నాలుగోసారి బోర్డులో సభ్యత్వం దక్కించుకున్న చెన్నైలో ఆడిటర్‌ కృష్ణమూర్తి

ఆంధ్రప్రదేశ్ ముఖ్యమంత్రిగా చంద్రబాబు నాయుడు ఉండొచ్చు లేదా వైఎస్ జగన్ మోహన్ రెడ్డి ఉండొచ్చు లేదా మరొకరు సీఎం కావచ్చు. ఏపీకి ముఖ్యమంత్రులు మారతారేమో గానీ.. టీటీడీ పాలక మండలి లో మాత్రం ఆయన సభ్యుడిగా ఉండాల్సిందే. ఇంతకూ ఆయన ఎవరు..? ఈ మాట ఎందుకు అంటున్నామో తెలుసుకోవాలని ఉందా..? చెన్నైకి చెందిన కృష్ణమూర్తి వైద్యనాథన్‌ వృత్తి రీత్యా ఆడిటర్. గత 8 ఏళ్లలో ఆరేళ్లు ఆయన టీటీడీ బోర్డు సభ్యుడిగా ఉన్నారు. ఇప్పుడు కూడా జగన్ సర్కారు టీటీడీ బోర్డు సభ్యుడిగా నియమించింది.

చంద్రబాబు నాయుడు ఏపీ సీఎంగా ఉన్నప్పుడు 2015లో తొలిసారిగా కృష్ణమూర్తి వైద్యనాథన్‌‌కు టీటీడీ పాలక మండలిలో సభ్యత్వం లభించింది. ఆ ఏడాది ఏప్రిల్ 27న ఆయన తొలిసారి టీటీడీ బోర్డు సభ్యుడిగా నియమితులయ్యారు. ఆ తర్వాత 2018లో ఆయనకు బోర్డులో చోటు దక్కలేదు. కానీ 2019లో జగన్ సర్కారు అధికారంలోకి వచ్చాక.. అదే ఏడాది సెప్టెంబర్లో కృష్ణమూర్తి వైద్యనాథన్‌‌కు అవకాశం దక్కింది. 2021లో కృష్ణమూర్తి వైద్యనాథన్‌కు టీటీడీ బోర్డులో చోటు దక్కలేదు. కానీ బోర్డులో సభ్యురాలిగా ఉన్న వేమిరెడ్డి ప్రశాంతి కొద్ది రోజులకే రాజీనామా చేశారు. ఆమెను ఢిల్లీ స్థానిక సలహా మండలి చైర్మన్‌గా నియమించి.. ఉత్తర భారతదేశంలోని టీటీడీ ఆలయాల బాధ్యతను అప్పగించారు. దీంతో వేమిరెడ్డి ప్రశాంతి స్థానంలో కృష్ణమూర్తి వైద్యనాథన్‌కు అవకాశం కల్పించారు. కృష్ణమూర్తి కోసం ప్రశాంతితో రాజీనామా చేయించారనే ప్రచారం జరిగింది. తాజాగా మరోసారి కూడా జగన్ సర్కారు కృష్ణమూర్తి వైద్యనాథన్‌ను టీటీడీ బోర్డులోకి తీసుకుంది. దీంతో ఏపీ సీఎంగా ఎవరున్నా.. ఈయన మాత్రం టీటీడీ పాలక మండలిలో ఉండటం ఖాయమనే ప్రచారం జరుగుతోంది. చంద్రబాబు హయాంలో కేంద్రంలో ఓ మహిళా మంత్రి సిఫార్సుతో కృష్ణమూర్తి వైద్యనాథన్‌ను టీటీడీలోకి తీసుకున్నారని టాక్. కేంద్రంలోని ఓ కీలక మంత్రి సిఫార్సుతో టీటీడీలో సభ్యుడిగా ఆయనకు నాలుగోసారి అవకాశం వచ్చిందని ప్రచారం జరుగుతోంది.

