ఠత కారణంగా నో ఫ్లయింగ్‌ జోన్‌‌గా ప్రకటించాలని టీటీడీ కోరుతోంది. గతంలోనే ఈ విషయాన్ని కేంద్రం దగ్గర ప్రస్తావించారు. కేంద్రం నుంచి సానుకూల స్పందన రావడం లేదు. ఇలా తరుచూ తిరుమల మీదుగా విమానాలు, హెలికాప్టర్లు వెళ్లిన సమయంలో టీటీడీ అధికారులు విమానయాన శాఖను సంప్రదిస్తున్నారు. విమానాలకు సంబంధించిన సమాచారంపై ఆరా తీస్తున్నారు. ఇప్పుడు మరోసారి విమానం తిరుమల శ్రీవారి ఆలయం మీదుగా చక్కర్లు కొట్టడం చర్చనీయాంశమైంది.
|
|