అసత్య సమాచారాన్ని అడ్డుకునేందుకు యూట్యూబ్ నిర్ణయం

ప్రముఖ వీడియో స్ట్రీమింగ్‌ వేదిక యూట్యూబ్ అంటే అదొక మహాసముద్రం. అన్ని రకాల వీడియోలు అందులో కోట్లలో అందుబాటులో ఉంటాయి. చిన్న జలుబు నుంచి మొదలుపెడితే బాంబులు తయారు చేయడం వరకు అన్ని వీడియోలు యూట్యూబ్‌లో దొరుకుతాయి. ఇక ఆరోగ్యానికి సంబంధించిన వీడియోలైతే లెక్కకు మించి ఉంటాయి. అయితే కొంతమంది ఏదైనా అవసరం కోసం యూట్యూబ్ వీడియోలు చూసి వాటినే అనుసరిస్తున్నారు. అయితే కొన్నిసార్లు అసత్య సమాచారాన్ని విని చాలామంది మోసపోతూ ఉంటారు. ఈ క్రమంలోనే చాలా మంది యూట్యూబ్ యూజర్లు తీవ్ర అసహనానికి లోనవుతున్నారు. ఇలాంటి ఫేక్ న్యూస్‌ను అరికట్టాలని యూట్యూబ్‌కు రిపోర్ట్ చేస్తున్నారు. ఈ నేపథ్యంలోనే స్పందించిన యూట్యూబ్.. యూజర్లను తప్పుదోవ పట్టించే వీడియోలను తమ ప్లాట్‌ఫామ్‌ నుంచి తొలగిస్తామని చెప్పింది.

ఈ క్రమంలోనే పలు ఆరోగ్య సమస్యలు, చికిత్సలు, ఔషధాలపై యూట్యూబ్‌లో లక్షలు, కోట్ల ఛానెల్‌లలో ప్రసారం అవుతూ ఉంటాయి. ఇందులో కొంతమంది డాక్టర్లు, నిపుణులు చెబుతూ ఉంటే.. మరికొన్ని యూట్యూబ్ ఛానెల్‌లలో మాత్రం అనామకులు వ్యూస్ కోసం, యూజర్ల కోసం తమకు ఇష్టం వచ్చిన సూచనలు చేస్తున్నారు. అయితే వారు చెప్పింది అమాయకుల్లాగా విన్న కొంతమంది యూజర్లు అవే పద్దతులు పాటించడంతో ఉన్న సమస్యలకు తోడు కొత్త సమస్యలు వచ్చి పడుతున్నాయి. కొన్ని ఘటనల్లో అయితే రోగుల ప్రాణాల మీదికి వచ్చాయి. ఈ క్రమంలోనే అసత్య సమాచారాన్ని తొలగిస్తామని యూట్యూబ్ వెల్లడించింది. మెడికల్ ఆఫీసర్లతోపాటు ప్రపంచ ఆరోగ్య సంస్థ మార్గదర్శకాలకు విరుద్ధంగా ఉన్న వీడియోలను యూట్యూబ్ నుంచి తొలగిస్తామని చెప్పింది. ముఖ్యంగా ‘వెల్లుల్లితో క్యాన్సర్‌ నయం’ వంటి వీడియోలను తొలగిస్తామని యూట్యూబ్‌ స్పష్టం చేసింది.

ప్రజలను తప్పుదోవ పట్టించే వీడియోల తొలగింపుపే దీర్ఘకాలిక వ్యూహాలు అమలు చేయడానికి తాము కృషి చేస్తున్నట్లు యూట్యూబ్ వెల్లడించింది. అయితే ఇప్పటికే ఆరోగ్యానికి సంబంధించి నిర్మూలన, చికిత్స, నిరాకరణకు సంబంధించి చాలా విధానాలను అనుసరిస్తున్నామని.. ఈ మూడు విభాగాల్లో తప్పుడు సమాచారంపై స్థానిక డాక్టర్లు, డబ్ల్యూహెచ్‌ఓ సూచించిన నియమానలు, నిబంధనలకు వ్యతిరేకంగా ఉన్న వీడియోలను గుర్తించి తొలగిస్తామని వెల్లడించింది. కచ్చితమైన చికిత్స ఉన్నా తప్పుదోవ పట్టించే వీడియోలు ఇక నుంచి యూట్యూబ్‌లో కనిపించవని తెలిపింది. వెల్లుల్లితో క్యాన్సర్‌ నయం, రేడియేషన్‌ థెరపీకి బదులు సీ విటమిన్‌ తీసుకోండి అంటూ చెప్పే వీడియోలను వెంటనే తొలగించనున్నట్లు పేర్కొంది.

ఇప్పటికే తప్పుడు కంటెంటును తొలగించే ప్రక్రియ ప్రారంభించామని.. మరికొన్ని వారాల్లో మరింత విస్తరిస్తామని చెప్పింది. క్యాన్సర్‌ బారినపడిన వ్యక్తి లేదా వారి కుటుంబం.. దాని లక్షణాలు, తీసుకోవాల్సిన చికిత్స గురించి తెలుసుకునేందుకు ఆన్‌లైన్‌లో పరిశోధిస్తారని అలాంటి వారికి ఉపయోగపడే కంటెంట్‌ను అందించడమే తమ లక్ష్యమని యూట్యూబ్‌ వెల్లడించింది. అయితే వైద్యశాస్త్రంలో వస్తోన్న పురోగతిపై చర్చలు ఎంతో కీలకమైనందున అలాంవంటి అధ్యయనాలకు సంబంధించి ఆధారాలను వెల్లడించే, ఫలితాలకు సంబంధించిన కంటెంటును మాత్రం తొలగింపు నుంచి మినహాయింపు ఉంటుందని తెలిపింది.