ఏపీ డీజీపీని కలిసిన పోసాని,,,లోకేష్ బాబుపై ఫిర్యాదు

లోకేష్‌ బాబుది కూడా చంద్రబాబులా క్రిమినల్ మెంటాలిటీ అని అన్నారు ఏపీ ఫిల్మ్ డెవలప్‌మెంట్ కార్పొరేషన్ చైర్మన్ పోసాని కృష్ణ మురళి. టీడీపీ జాతీయ ప్రధాన కార్యదర్శి నారా లోకేష్ వల్ల తనకి ప్రాణ హాని ఉందంటూ.. బుధవారం నాడు ఏపీ డీజీపీ రాజేంద్రనాథ్ రెడ్డిని కలిశారాయన. తనని చంపేందుకు లోకేష్ బాబు కుట్రపన్నారని.. తనకి ప్రాణ రక్షణ కల్పించాలని కోరారు పోసాని. అనంతరం జరిగిన మీడియా సమావేశంలో.. లోకేష్, చంద్రబాబులపై కీలక వ్యాఖ్యలు చేశారు. ‘నన్ను టీడీపీలో చేర్చుకోవడానికి లోకేష్ అతని పీఏ చైతన్య ద్వారా ప్రయత్నాలు చేశారు.. నేను చేరకపోవడంతో నాపై కక్ష పెంచుకున్నారు.. వాళ్లు చేస్తున్న తప్పుల్ని బహిర్గతం చేయడంతో నన్ను చంపడానికి ప్లాన్ చేస్తున్నారు.

లోకేష్ ముందు నేనెంత? ఆయన ముందు నేనెంత?? లోకేష్ కళ్లు తెరిస్తే నేను కైలాసంలో ఉంటా. అంత పెద్ద వాడి ముందు నేను తూగలేను. నేను చాలా చిన్నోడిని. ప్రతిపక్షంలో ఉన్న వాళ్లు.. మాట్లాడితే చాలు.. అధికారంలోకి వస్తాం.. వచ్చాక బట్టలూడదీస్తాం అంటున్నారు. బట్టలిప్పి ఏం చూస్తార్రా నాయనా.. అందరూ బట్టలిప్పేవాళ్లే. బట్టలిప్పి ఏం చేస్తారు.. ఏం చూస్తారు? మహా అయితే మొలతాడు చూస్తారంతే. ప్రతివాడు బట్టలిప్పేవాడే. బట్టలిప్పే కొడతారట. లోకేష్ బాబుకి బట్టలిప్పడం అలవాటేమో. నువ్వు ఏం చేయాలో జనానికి చెప్పాలి కానీ.. బట్టలిప్పుతా.. అందులో పెడతా.. ఇందులో పెడతానంటా రేంటి? లోకేష్‌ది చంద్రబాబు మెంటాలిటీ. తనకి కావాల్సిన దాని కోసం ఎంతకైనా తెగిస్తాడు.

ఎవడైనా ఆధారాలు పెట్టుకుని హత్య చేయడు. అప్పట్లో రామారావుని ఆధారాలు పెట్టుకుని వెన్ను పోటు పొడవలేదు కదా. లోకేష్ బాబు నాపైనే ఎందుకు పగపట్టాడంటే.. నేను ఎక్కువగా మాట్లాడుతున్నాను కాబట్టి. నేనేం పవర్ ఫుల్ కాదు.. నా నోరే పవర్ ఫుల్. నాకు ఇద్దరు పిల్లలు ఉన్నారు. పెళ్లి అయిన తరువాత చంపేసినా పర్లేదు. చంద్రబాబుని గుడిలో ప్రమాణం చేయమనండి.. రాజకీయాల నుంచి విరమించుకుంటున్నాం.. నాకు కానీ.. నా కొడుక్కి కానీ ముఖ్యమంత్రి పదవి వద్దు.. పవన్ కళ్యాణ్‌ని ముఖ్యమంత్రి చేస్తాం అని ప్రమాణం చేయమనండి. చంద్రబాబు ఎలాంటి వాడో తెలుసు కదా.. రాజకీయ సన్యాసం చేస్తాడా? పవన్ కళ్యాణ్‌ని ముఖ్యమంత్రిని చేస్తాడా? చంద్రబాబు కంటే ఎక్కువ లోకేష్ బాబు. అతన్ని విమర్శిస్తే పక్కకి తప్పిస్తాడు. ఆ భయంతోనే డీజీపీ గారికి కంప్లైంట్ చేశారు.. నాకు రక్షణ కల్పిస్తానని మాట ఇచ్చారు. నేను ప్రత్యక్ష ఎన్నికల్లో పోటీ చేయను.. చేసినా గెలవను. నాకు ఎలక్షన్ మేనేజ్‌మెంట్ తెలియదు. జగన్ అంటే నాకు పిచ్చి.. జగన్ అంటే నాకు ఇష్టం.. ఆయనంటే నాకు ప్రాణం. జగన్ గారు గెలిచిన తరువాత కాదు.. అంతకు ముందు నుంచి కూడా నేను జగన్ గారిని ఇష్టపడుతున్నాను. నేను సినిమా వాడ్ని కాబట్టి.. సినిమాకి సంబంధించిన పదవి ఇచ్చారు. ఆంధ్రప్రదేశ్ ఫిల్మ్ అండ్ థియేటర్స్ డెవలప్‌మెంట్ కార్పొరేషన్ చైర్మన్‌ని చేశారు. ఈ పదవిని నేను ఈజీగా డీల్ చేస్తున్నా’ అంటూ చెప్పుకొచ్చారు పోసాని కృష్ణ మురళి.