తిరుమల నడక మార్గంలో చిరుత సంచారం,,,, బంధించే పనిలో అటవీశాఖ అధికారులు

తిరుమల అలిపిరి కాలినడక మార్గంలో లక్ష్మీనరసింహ ఆలయం దగ్గర చిరుత తిరుగుతున్న దృశ్యాలు ట్రాప్‌ కెమెరాల్లో నమోదయ్యాయి. ఇటీవల చిరుత దాడికి గురై మరణించిన చిన్నారి లక్షిత మృతదేహం లభ్యమైన ప్రాంతంలోనే చిరుత సంచరించినట్లు అధికారులు తెలిపారు. చిరుత సంచారం శ్రీవారి భక్తులను కలవరానికి గురిచేస్తోంది. ఈ చిరుతను కూడా పట్టుకునేందకు అటవీశాఖ అధికారులు ఆపరేషన్ ప్రారంభించారు. అలిపిరి నడకమార్గంలో చిరుతల సంచారం సంగతి తెలిసిందే. జూన్‌లో ఓ బాలుడిపై చిరుత దాడి చేయగా.. ఆస్పత్రిలో కోలుకున్నాడు.. కొద్ది రోజులకే ఓ చిరుత దొరికింది. ఆ తర్వాత ఆగస్టు 11న నెల్లూరు జిల్లా కోవూరుకు చెందిన చిన్నారి లక్షితను లక్ష్మీ నరసింహస్వామి ఆలయం దగ్గర చిరుత లాక్కెళ్లి చంపిన ఘటన కలకలంరేపింది. ఆ వెంటనే టీటీడీ అధికారులు, అటవీశాఖ ఆధ్వర్యంలో ట్రాప్ కెమెరాలు ఏర్పాటు చేశారు.. బోన్లు తీసుకొచ్చి జూన్ నుంచి ఇప్పటి వరకు నాలుగు చిరుతల్ని బంధించారు. వాటిని తిరుపతిలోని జూకు తరలించారు.

నాలుగు చిరుతల్ని బంధించడంతో ఇక చిరుతల బెడద తప్పిందని అధికారులు ఊపిరి పీల్చుకున్నారు. అయినా సరే ట్రాప్ కెమెరాలోను ఆ ప్రాంతాల్లోనే ఉంచారు. తాజాగా మరో చిరుత సంచారం కెమెరాల్లో రికార్డు కావడంతో అటవీశాఖ అధికారులు అప్రమత్తం అయ్యారు.. దానిని కూడా బంధించే పనిలో ఉన్నారు. అలాగే భక్తులు కూడా అప్రమత్తంగా ఉండాలని అటవీశాఖ సిబ్బంది సూచిస్తున్నారు. త్వరలోనే ఆ చిరుతను కూడా పట్టుకుంటామని ధీమాను వ్యక్తం చేస్తున్నారు. చిరుత మాత్రమే కాదు ఇటీవల ఓ ఎలుగుబంటి కూడా నడక మార్గాల్లో సంచరిస్తోంది.. దీంతో ఆ ఎలుగును పట్టుకునేందకు ప్రయత్నించారు.. కానీ అది తప్పించుకుని అటవీ ప్రాంతంలోకి వెళ్లిపోయింది.. దానిని కూడా పట్టుకునే పనిలో ఉన్నారు. అయితే గతంలోనే అటవీశాఖ అధికారులు నడక మార్గంలో ఐదు చిరుతలు సంచరిస్తున్నాయని అనుమానించారు.. ఇప్పుడు అదే నిజమైంది.

మరోవైపు చిరుతల సంచారంతో నడక మార్గంలో టీటీడీ అప్రమత్తం అయ్యింది. నడక దారి మార్గంలో కొన్ని నిబంధనల్ని అమలు చేస్తోంది. అలిపిరి నడక దారిలో ఉదయం ఆరు నుంచి మధ్యాహ్నం 2 వరకే 12 ఏళ్లలోపు పిల్లల్ని అనుమతిస్తారు. అలాగే రాత్రి 10 గంటల తర్వాత భక్తుల్ని మెట్ల మార్గంలో అనుమతించారు. అలాగే భక్తులు గుంపులు గుంపులుగా వెళ్లాలని సూచిస్తున్నారు. అడవి జంతువుల నుంచి రక్షణగా.. ముందస్తు జాగ్రత్తగా ఓ చేతి కర్రను కూడా టీటీడీ భక్తులకు అందజేస్తోంది. ఇటు నడక దారిలో ఉన్న షాపుల్లో కూరగాయల అమ్మకాలను కూడా ఆపేయాలని టీటీడీ సూచించింది. అయితే ఈ నెలలో తిరుమల శ్రీవారి బ్రహ్మోత్సవాలు ఉండటంతో.. చిరుత సంచారం భక్తుల్లో ఆందోళన కలగిస్తోంది.