ఆ దొంగలు డబ్బు, బంగారం అసలు తీసుకెళ్లరు,,,అవి మాత్రమే తీసుకెళ్తారు

కాకినాడలో వింత దొంగల్ని పోలీసులు అరెస్ట్ చేశారు. ఈ ముగ్గురు కాస్త వెరైటీ దొంగలు.. ఇళ్లలో చొరబడిన దొంగలు సాధారణంగా బంగారం, వెండి, డబ్బులు ఎత్తుకెళతారు. వీళ్లు మాత్రం వాటికే జోలికి వెళ్లరు. చోరీకి వెళ్లిన చోట ఖరీదైన చీరలు, బంగారం, వెండి వస్తువులు ఉన్నా కనీసం వాటిని తాకరు. తాళం వేసి ఉన్న ఇళ్లను టార్గెట్ చేసి వీరు చేసే చోరీల గురించి తెలిసి పోలీసులు ఒకింత అవాక్కయ్యారు.

కాకినాడ ప్రాంతానికి చెందిన నార్ని సతీష్‌చంద్ర, బుడగ ఆనంద్‌కుమార్‌, కర్రి నాగ శివకుమార్‌ స్నేహితులు. ఏసీ మెకానిక్‌లుగా పని చేస్తూ, పాత ఏసీలు కొనుగోలు చేసి విక్రయాలు చేస్తుండేవాళ్లు. అయితే ఈ ముగ్గురు ఈజీగా డబ్బు సంపాదించాలనే అత్యాశతో సతీష్‌ చంద్ర చోరీలు మొదలుపెట్టాడు. తాళం వేసి ఉన్న ఇళ్లను గుర్తించి, రాత్రిపూట చోరీలు చేస్తున్నాడు. చోరీ సొత్తును ఓఎల్‌ఎక్స్‌లో పెట్టి విక్రయిస్తున్నాడు. ఇటీవల కాలంలో జిల్లాలో వరుసగా చోరీలు జరగడంతో ఎస్పీ ఫోకస్ పెట్టారు.

స్పెషల్ టీమ్‌లను ఏర్పాటు చేసి దర్యాప్తు మొదలు పెట్టారు. ఓఎల్‌ఎక్స్‌లో కొనుగోలు చేసిన కారు చోరీపై ఓ ఫిర్యాదు రావడంతో కేసు నమోదు చేసి దర్యాప్తు ప్రారంభించారు. ఈ క్రమంలో నిందితుల కోసం గాలిస్తుండగా ఈనెల 25న రాయుడుపాలెం, వాకలపూడిలో సతీష్‌చంద్ర అనుమానాస్పదంగా తిరుగుతూ కనిపించాడు. అతడిని అదుపులోకి తీసుకుని ప్రశ్నించగా చోరీలు చేసినట్లు అంగీకరించాడు. తనతో పాటు మరో ఇద్దరికి ఈ చోరీల్లో భాగస్వామ్యం ఉందని చెప్పాడు. దీంతో ఆనంద్‌కుమార్‌, నాగశివకుమార్‌లను కూడా అరెస్ట్‌ చేశారు.

ఈ ముగ్గురు దొంగతనాలన్నీ ఒకే రీతిలో ఉన్నట్లు గుర్తించారు. వీరు ఇళ్లలో చొరబడిన సమయంలో.. బంగారం, వెండి, డబ్బులు, ఖరీదైన చీరలు ఉన్నా చోరీ చేసేవాళ్లు కాదు. ఇళ్లలో ఉండే కంప్యూటర్‌లు, ఏసీలు, జెరాక్స్‌ మిషన్లు, వాషింగ్‌ మిషన్లు, ప్రింటర్స్‌, ఎల్‌ఈడీ టీవీలు, కార్లను ఎత్తుకెళ్లేవారు. వీటిని ఓఎల్‌ఎక్స్‌లో పెట్టి విక్రయించేవారు.. ఇలా సర్పవరం పోలీస్‌స్టేషన్‌ పరిధిలో 5 కేసులు, తిమ్మాపురం, పిఠాపురం టౌన్‌ పోలీస్‌స్టేషన్ల పరిధిలోని చోరీ సొత్తు రికవరీ చేశారు.

రెండు కార్లు, ఏసీలు 8, ఇన్వెర్టర్‌ బ్యాటరీలు-4, ల్యాప్‌టాప్‌-1, జెరాక్స్‌ మిషన్‌-1, ప్లేయింగ్‌ కీబోర్డు-1, వాషింగ్‌ మిషన్‌-1, కంప్యూటర్‌ సిస్టమ్‌-1, మంచాలు-2, ప్రింటర్స్‌-1, ఎల్‌ఈడీ టీవీలు-2 స్వాధీనం చేసుకున్నారు. అలాగే ఓఎల్‌ఎక్స్‌ నిర్వాహకులకు నోటీసులు జారీ చేస్తామన్నారు పోలీసులు. వీరు ఇళ్లలో ఉండే వాషింగ్‌ మెషిన్లు, ఏసీలు, మంచాలు, ఇతర గృహోపకరణ వస్తువులే ఎత్తుకెళ్లేవారు. ఇంట్లోకి చొరబడి సామాన్లు మూటకట్టి దర్జాగా తీసుకెళ్లేవారు. మొత్తం మీద ఈ వింత దొంగల గురించి తెలిసి పోలీసులు అవాక్కయ్యారు.