అమెరికాలో పిడుగుపాటుకు గురైన భారతీయ విద్యార్థినీ

అమెరికాలో ఉన్నత విద్య కోసం వెళ్లిన భారతీయ యువతి పిడుగుపాటుకు గురై చావుబతుకుల మధ్య ఆస్పత్రిలో కొట్టుమిట్టాడుతోంది. భారత్‌కు చెందిన సుశ్రూణ్య కోడూరు (25) యూనివర్సిటీ ఆఫ్‌ హ్యూస్టన్‌ (యూహెచ్‌)లో మాస్టర్స్ కోసం అమెరికా వెళ్లింది. ఇన్‌ఫర్మేషన్ టెక్నాలజీ విభాగం మాస్టర్స్‌ మొదటి ఏడాది విద్యార్ధిని అయిన సుశ్రూణ్య జులై 2న తన స్నేహితులతో కలిసి స్థానిక పార్కుకు వెళ్లింది. ఈ క్రమంలో ఓ కొలను పక్క నుంచి నడుచుకుంటూ వెళుతుండగా ఆ సమయంలో ఆమె పిడుగుపాటుకు గురైంది. దీంతో పక్కనే ఉన్న కొలనులో పడిపోయిన సుశ్రూణ్య.. కార్డియాక్ అరెస్ట్‌కు గురయ్యింది. ఇలా 20 నిమిషాల పాటు గుండె లయతప్పడంతో మెదడుకి రక్త ప్రసరణ నిలిచిపోయి కోమాలోకి వెళ్లిపోయింది.

పిడుగుపాటుకు మెదడు దెబ్బతిన్నట్లు ఆస్పత్రి వర్గాలు తెలిపాయి. సుదీర్ఘకాలం చాలా కీలకమైన వైద్యచికిత్స అందించాల్సి ఉంటుందని సుశ్రూణ్య బంధువు సురేంద్ర కుమార్‌ కొత్త తెలిపారు. ఆమె వైద్య చికిత్సకు అయ్యే ఖర్చు, అలాగే కుటుంబసభ్యులను అమెరికాకు రప్పించేందుకు అవసరమైన ఆర్థిక సహాయాన్ని కోరుతూ ఆన్‌లైన్‌లో ‘గోఫండ్‌మీ’ని ఏర్పాటు చేశారు. సుశ్రూణ్య పిడుగుపాటుకు గురైన వెంటనే కొలనులో పడిపోయారని, ఆ సమయంలో 20 నిమిషాలపాటు గుండె లయ తప్పడంతో మెదడు దెబ్బతిన్నట్లు సురేంద్ర తెలిపారు.

జులై 2 సాయంత్రం 5.40 గంటల సమయంలో మిత్రులతో కలిసి పార్కులో నడుచుకుని వెళ్తుండగా.. ఒక్కసారిగా పిడిగులు కురిశాయి. దీంతో వారంతా ఆ షాక్‌కు పడిపోగా.. సూశ్రూణ్యను పిడుగు బలంగా తాకింది. కొద్దిసేపటి తర్వాత తేరుకున్న ఆమె స్నేహితులు.. సుశ్రూణ్య కోసం వెతకగా కొలనులో పడి ఉంది. అప్పటికే పదిహేను నిమిషాలు గడిచిపోవడంతో బయటకు తీసి.. సీపీఆర్ చేశారు. వారి ప్రయత్నం ఫలించి గుండె మళ్లీ కొట్టుకుంది. అనంతరం చికిత్స కోసం ఆస్పత్రికి తరలించారు. కానీ, రక్త ప్రసరణ జరగకపోవడంతో మెదడులో న్యూరాన్లు దెబ్బతిని, కోమాలోకి వెళ్లిపోయినట్టు వైద్యులు నిర్దారించారు. ఆమెను బతికించడానికి తీవ్రంగా ప్రయత్నిస్తున్నారు.

మెదడు పనితీరు సాధారణ స్థితికి చేరుకునే వరకూ పోషకాహారం అందజేయడానికి పెర్క్యుటేనియస్ ఎండోస్కోపిక్ గ్యాస్ట్రోస్టోమీ ట్యూబ్‌ను అమర్చారు. ఆమెకు నిర్వహించినఎంఆర్ఐ పరీక్షల్లో అనాక్సిక్ ఎన్సెఫలోపతి సంకేతాలు గమనించారు. మెదడుకు ఆక్సిజన్ సరఫరా నిలిచిపోవడం వల్ల ఈ పరిస్థితి తలెత్తుతుంది. రక్త ప్రసరణ నిలిచిపోవడం, కార్డియాక్ అరెస్ట్‌కు గురికావడం వంటి సందర్భాల్లో ఇలా జరుగుతుందని వైద్యులు వెల్లడించారు. దీని వల్ల దీర్ఘకాలిక, స్వల్పకాలిక ప్రభావాలు ఉంటాయని చెప్పారు.