పేరు, మతం మార్చుకుని పాక్ యువకుడిని పెళ్లాడిన భారత మహిళ

పబ్జీలో పరిచయమైన పాక్ మహిళ సీమా హైదర్, భారత యువకుడు సచిన్ మీనాల ప్రేమ, పెళ్లి విషయం నడుస్తుండగానే ఇలాంటిదే మరో ఫేస్‌బుక్ ప్రేమ జరిగిన ఘటన తెలిసిందే. ఉత్తర్‌ప్రదేశ్‌కు చెందిన అంజు... ఫేస్‌బుక్‌లో పరిచయమైన నస్రుల్లా కోసం పాకిస్థాన్ వెళ్లింది. అయితే తమది ప్రేమ కాదు.. పెళ్లి చేసుకునే ఉద్దేశమే లేదని నస్రుల్లా చెప్పిన విషయాలన్నీ కట్టుకథలే అని తెలిసింది. వారిద్దరూ పెళ్లి చేసుకున్నారని.. అందుకు సంబంధించిన వీడియో కూడా బయటికి రావడం ప్రస్తుతం సంచలనంగా మారింది. అయితే అంజూకు ఇప్పటికే పెళ్లయి.. 15 ఏళ్ల కుమార్తె, 6 ఏళ్ల కుమారుడు.. ఉండగా ఫేస్‌బుక్ ప్రేమ కోసం పాకిస్థాన్ వెళ్లడం గమనార్హం.

అయితే నస్రుల్లా కోసం అంజూ పాకిస్థాన్ వెళ్లగా.. వారిద్దరూ పెళ్లి చేసుకోవాలని నిర్ణయించుకున్నట్లు తెలిసింది. దీంతో అంజూ ముస్లిం మతంలోకి మారింది. అనంతరం తన పేరును కూడా అంజూ నుంచి ఫాతిమాగా మార్చుకున్నట్లు సమాచారం. ఈ క్రమంలో అంజూ బురఖా ధరించినట్లు వీడియాలో తెలుస్తోంది. పాకిస్థాన్‌లోని దిర్‌ జిల్లా కోర్టులో అంజూ, నస్రుల్లా అధికారికంగా పెళ్లి చేసుకున్నట్లు నివేదికలు వెల్లడిస్తున్నాయి. ఈ క్రమంలోనే అంజూ, నస్రుల్లా ఒకరికొకరు సన్నిహితంగా ఉంటూ వివిధ ప్రాంతాల్లో ఉన్న వీడియో ప్రస్తుతం సోషల్ మీడియాలో వైరల్‌గా మారింది. వీరిద్దరి వివాహాన్ని మలకాండ్‌ డివిజన్‌ డీఐజీ నసీర్‌ మెహమూద్‌ సత్తి ధ్రువీకరించారు. అంజూ ఇస్లాంలో మతంలోకి మారి ఫాతిమాగా పేరు మార్చుకున్నట్లు తెలిపారు. ఈ సందర్భంగా పోలీసులు, న్యాయవాదుల సమక్షంలో అంజూ, నస్రుల్లా దంపతులు, నస్రుల్లా కుటుంబ సభ్యులు దిర్ బాలాలోని జిల్లా కోర్టుకు హాజరయ్యారు. భద్రత దృష్ట్యా పోలీసు భద్రతతో వారిని ఇంటికి తీసుకెళ్లారు.

అయితే తమది కేవలం స్నేహం మాత్రమేనని.. పెళ్లి చేసుకునే ఆలోచనే లేదని వారిద్దరు తెలిపారు. అంజూ నెల రోజుల టూరిస్ట్ వీసాతో పాకిస్థాన్‌కు వచ్చిందని.. దాని గడువు ఆగస్టు 20 వ తేదీన ఆమె భారత్‌కు తిరిగి వస్తుందని నస్రుల్లా వెల్లడించాడు. అయితే ఇది తెలిపిన 24 గంటల్లోపే ఈ విషయాలన్నీ వెలుగులోకి వచ్చాయి. దీంతో అసలు వీరిద్దరి మధ్య ఏం జరిగిందోననే అనుమానాలు వ్యక్తం అవుతున్నాయి. ఇప్పటి వరకు వారు ఇద్దరూ చెప్పింది అబద్దమా లేక ప్లాన్ ప్రకారం వారిద్దరూ పెళ్లి చేసుకున్నారా లేదా నస్రుల్లా, అతని కుటుంబమే బలవంతంగా ఈ పెళ్లి చేశారా అనేది ప్రస్తుతం కీలకంగా మారింది. అయితే అంజూ వీసా ఆగస్ట్ 20 వ తేదీ వరకు మాత్రమే ఉంది. ఆ తర్వాత ఎట్టి పరిస్థితుల్లోనూ పాక్‌లో ఉండడం కుదరదు. అయితే ప్రస్తుతం అంజూ ఇస్లాం మతంలోకి మారిపోవడం.. నస్రుల్లాను పెళ్లి చేసుకుని పేరు మార్చుకోవడంతో ఆమె అక్కడే ఉంటుందా అనే అనుమానాలు కలుగుతున్నాయి.