అది ఒకప్పుడు దేశంలోనే చివరి పోస్టాఫీస్.. కానీ నేడు ఫస్ట్

సెల్‌ఫోన్లు, ఇంటర్నెట్ లేని కాలంలో సమాచార మార్పిడికి పోస్టాఫీస్‌లే ప్రధాన సాధనాలుగా ఉండేవి. బ్యాంకులు ఇన్ని సౌకర్యాలు, సేవలు కల్పించక ముందు.. డబ్బులు ఒకరి నుంచి మరొకరికి పంపించుకోవాలంటే మనీఆర్డర్ చేసుకునే వారు. అయితే కాలం గడుస్తున్న కొద్దీ.. టెక్నాలజీ యుగం రోజురోజుకూ శరవేగంగా అభివృద్ధి చెందుతున్న తరుణంలో పోస్టాఫీస్‌ల ప్రాధాన్యత నానాటికీ తీసికట్టుగా మారుతోంది. అయితే ఆ పోస్టాఫీస్ మాత్రం దేశంలోనే ప్రత్యేకమైనది. దేశానికి స్వాతంత్రం రాకముందు నుంచే ఈ పోస్టాఫీస్.. సేవలు అందిస్తోంది. భారత్ పాక్ దేశాల సరిహద్దుల్లో ఉన్న ఈ పోస్టాఫీస్.. చాలా క్లిష్టమైన పరిస్థితుల్లో ఉత్తరాలను అందించినట్లు స్థానిక పోస్టాఫీస్ అధికారులు చెబుతున్నారు. జమ్మూ కశ్మీర్‌లో ఉన్న ఈ పోస్టాఫీస్ గురించి మరిన్ని వివరాలు తెలుసుకుందాం.

జమ్ముకశ్మీర్‌లోని కుప్వారా జిల్లాలో కిషన్‌గంగా నది ఒడ్డున ఉన్న లైన్‌ ఆఫ్‌ కంట్రోల్‌- కెరాన్‌ పోస్టాఫీస్‌. ఈ పోస్టాఫీస్ పిన్‌ కోడ్‌ నంబర్‌ 193224. దేశానికి స్వాతంత్ర్యం రాకముందు, పాకిస్థాన్‌ ఆవిర్భావానికి ముందు నుంచి ఇక్కడ పోస్టాఫీస్‌ కార్యకలాపాలు నిర్వహిస్తుందని స్థానికులు చెబుతున్నారు. జమ్ము కశ్మీర్‌లో ఉగ్రదాడులు జరిగిన సమయాల్లో కూడా ఇక్కడ ఉత్తరాలు సరఫరా చేసినట్లు తెలిపారు. అయితే అది ఒకప్పుడు దేశంలోనే చిట్టచివరి పోస్టాఫీస్‌ అని.. అక్కడ ఉత్తరాలు డెలివరీ చేయడం, సేకరించడం చాలా ప్రమాదకరంగా ఉండేదని స్థానిక పోస్టాఫీస్ అధికారులు చెబుతున్నారు. కానీ భారత సైన్యం రావడంతో పరిస్థితి మొత్తం పూర్తిగా మారిపోయిందని పేర్కొన్నారు. అలా ఆ పోస్టాఫీస్‌ కొత్త గుర్తింపు పొందింది. అయితే ఇదంతా ఇండియన్ ఆర్మీ వల్లే సాధ్యమైందని స్థానికులు ఆనందం వ్యక్తం చేస్తున్నారు.

అయితే గతంలో ఈ పోస్టాఫీస్‌ను దేశంలోనే చిట్ట చివరిదిగా భావించేవారు. జమ్ము కశ్మీర్‌లోనే ఉన్నా.. పక్కనే పాక్‌ ఆక్రమిత కశ్మీర్‌ ఉండటంతో ఆ ప్రాంతంలో ఎప్పుడూ ఉద్రిక్త పరిస్థితులు తలెత్తేవి. దీంతో తాము ఉత్తరాలను సరిగ్గా పంపిణీ చేయలేక పోయేవాళ్లమని.. బారాముల్లా డివిజన్‌ పోస్టాఫీస్‌ సూపరిండెంట్‌ అబ్దుల్‌ హమీద్ కుమార్‌ తెలిపారు. కానీ భారత సైనికులు అక్కడి వచ్చి.. తమకు ధైర్యం కల్పించడంతో పరిస్థితి మారిందని చెప్పారు. ఇప్పుడు ఎల్‌ఓసీ నుంచి దేశంలోనే మొదటి పోస్టాఫీస్‌గా మారిందని పేర్కొన్నారు. ఈ పోస్టాఫీస్ భారత్‌కు స్వాతంత్ర్యం రాకముందు నుంచే కార్యకలాపాలు సాగించేదని స్థానికులు చెబుతున్నారు. 1965, 1971లో భారత్ పాక్ దేశాల మధ్య ఉద్రిక్తతలు తలెత్తినప్పుడు.. 1990 లో పాకిస్థాన్ అండతో ఉగ్రవాదులు దాడులు చేసినపుడు కూడా ఇక్కడి నుంచి ఉత్తరాలు నిర్విరామంగా పంపిణీ చేసినట్లు వివరించారు. ప్రస్తుతం ఆ పోస్టాఫీస్‌లో ముగ్గురు పోస్ట్‌మెన్‌లు ఉన్నారు. అయితే అక్కడ మొబైల్‌ నెట్‌వర్క్‌ ఉండకపోవడంతో డిజిటల్‌ సేవలు అందుబాటులో లేవని పోస్ట్‌మాస్టర్‌ షాకిర్‌ భట్‌ తెలిపాడు.

1992లో పోస్ట్‌మాస్టర్‌గా అక్కడికి వెళ్లానని.. 1993లో వచ్చిన వరదలకు పోస్టాఫీస్‌ పూర్తిగా కొట్టుకు పోయిందని చెప్పాడు. దీంతో అప్పటి నుంచి తన ఇంట్లోనే పోస్టాఫీస్‌ ఏర్పాటు చేశామని.. ప్రస్తుతం ముగ్గురు పోస్ట్‌మెన్‌లు స్థానికులతో పాటు అక్కడ విధులు నిర్వహించే సైనిక సిబ్బందికి ఉత్తరాలు అందిస్తున్నామని వెల్లడించారు. గతంలో కంటే పరిస్థితులు ఇప్పుడు మెరుగయ్యాయని.. అప్పుడప్పుడు పర్యాటకులు వస్తున్నారని.. పర్యాటకులకు అదనపు ఆకర్షణగా ఈ పోస్టాఫీస్ మారిందని చెప్పారు. ఒకప్పుడు దేశానికి చివరి పోస్టాఫీస్‌గా ఉన్నది.. ఇప్పుడు మొదటి పోస్టాఫీస్‌గా మారిందని షాకిర్‌ భట్‌ వెల్లడించాడు. త్వరలోనే ఆప్టికల్‌ ఫైబర్‌ కేబుల్‌ సేవలు అందుబాటులోకి తీసుకొస్తున్నట్లు కుప్వారా డిప్యూటీ కమిషనర్‌ ఆయుషి సుదాన్‌ తెలిపారు. పర్యాటకుల కోసం ఈ ప్రాంతంలో క్యాంపింగ్ సైట్‌ కూడా నిర్వహిస్తున్నారు. ఆర్మీ సాయంతో స్థానికులకు క్యాంపింగ్ సైట్‌లో శిక్షణ ఇచ్చి.. పర్యాటకాన్ని ప్రోత్సహిస్తున్నట్లు ఆయుషి వెల్లడించారు.