పెద్ద మనసుతో ఆలోచించిన తల్లిదండ్రులు,,,కూతురి అవయవాలు దానం

మనిషి మరణించాక దేహం మట్టిలో కలుస్తుంది.. అదే ఆ వ్యక్తి అవయవాలను అవసరమైన వారికి అమరిస్తే మరికొందరికి కొత్త జీవితం లభిస్తుంది. సరిగ్గా ఇలాగే ఓ యువతి కుటుంబ సభ్యులు పెద్ద మనసుతో ఆలోచించారు.. బ్రెయిన్ డెడ్ కావడంతో ఆస్పత్రిలో ఉన్న కూతురి కోరికను తీర్చాలని భావించిన తండ్రి వైద్యులను సంప్రదించగా.. ఏడుగురికి అవయవదానం చేశారు. తిరుపతి జిల్లా పిచ్చాటూరు మండలంలోని రామాపురం ఎస్సీకాలనీకి చెందిన సంపత్‌కుమార్‌, అమ్ములు దంపతులకు ముగ్గురు కుమార్తెలు, కుమారుడు. వీరిలో పెద్దకుమార్తె కీర్తి బీకామ్ చదివింది.. ఆమె చెన్నైలోని ఓ ప్రైవేటు సంస్థలో పని చేస్తోంది. ఆమెకు గత ఆదివారం పెళ్లి చూపులు జరిగాయి. అదే రోజు రాత్రి స్నేహితుల పెళ్లి తమిళనాడులోని కరిడిపుత్తూరులో జరుగుతుండటంతో సమీప సోదరుడితో కలిసి బైక్‌పై వెళ్లి వస్తూ ప్రమాదానికి గురై స్పృహ తప్పింది. చెన్నైలోని ప్రభుత్వ మెడికల్ కాలేజీ చేర్పించగా బ్రెయిన్‌డెడ్‌కు గురైనట్లు వైద్యులు నిర్ధారించారు.

సోమవారం మెడికల్ కాలేజీకి వెళ్లిన యువతి తల్లిదండ్రులు తమ కుమార్తె పరిస్థితిని చూసి చలించిపోయారు. గతంలో మాటల సందర్భంలో తాను చనిపోయినా తన అవయవాలు దానం చేయాలన్న ఆశ ఉందని కీర్తి చెప్పిన మాటల్ని గుర్తు చేసుకున్నారు తండ్రి సంపత్‌కుమార్‌.. వెంటనే డాక్టర్లను సంప్రదించారు. కుమార్తె అవయవాలను పేద రోగులకు దానం చేయాలని విన్నవించారు. వైద్యులు ఆయనను అభినందించి కీర్తి అవయవాలను ఏడుగురు రోగులకు అందించారు.

కీర్తి కుటుంబ సభ్యులు చేసిన దానాన్ని జీహెచ్‌ డీన్‌ ప్రశంసించడంతో పాటు వాక్‌ ఆన్‌ ఆనర్‌ నిర్వహించారు. బుధవారం స్వగ్రామమైన రామాపురం దళితవాడలో కీర్తికి అంత్యక్రియలు నిర్వహించారు. కూతుర్ని తలచుకుని తల్లిదండ్రులు సంపత్‌కుమార్‌, అమ్ములు దంపతులు కన్నీటిపర్యంతం అయ్యారు. యువతికి పెళ్లి చేయటానికి సిద్ధమవుతున్న సమయంలో ఇలా చనిపోవడం తీవ్ర విషాదాన్ని మిగిల్చింది. గ్రామంలో విషాదఛాయలు అలముకున్నాయి. యువతి కుటుంబాన్ని స్థానిక ఎమ్మెల్యే కోనేటి ఆదిమూలం ఓదార్చారు. ప్రభుత్వ పరంగా కీర్తి కుటుంబ సభ్యులను ఆర్థికంగా ఆదుకుంటామన్నారు.