వాస్తవానికి టీటీడీ పాలకమండలికి బోలెడంత డిమాండ్ ఉంది. ఒక్కసారైనా సరే టీటీడీ బోర్డులో సభ్యుడిగా ఉండాలని రాజకీయ నేతల నుంచి కేంద్రంలో చక్రం తిప్పగలిగే వీవీఐపీల వరకు చాలా మంది భావిస్తుంటారు. చాలా మంది కేంద్రంలో ఉన్నత స్థానంలో ఉన్న వ్యక్తులతో సిఫార్సు చేయిస్తుంటారు. దీంతో ఏపీతోపాటు తెలంగాణ, తమిళనాడు, కర్ణాటక, మహారాష్ట్రకు చెందిన వారికి సైతం టీటీడీ బోర్డులో సభ్యత్వం కల్పించాల్సి వస్తోంది. కేబినెట్ కూర్పు కంటే.. టీటీడీ బోర్డు సభ్యుల ఎంపికే క్లిష్టంగా మారిందని గతంలో సీఎం జగన్ వ్యాఖ్యానించారు. దీన్ని బట్టి టీటీడీ బోర్డులో సభ్యత్వం కోసం ఎంత లాబీయింగ్ ఉంటుందో అర్థం చేసుకోవచ్చు. అయినా సరే వైద్యనాథన్ నాలుగోసారి టీటీడీ సభ్యుడిగా నియమితులు కావడాన్ని బట్టి ఆయన్ను ఎంతటి బలమైన వ్యక్తి సిఫార్సు చేశారో అర్థం చేసుకోవచ్చు.

2019లో తన అత్తమామాల షష్టిపూర్తి సందర్భంగా కృష్ణమూర్తి 60 మంది రుత్వికులతో తిరుపతిలోని కపిల తీర్థం ఆలయంలో ప్రైవేట్‌గా రుద్ర జప హోం జరిపించారు. హోం జరిగే ప్రదేశానికి వెళ్లేందుకు వైద్యనాథన్ కుటుంబానికి మినహా మరెవరికీ అనుమతి ఇవ్వలేదు. కాగా లోక కళ్యాణం కోసం ఈ హోం జరిపించానని కృష్ణమూర్తి చెప్పారు.

టీటీడీ సభ్యులు వీరే..

24 మంది సభ్యులతో ఇటీవలే టీటీడీ పాలకమండలిని ప్రకటించారు. తెలంగాణ నుంచి చేవెళ్ల ఎంపీ రంజిత్ రెడ్డి సతీమణి గడ్డం సీతారెడ్డికి ఈసారి అవకాశం లభించింది. ఏపీ నుంచి ఎమ్మెల్యేలు పొన్నాడ వెంకట సతీశ్‌కుమార్‌, సామినేని ఉదయభాను, ఎం. తిప్పేస్వామిలతోపాటు.. సిద్ధవటం యానాదయ్య, చండీ అశ్వర్థ నాయక్‌, పి.శరత్‌ చంద్రారెడ్డి, మేక శేషుబాబు, ఆర్‌.వెంకట సుబ్బారెడ్డి, ఎల్లారెడ్డి గారి సీతారామరెడ్డి, గడిరాజు వెంకట సుబ్బారాజు, రాంరెడ్డి సాముల, ఎస్‌.ఆర్‌. విశ్వనాథ్‌రెడ్డి, సిద్ద వీర వెంకట సుధీర్‌కుమార్‌, సుదర్శన్‌ వేణు, నెరుసు నాగసత్యంకు టీటీడీ బోర్డు సభ్యులుగా అవకాశం లభించింది. తమిళనాడు, కర్ణాటక, మహారాష్ట్ర నుంచి బాల సుబ్రమణియన్‌ పళనిసామి, డాక్టర్‌ ఎస్. శంకర్‌, కృష్ణమూర్తి వైద్యనాథన్‌, ఆర్వీ దేశ్‌పాండే, అమోల్‌ కాలే, మిలింద్‌ కేశవ్‌ నర్వేకర్‌, డాక్టర్‌ కేతన్‌ దేశాయ్‌, బోరా సౌరభ్‌లను టీటీడీ సభ్యులుగా నియమిస్తూ ఏపీ ప్రభుత్వం ఉత్తర్వులిచ్చింది.