తిరుమలలో మరో రెస్ట్ హౌస్ ప్రారంభం

తిరుమలలో మరో రెస్ట్ హౌస్ ప్రారంభమైంది. జగదీష్ నారాయణి విశ్రాంతి గృహాన్ని టీటీడీ ఛైర్మన్ వైవీ సుబ్బారెడ్డి బుధవారం ప్రారంభించారు. ఈ సందర్భంగా హైదరాబాద్‌కు చెందిన దాతలు ఓం ప్రకాష్‌ అగర్వాల్‌, సునీతా అగర్వాల్‌ కలిసి ఛైర్మన్‌ను ఘనంగా సత్కరించారు. రిసెప్షన్ డెప్యూటీ ఈవో శ్రీ హరీంద్రనాథ్, ఓఎస్డీ శ్రీ రామకృష్ణ, వీజీఓలు శ్రీ బాలిరెడ్డి, శ్రీ గిరిధర్ రావు తదితరులు పాల్గొన్నారు.

మరోవైపు వారణాశి లోని శివాల ప్రాంతం సమీపంలోని చాట్ సింగ్ ఫోర్ట్ వద్ద జూలై 28 నుంచి ఆగష్టు 3వ తేదీ వరకు ఎస్వీ ఉన్నత వేదాధ్యయన సంస్థ ఆధ్వర్యంలో శ్రీ శ్రీనివాస చతుర్వేద హవనం కార్యక్రమం నిర్వహించనున్నారు. లోక క్షేమం, ఆరోగ్యం, ఐశ్వర్య వృద్ధి కొరకు అలాగే, అతివృష్టి, అనావృష్టి నుంచి ప్రపంచాన్ని కాపాడాలని ఈ కార్యక్రమం నిర్వహించనున్నారు. ఇందులో భాగంగా హోమ గుండాలు ఏర్పాటు చేసి ఏడు రోజుల పాటు నాలుగు వేదాల్లోని అన్ని మంత్రాలను పఠించి యజ్ఞేశ్వరునికి సమర్పణ చేస్తారు. ఎస్వీ ఉన్నత వేదాధ్యయన సంస్థ ప్రత్యేకాధికారి డాక్టర్ విభీషణ శర్మ ఏర్పాట్లు పర్యవేక్షిస్తున్నారు.

తిరుమలలోని కర్ణాటక సత్రాల అభివృద్ధి పనుల పురోగతిపై టీటీడీ ఈవో ధర్మారెడ్డి, కర్ణాటక రాష్ట్ర రవాణా, దేవాదాయ శాఖల మంత్రి రామలింగారెడ్డితో కలిసి అన్నమయ్య భవన్‌లో సమీక్ష నిర్వహించారు. ముందుగా టీటీడీ చీఫ్ ఇంజినీర్ నాగేశ్వరరావు పవర్‌పాయింట్ ప్రజెంటేషన్ ద్వారా పనుల పురోగతిని తెలియజేశారు. ఈ ఏడాది డిసెంబర్‌లోగా పనులు పూర్తవుతాయని వివరించారు.

కర్ణాటక స్టేట్ ఛారిటీస్ ప్రతినిధులు తమ డిజైన్లతో పాటు బ్లాక్ ఎ, బి భవనాలు, కల్యాణ మండపంలో గల గదుల వివరాలతో కూడిన ప్రణాళికను తెలియజేశారు. షెడ్యూల్ ప్రకారం పనులు పూర్తి చేసేందుకు అవసరమైన డిజైన్లను సకాలంలో అందించాలని కర్ణాటక రాష్ట్ర అధికారులను టీటీడీ ఈవో కోరారు. ఎలాంటి ఆలస్యం చేయకుండా టీటీడీకి అవసరమైన సమాచారం అందించాలని కర్ణాటక మంత్రి తమ ఎండోమెంట్ అధికారుల బృందాన్ని ఆదేశించారు.

కర్ణాటక ప్రభుత్వం 2021 డిసెంబర్ 27న రూ.220 కోట్ల వ్యయంతో కర్ణాటక సత్రాల అభివృద్ధి కోసం తిరుమలలో గల స్థలాన్ని టీటీడీకి అప్పగించింది. ఈ భవనంలో మొత్తం 242 గదులతో రెండు బ్లాకులు, 12 డార్మిటరీలు, ఒక కల్యాణమండపం, ఒక సూట్ బ్లాక్, 86 గదులతో కూడిన పాత బ్లాక్ ఉన్నాయి.