ఈ ఐటీ ఉద్యోగులకు ఆ భయమే లేదు.. లేఆఫ్స్ జరిగినా సేఫ్

ఐటీ ఉద్యోగులు ప్రస్తుత రోజుల్లో దుర్భర పరిస్థితిని ఎదుర్కొంటున్నారని చెప్పాలి. 2022 అర్ధభాగం నుంచే గూగుల్, అమెజాన్, మైక్రోసాఫ్ట్ అంటూ పెద్ద కంపెనీలతో పాటు చిన్న కంపెనీలు సైతం వేలాది మందిని ఉద్యోగాల్లోంచి తొలగించాయి. విడతల వారిగా ఇప్పటి వరకు లక్షల మంది జాబ్స్ కోల్పోయి ఇబ్బందులు ఎదుర్కొంటున్నారు. ఇప్పటికీ ఏదో ఒక సంస్థ లేఆఫ్స్ ప్రకటిస్తూనే ఉంది. నిత్యం వందల మంది జాబ్స్ కోల్పోతున్న సంఘటనలు చూస్తూనే ఉన్నాయి. ఆర్థిక వృద్ధి మందగమనంలో పయనిస్తుండడంతో పాటు అన్ని కంపెనీలు ఆర్టిఫీషియల్ ఇంటెలిజెన్స్ వైపు మొగ్గు చూపుతున్న కారణంగా ఐటీ పరిశ్రమలో పని చేస్తున్న వారి ఉద్యోగాలకు గ్యారటీ లేకుండా పోయింది. మరోవైపు.. ఐటీ కెరీర్ ఎంచుకోవాలని చూస్తున్న ఫ్రెషర్స్ లోనూ అయోమయ పరిస్థితులు తలెత్తుతున్నాయి. అయితే, మీకు జాబ్ సెక్యూరిటీతో పాటు భవిష్యత్తులో ఎప్పటికీ ఫుల్ డిమాండ్ ఉండో కొన్ని ఐటీ రోల్స్ ఉన్నాయి. కంపెనీలు లేఆఫ్స్ ప్రకటన చేసినప్పటికీ ఈ రోల్స్ లో ఉన్న వారికి చాలా వరకు ప్రభావం ఉండకపోవచ్చని ఓ నివేదిక వెల్లడించింది. ఆ ఐటీ ఉద్యోగాలేంటో ఇప్పుడు మనం తెలుసుకుందాం.

ఐటీ మేనేజర్స్: కంపెనీ ప్రాజెక్టులు, రోజువారీ కార్యకలాపాలు, సిస్టమ్స్ వంటి వాటిని చూసుకునే ఐటీ మేనేజర్లకు లేఆఫ్స్‌లోనూ ఎలాంటి ఢోకా ఉండదు. వీళ్లు వారి వారి టీంలను ముందుండి నడిపిస్తూ లీడర్లుగా వ్యవహరిస్తారు. ఉద్యోగులకు ఎప్పటికప్పుడు ట్రైనింగ్ ఇస్తుంటారు. దీంతో వారి గోల్స్ సాధించేందుకు సాయపడుతుంటారు.

ఇన్ఫర్మేషన్ సెక్యూరిటీ ఎనలిస్ట్: డేటా డ్రివెన్ ఎన్విరాన్‌మెంట్‌లో ఇన్ఫర్మేషన్ సెక్యూరిటీ ఎనలిస్టుల పాత్ర కీలకం, కంపెనీకి సంబంధించిన సున్నితమైన డేటాకు వీరు రక్షణ కల్పిస్తుంటారు. కంపెనీ హార్డ్ వేర్, సాఫ్ట్ వేర్ సైబర్ ఎటాక్స్ బారినపడకుండా అనుక్షణం మానిటరింగ్ చేస్తారు. అందుకే వీరికి ప్రస్తుతం ఐటీ రంగంలో మంచి డిమాండ్ ఉంది.

వెబ్ డెవలపర్స్: ఐటీ కంపెనీలో వెబ్ డెవలపర్లు వెబ్ సైట్ నిర్వహణ చేస్తుంటారు. వెబ్ ఆధారిత అప్లికేషన్లు డెవలప్ చేస్తుంటారు. వెబై సైట్ లో సున్నితమైన డేటాకు రక్షణ కల్పిస్తారు. బగ్స్ ఫిక్స్ చేస్తుంటారు.

డేటా అడ్మినిస్ట్రేటర్స్: డేటా అడ్మినిస్ట్రేటర్లు డేటాను స్టోర్ చేయడం, ఆర్గనైజేషన్, రిట్రీవ్ వంటివి చేస్తుంటారు. ఇందుకోసం వారు ప్రత్యేక సాఫ్ట్‌వేర్ ఉపయోగిస్తారు. కంపెనీ డేటా బేస్ ను తరుచూ అప్డేట్ చేస్తుంటారు. డేటా ఎనలిటిక్స్ కు సంబంధించిన రిపోర్టులను తయారు చేస్తారు. కంపెనీలో అన్ని విభాగాలు కీలక నిర్ణయాలు తీసుకునేందుకు అవసరమైన వాటిని సమకూరుస్తుంటారు.

లీగల్ అండ్ స్ట్రాటజీ రోల్స్: మరోవైపు.. లీగల్ అండ్ స్ట్రాటజీ రోల్స్ లో పని చేసే ఉద్యోగులు కూడా ఇప్పటి వరకు లేఆఫ్స్ కారణంగా ప్రభావితం కాలేదని నివేదిక తెలిపింది. కానీ, కస్టమర్ స్పెషలిస్టులు, సాఫ్ట్ వేర్ డెవలపర్స్, బేసిక్ కోడర్స్, డేటా సైంటిస్టులు, రిక్రూటర్లు ఎక్కువగా లేఆఫ్స్‌కు ప్రభావితమైనటైలు నివేదిక వెల్లడించింది.