భారత పౌరసత్వం కోసం రాష్ట్రపతికి పాక్ మహిళ విజ్ఞప్తి

పాక్ మహిళ సీమా హైదర్ కేసులో కీలక విషయాలు వెలుగులోకి వస్తున్నాయి. తాను పాకిస్థాన్ తిరిగి వెళ్లేది లేదని.. భారత్‌లోనే ఉంటానని సీమా హైదర్ మొండికేస్తోంది. అయితే సీమీ హైదర్ పాకిస్థాన్ ఏజెంట్ కావచ్చన్న అనుమానాలతో ఉత్తర్‌ప్రదేశ్ పోలీసులు దర్యాప్తు చేస్తూనే ఉన్నారు. మరోవైపు.. ఈ కేసులో మరిన్ని విషయాలు బయటికి తీసుకువచ్చేందుకు నేషనల్ ఇన్వెస్టిగేషన్ ఏజెన్సీ - ఎన్ఐఏ అధికారులు కూడా రంగంలోకి దిగి.. అన్ని కోణాల్లో విచారణ కొనసాగిస్తున్నారు. ఈ క్రమంలోనే తనకు భారత పౌరసత్వం ఇవ్వాలని సీమా హైదర్.. రాష్ట్రపతి ద్రౌపదీ ముర్మూకు అభ్యర్థన పెట్టుకోవడం సంచలనంగా మారింది.

ఇప్పుడు సీమా హైదర్ కేసు రాష్ట్రపతి భవన్‌కు చేరుకుంది. తాను భారత్‌లోనే జీవిస్తానని.. అందుకు భారత పౌరసత్వం కల్పించాలని ఆమె రాష్ట్రపతి ద్రౌపదీ ముర్మూకు అభ్యర్థన చేసింది. సీమా హైదర్ తరఫున సచిన్‌ మీనా తండ్రి ఓ న్యాయవాది సాయంతో రాష్ట్రపతి ముందు ఈ పిటిషన్ దాఖలు చేసినట్లు తెలుస్తోంది. నోయిడాకు చెందిన సచిన్‌ మీనాను సీమా హైదర్ పెళ్లి చేసుకుందని.. దీంతో ఇప్పుడు ఆమె భారత కోడలు అయ్యిందని సీమా హైదర్ తరఫు న్యాయవాది పేర్కొన్నారు. కాబట్టి సీమా హైదర్‌కు భారత పౌరసత్వం ఇవ్వాలని కోరుతున్నట్లు సీమా లాయర్ తెలిపారు. దీంతో సీమా హైదర్ విషయంలో రాష్ట్రపతి ఏం నిర్ణయం తీసుకుంటారన్నది ప్రస్తుతం తీవ్ర ఉత్కంఠగా మారింది.

పబ్జీ ఆటలో పరిచయమైన ఉత్తర్‌ప్రదేశ్ యువకుడు సచిన్ మీనాతో ప్రేమాయణం సాగించిన సీమా హైదర్.. చివరకు పాకిస్థాన్‌లో ఉన్న తన ఇంటిని అమ్మేసి.. నలుగురు పిల్లలతో కలిసి నేపాల్ మీదుగా అక్రమంగా భారత్‌లోకి అడుగు పెట్టింది. నేపాల్ నుంచి భారత్‌కు వచ్చే సమయంలో తన పేరు ప్రీతి అని సీమా హైదర్ చెప్పినట్లు పోలీసులు గుర్తించారు. అనంతరం ఉత్తర్‌ప్రదేశ్‌లో సీమా హైదర్‌ను సచిన్ మీనా.. నోయిడాలోని ఓ అద్దె ఇంట్లో ఉంచాడు. ఆ తర్వాత ఉత్తర్‌ప్రదేశ్ పోలీసుల తనిఖీల్లో ఆమె పాకిస్థాన్ నుంచి వచ్చిందని గుర్తించి అరెస్ట్ చేశారు. ఆమెతోపాటు సచిన్ మీనా, అతని తండ్రిని కూడా అరెస్ట్ చేశారు. వారికి కోర్టు బెయిల్ మంజూరు చేయడంతో బయటికి వచ్చారు.

అయితే ఉత్తర్‌ప్రదేశ్ యాంటీ టెర్రర్ స్క్వాడ్ దర్యాప్తులో సీమా హైదర్ విషయంలో సంచలన అంశాలు వెలుగులోకి వస్తున్నాయి. సీమా హైదర్ ఇంగ్లీష్ అనర్గళంగా మాట్లాడుతోందని గుర్తించారు. పబ్జీ గేమ్ ఆడేందుకు ఎక్కువగా ఢిల్లీ, ఉత్తర్‌ప్రదేశ్ ప్రాంతాలకు చెందిన యువకులతో స్నేహం చేసినట్లు తేల్చారు. దీంతో ఆమె పాకిస్థాన్ ఏజెంట్ అయి ఉంటుందని అనుమానాలు వ్యక్తం చేస్తున్నారు. దాని కోసమే ఎన్ఐఏ అధికారులను కూడా రంగంలోకి దింపారు.