భారత్ వాంటెడ్ క్రిమినల్స్‌కు అడ్డగా కెనడా

ఖలీస్థానీ వేర్పాటువాదులు, సానుభూతిపరులకు ఆశ్రయం కల్పిస్తోన్న కెనడా.. నేరస్థులకు స్వర్గంగా మారిపోయింది. కేవలం ఖలీస్థానీ ఉగ్రవాదులే కాదు.. భారత్‌‌కు చెందిన కరుడగట్టిన పలువురు గ్యాంగస్టర్లు, నేరగాళ్లకు అడ్డగా మారిపోయింది. సతీందర్‌జిత్ సింగ్ అలియాస్ గోల్డీ బ్రార్, అర్ష్‌దీప్ సింగ్ అలియాస్ అర్ష్ దల్లా, లఖ్బీర్ సింగ్ సంధు అలియాస్ లండా వంటి క్రిమినల్స్ కెనడా భూభాగం నుంచే భారత్‌ వ్యతిరేక కార్యకలాపాలను నిర్వహిస్తున్నారు. పంజాబ్ పోలీసుల అభ్యర్థనతో గోల్డీ బ్రార్, దల్లా సహా పలువురిపై ఇంటర్‌పోల్ రెడ్ కార్నర్ నోటీసు జారీచేసింది.

ఉగ్రవాద కార్యకలాపాలు, బెదిరింపుల వంటి పలు నేరాలకు పాల్పడుతోన్న లారెన్స్ బిష్ణోయ్ ముఠా సభ్యుడైన పంజాబ్‌లోని ముక్తార్ సాహిబ్‌కు చెందిన బ్రార్ 2017లో స్టూడెంట్ వీసాపై కెనడాకు వెళ్లాడు. గతేడాది పంజాబీ గాయకుడు, కాంగ్రెస్ నేత సిద్ధూ మూసేవాలా హత్య.. సిర్సా డేరా అనుచరుడు, బర్గారీ బలిదాన కేసు నిందితుడు ప్రసాద్ శర్మ హత్యల్లో ప్రధాన నిందితుడిగా ఉన్న బ్రార్‌పై గతేడాది జులై 9న ఇంటర్‌పోల్ రెడ్ కార్నర్ నోటీసులు జారీ అయ్యాయి.

ఇక, ఖలీస్థాన్ టైగర్స్ ఫ్రంట్ (కేటీఎఫ్) చీఫ్ హరదీప్ సింగ్ నిజ్జార్ అనుచరుడు, ఉగ్రవాదిగా మారిన గ్యాంగస్టర్ దల్లా స్వస్థలం పంజాబ్‌లోని మోగా. అక్కడ పలు ఉగ్రవాద కార్యకలాపాల్లో భాగస్వామిగా ఉన్నాడు. డల్లా, అతడి అనుచరులు పలు కుట్రలను పంజాబ్ పోలీసులు భగ్నం చేసి.. భారీ ఎత్తును పేలుడు పదార్థాలు, ఆయుధాలు స్వాధీనం చేసుకున్నారు. ఎన్ఐఏ సిఫార్సులతో దల్లాను కేంద్రం ఉగ్రవాదిగా ప్రకటించింది. ఇతడికి కూడా ఇంటర్‌పోల్ రెడ్ కార్నర్ నోటీసు జారీచేసింది.

తర్న్ తరన్ జిల్లాలోని హరికేకు చెందిన లండా తలపై ఈ ఏడాది ఫిబ్రవరిలో ఎన్ఐఏ రూ.15 లక్షల రివార్డు ప్రకటించింది. ప్రస్తుతం కెనడాలోని అల్బెర్టాలో ఎడ్మంటన్‌లో స్థిరపడ్డాడు. చట్ట వ్యతిరేక కార్యకలాపాల చట్టం (ఉపా) కిందట లండాపై కేసు నమోదయ్యింది. గతేడాది మే 9న పంజాబ్ పోలీస్ ఇంటెలిజెన్స్ ప్రధాన కార్యాలయంపై రాకెట్ అధారిత గ్రనేడ్ దాడికి పాల్పడిన కేసులో లండా ప్రధాన నిందితుడిగా ఉన్నాడు. పంజాబ్ పోలీసుల మోస్ట్ వాంటెడ్ జాబితాలో ఉన్న నేరస్థులు.. ఇంటర్‌పోల్ రెడ్ కార్నర్ నోటీసులు జారీ అయిన మల్కీత్ సింగ్ అలియాస్ ఫౌజీ సర్రేలోనూ.. గుర్జీందర్ సింగ్ పన్నూ హమిల్టన్‌లోనూ.. గురుప్రీత్ సింగ్, గుర్జీత్ సింగ్ చీమాలు ఒంటారియో ప్రావిన్సుల్లోని బ్రాంప్టన్‌లోనూ, తెహల్ సింగ్‌లు టొరంటాలోనే ఉన్నారు.