మరోసారి అస్వస్థతకు గురైన సోనియాగాంధీ,,,,సర్ గంగారాం ఆస్పత్రికి తరలింపు

కాంగ్రెస్‌ అగ్రనేత, రాయ్‌బరేలీ ఎంపీ సోనియా గాంధీ స్వల్ప అస్వస్థతకు గురయ్యారు. ఛాతి ఇన్ఫెక్షన్ సమస్యలతో ఆమె ఆస్పత్రిలో చేరారు. శనివారం రాత్రి ఆమె ఢిల్లీలోని సర్ గంగారాం ఆస్పత్రికి వెళ్లారు. ఛాతి ఇన్ఫెక్షన్‌తోపాటు ఆమె జ్వరంతో కూడా బాధపడుతున్నట్లు తెలుస్తోంది. ప్రస్తుతం సోనియా గాంధీకి సర్‌ గంగారాం ఆస్పత్రి డాక్టర్లు చికిత్స అందిస్తున్నారు. ఇప్పుడు సోనియా గాంధీ పరిస్థితి నిలకడగా ఉందని వైద్యులు తెలిపారు. ప్రత్యేక వైద్యుల బృందం ఆమె ఆరోగ్య పరిస్థితిని నిరంతరం పర్యవేక్షిస్తున్నట్లు వెల్లడించారు.

76 ఏళ్ల సోనియా గాంధీ అస్వస్థతతో ఆస్పత్రిలో చేరడంతో సర్ గంగారాం ఆస్పత్రి వైద్యులు ఆమెకు అన్ని రకాల పరీక్షలు నిర్వహించారు. అయితే సోనియా గాంధీ ఆస్పత్రిలో చేరిన విషయాన్ని ధ్రువీకరించిన వైద్యులు.. రెగ్యులర్ చెకప్‌లో భాగంగానే చికిత్స జరుగుతున్నట్లు చెప్పారు. ఈ ఏడాది ఇప్పటివరకే ఆమె రెండు సార్లు అనారోగ్య సమస్యలతో ఆస్పత్రిలో చేరగా.. ఇది మూడోసారి కావడం గమనార్హం. ఈ ఏడాది జనవరి 12 వ తేదీన.. వైరల్ రెస్పటరీ ఇన్ఫెక్షన్ చికిత్స కోసం సోనియా గాంధీ.. సర్ గంగారామ్ ఆస్పత్రిలో చేరారు. అనంతరం చికిత్స తీసుకుని జనవరి 17 వ తేదీన డిశ్చార్జ్ అయి ఇంటికి వెళ్లారు. ఆ తర్వాత మార్చి 2 వ తేదీన జ్వరం కారణంగా అదే సర్ గంగారాం ఆస్పత్రిలో చేరారు. తాజాగా జ్వరం, ఛాతి సంబంధ సమస్యలతో ఆమె మరోసారి సర్ గంగారాం ఆస్పత్రి పాలయ్యారు.

ఇటీవల సోనియా గాంధీ కుటుంబం జమ్ము కశ్మీర్‌లో పర్యటించింది. ఆ సందర్భంగా శ్రీనగర్‌లోని నైజీన్‌ సరస్సులోని బోటులో సోనియా ప్రయాణించారు. రాహుల్‌ గాంధీ, ప్రియాంక గాంధీ, ఆమె భర్త రాబర్ట్‌ వాద్రా కూడా రెండు రోజుల పాటు శ్రీనగర్‌లో గడిపి అక్కడి నుంచి గుల్మార్గ్‌కు వెళ్లారు. అయితే ఇది కుటుంబ పర్యటన మాత్రమేనని.. రాజకీయాలకు ఎలాంటి సంబంధం లేదని కాంగ్రెస్ పార్టీ వర్గాలు తెలిపాయి. గత కొన్నేళ్లుగా శ్రీనగర్‌లోని ‘రైన్‌వారి’ ప్రాంతంలోని ఓ హోటల్‌లో రెండు రోజులు నిద్ర చేయడం గాంధీ కుటుంబానికి సెంటిమెంట్‌గా వస్తోంది. మరోవైపు.. ఇటీవల ఆగస్ట్ 31, సెప్టెంబర్ 1 వ తేదీల్లో ముంబైలో జరిగిన ఇండియా కూటమి మూడో సమావేశానికి కూడా సోనియా గాంధీ హజరయ్యారు. కేంద్రంలో అధికారంలో ఉన్న ప్రధాని మోదీని వచ్చే ఎన్నికల్లో గద్దె దించడమే లక్ష్యంగా ఏర్పడిన ఈ ఇండియా కూటమి.. వరుసగా సమావేశాలు నిర్వహిస్తోంది.