ఆటోలో నుంచి ఏడుపు రావడంతో ,,,,సంచిలో పసికందును చూసి డ్రైవర్ అవాక్కు
Andhra Pradesh Telugu | Suryaa Desk | Published : Tue, Aug 29, 2023, 06:31 PM
ఎన్టీఆర్ జిల్లా కొండపల్లిలో అమానవీయ ఘటన బయటపడింది. రోజులు కూడా గడవని ఒక పసికందు.. ఓ వృద్ధుని సంచిలో ప్రత్యక్షమైంది. అతడిని ఆరా తీస్తే అవాక్కయ్యే నిజాలు బయటికొచ్చాయి. విజయవాడలోని ఓ ప్రైవేట్ ఆసుపత్రిలో జంగారెడ్డిగూడెంకు చెందిన ఓ మహిళ ప్రసవించింది. ఆమెకు ఒకే కాన్పులో ఇద్దరు పిల్లలు జన్మించారు. అయితే అందులో ఓ బిడ్డకు ఆరోగ్యం బాగా లేదని డాక్టర్లు చెప్పారు. దీంతో ఆమెలోని అమ్మతనం చనిపోయింది.. ఎలాగైనా ఆరోగ్యం సరిగా లేని ఆ బిడ్డని వదిలించుకోవాలనుకున్నారు తల్లిదండ్రులు. నర్సు సహాయంతో ఆ ఐదురోజుల పసికందును ఓ వృద్ధుడికి అప్పగించారు. ఆ బిడ్డను వదిలించుకుని.. ఆరోగ్యంగా ఉన్న బిడ్డతో సంతోషంగా ఉందామనుకున్నారు ఆ జంట.
ఈ క్రమంలో దంపతులు అప్పగించిన పసికందును ఆ వృద్ధుడు ఎవరికి అనుమానం రాకుండా ఓ సంచిలో పెట్టుకున్నాడు. గుట్టుచప్పుడు కాకుండా తీసుకెళ్దామనుకున్నాడు. ఆ సంచితో సహా ఆటో ఎక్కాడు.. అయితే ఆ పెద్దాయన ఆందోళనగా కనిపించడంతో ఆటోడ్రైవర్కు అనుమానం వచ్చింది. ఇంతలోనే సంచిలోనుంచి బిడ్డ ఏడుపు మొదలైంది.. అంతే ఆటో ఆపి వృద్ధుడిని ప్రశ్నిస్తే.. పొంతన లేని సమాధానాలు వచ్చాయి. ఆటో డ్రైవర్ వెంటనే పోలీసు స్టేషనుకు తీసుకెళ్లి అప్పగించాడు. విచారణ చేపట్టిన పోలీసులు.. తల్లిదండ్రులే ఆ పసికందును ముసలాయనకు అప్పజెప్పారని తెలిసి ఆశ్చర్యపోయారు. ఈ వ్యవహారంపై పోలీసులు ఆరా తీస్తున్నారు.. ఆ బిడ్డ తల్లిదండ్రులు ఎవరో వివరాలు సేకరించే పనిలో ఉన్నారు.
|
|