పారిపోతుండగా పాక్ మహిళను పట్టుకున్న పోలీసులు,,,పబ్జీ ప్రేమ కేసులో విస్తుపోయే విషయాలు వెల్లడి

ఇటీవల దేశంలో సంచలనం సృష్టించిన పాక్ మహిళ సీమా హైదర్ విషయంలో కొత్త కొత్త ట్విస్టులు వెలుగు చూస్తున్నాయి. ఉత్తర్‌ప్రదేశ్ నుంచి ఆమె పారిపోతుండగా.. యాంటీ టెర్రరిస్ట్ స్క్వాడ్ పోలీసులు పట్టుకున్నారు. దీంతో ఆమెను విచారణ జరపగా పలు కీలక విషయాలు బయటికి వస్తున్నాయి. అయితే సీమా హైదర్.. సచిన్‌ మీనాను కలవడానికి ముందు పలువురిని సంప్రదించినట్లు గుర్తించారు. అయితే ఏటీఎస్ పోలీసులు అడిగిన ప్రశ్నలకు సీమా హైదర్ జాగ్రత్తగా సమాధానాలు ఇస్తోందని అధికారులు పేర్కొన్నారు.

అయితే భారత్‌కు వచ్చిన సీమా హైదర్ మొదట సచిన్‌ మీనాను కాకుండా వేరే వాళ్లను కలిసినట్లు విచారణలో వెల్లడైంది. సీమాకు ఢిల్లీలో కొంతమందితో పరిచయం ఉన్నట్లు ఏటీఎస్‌ పోలీసులు అనుమానిస్తున్నారు. విచారణలో భాగంగా సీమా హైదర్ చాలా తెలివిగా ప్రవర్తిస్తోందని విశ్వసనీయ వర్గాల ద్వారా తెలుస్తోంది. పోలీసులతో ఆమె ఇంగ్లీష్ మాట్లాడే విధానం కూడా వారికి మరింత అనుమానాలకు తావిస్తోంది. ఆమె పాక్ ఏజెంట్‌ అని.. వెంటనే సీమాను పాకిస్థాన్‌కు పంపించాలని గుర్తుతెలియని వ్యక్తులు ముంబై పోలీసులకు మెసేజ్‌ ఇచ్చారు. దీంతో ఈ బెదిరింపు మెసేజ్‌పై పోలీసులు విచారణ జరుపుతున్నారు.

పబ్జీ ఆడుతుండగా ఉత్తర్‌ప్రదేశ్‌కు చెందిన సచిన్ మీనా అనే యువకుడితో సీమా హైదర్‌కు 2019 లో పరిచయం ఏర్పడింది. అది కాస్తా ప్రేమకు దారితీయడంతో ఆమె తన నలుగురు పిల్లలతో కలిసి భారత్ రావాలని నిర్ణయించుకుంది. పాకిస్థాన్ నుంచి నేపాల్ వెళ్లి అక్కడి నుంచి భారత్‌కు వచ్చిన సీమా హైదర్‌కు సచిన్‌ మీనా ఆశ్రయం ఇచ్చాడు. తమ ప్రేమ విషయాన్ని సచిన్ మీనా తన తండ్రి నేత్రపాల్‌కు చెప్పగా.. భారతీయ సంస్కృతి పాటిస్తేనే పెళ్లి చేస్తానని చెప్పడంతో ఆమె అంగీకరించింది. అయితే లాయర్‌ను సంప్రదించగా.. భారతీయ పౌరసత్వం లేకపోవడంతో పెళ్లి జరగదని పేర్కొన్నాడు. అనంతరం పోలీసులకు ఆ లాయర్ సమాచారం ఇవ్వడంతో ఈ విషయం వెలుగులోకి వచ్చింది. వీరి గురించి మరింత సమాచారం కోసం డ్యామేజ్ అయిన సచిన్ మీనా మొబైల్ ఫోన్‌ను స్వాధీనం చేసుకుని.. దాని నుంచి డేటాను సేకరించేందుకు పోలీసులు ప్రయత్నిస్తున్నారు.

అయితే అంతకుముందు సీమా హైదర్ ఢిల్లీ పారిపోయేందుకు ప్రయత్నించగా నోయిడా పోలీసులు అరెస్టు చేశారు. వీసా లేకుండా భారత్‌లోకి అక్రమంగా ప్రవేశించి నివసిస్తున్నందుకు కొన్నిరోజుల క్రితం సీమా హైదర్‌ను నోయిడా పోలీసులు అరెస్టు చేశారు. ఆమెకు ఆశ్రయం కల్పించిన సచిన్‌ మీనాను, అతని తండ్రి నేత్రపాల్‌ను కూడా అరెస్టు చేయగా.. వారికి బెయిల్ వచ్చింది. అయితే తాను పూర్తిగా హిందువుగా మారానని.. పాకిస్థాన్ వెళ్లనని పట్టుబడుతోంది. మరోవైపు సీమా హైదర్‌ను పాకిస్థాన్‌కు పంపించాలని ఆమె భర్త గులాం హైదర్‌ .. సౌదీ అరేబియా నుంచి ప్రధాని నరేంద్ర మోదీకి విజ్ఞప్తి చేశాడు.