అక్షర్‌‌ధామ్ ఆలయంలో రిషి సునక్ దంపతుల ప్రత్యేక పూజలు

జీ20 సదస్సులో పాల్గొనడం కోసం భారత్ వచ్చిన యూకే ప్రధాని రిషి సునక్, అక్షతా మూర్తి దంపతులు ఆదివారం ఉదయం ఢిల్లీలోని అక్షర్ ధామ్ ఆలయాన్ని సందర్శించారు. జీ20 సమ్మిట్ బిజీ షెడ్యూల్ నుంచి కాసేపు బయటకొచ్చిన రిషి.. తన భార్యతో కలిసి అక్షర్‌ధామ్ ఆలయానికి వెళ్లి పూజలు చేశారు. జీ20 సమ్మిట్ రెండో రోజు సదస్సు ప్రారంభం కావడానికి ముందు రిషి సునక్ కాన్వాయ్ ఆలయానికి చేరుకుంది. యూకే ప్రధాని ఆలయాన్ని సందర్శించడానికి ముందే అక్కడ కట్టుదిట్టమైన భద్రతా ఏర్పాట్లు చేశారు. అక్షర్‌ధామ్‌లో రిషి, అక్షతా దంపతులు పూజ చేసి హారతి ఇచ్చారు. యూకే ప్రధానికి ఆలయ నమూనాను బహుమతిగా ఇచ్చారు.

తాను హిందువనని చెప్పుకోవడానికి గర్విస్తానంటూ భారత్ వచ్చే ముందే వ్యాఖ్యానించిన రిషి.. ఇండియాకు వచ్చాక ఆలయాన్ని సందర్శించి పూజలు చేయడం ప్రాధాన్యం సంతరించుకుంది. ప్రధాని మోదీ అంటే తనకు అమితమైన గౌరవం ఉందన్న రిషి సునక్.. జీ20 సదస్సు ఘన విజయం సాధించడానికి ఆయనకు మద్దతునిస్తానన్నారు. తాను ఈ ఏడాది జన్మాష్టమి వేడుకలు జరుపుకోలేకపోవడం పట్ల రిషి సునక్ బాధను వ్యక్తం చేశారు. భారత్ వచ్చాక ఆలయాన్ని సందర్శిస్తానని ఆయన ముందే చెప్పారు. తాను హిందువునైనందుకు గర్విస్తానన్న రిషి సునక్.. తనను తల్లిదండ్రులు అలా పెంచారన్నారు. మత విశ్వాసాలు ఎంతో ముఖ్యమన్న ఆయన.. ఒత్తిడి నుంచి అధిగమించడానికి సరిపడా బలాన్ని దేవుడి పట్ల నమ్మకం ఇస్తుందన్నారు.

ఆలయ సందర్శన అనంతరం రిషి సునక్ రాజ్‌ఘాట్ వెళ్లారు. జీ20 దేశాల అధినేతలతో కలిసి ఆయన మహ్మాతా గాంధీ సమాధి వద్ద నివాళులు అర్పించారు. గత ఏడాది అక్టోబర్లో యూకే ప్రధానిగా రిషి సునక్ బాధ్యతలు చేపట్టారు. ప్రధాని హోదాలో ఆయన భారత్‌లో పర్యటిస్తుండటం ఇదే తొలిసారి. జీ20 సదస్సు కోసం శుక్రవారం ఆయన సతీసమేతంగా ఢిల్లీ వచ్చారు.