వావ్ బంపరాఫర్.. రూ.100 కే రూ. 6.5 కోట్ల ఇల్లు.. ఇళ్లు పొందేందుకు లబ్ధిదారులకు పలు షరతులు

సొంత ఇల్లు కట్టుకోవాలి లేదా కొనుక్కోవాలి అని ప్రతీ ఒక్కరికి ఉంటుంది. ముఖ్యంగా గ్రామాల నుంచి పట్టణాలకు వలస వెళ్లిన వారు ఆ ఇంటి అద్దె కట్టలేక సొంత ఇల్లు కొనుక్కోలేక తీవ్ర ఇబ్బందులు పడుతూ ఉంటారు. అయితే అక్కడ మాత్రం అత్యంత ఖరీదైన ఇళ్లను అతి తక్కువ ధరకే అందిస్తున్నారు. భూములు, ఇళ్ల ధరలు రోజురోజుకూ పెరుగుతున్నప్పటికీ అంత తక్కువ ధరకు ఇళ్లు ఇవ్వడం ఒక రకంగా ఆశ్చర్యం కలిగించేదే. గ్రామాలు, పట్టణాలు, నగరాలు ఇలా తేడా లేకుండా మారుమూల ప్రాంతాల్లో ఉన్నా ఇప్పుడు భూములు గానీ, ఇళ్లు గానీ లక్షలు, కోట్లు పలుకుతున్నాయి. ఈ క్రమంలోనే రూ.6.6 కోట్ల విలువైన ఇళ్లను కేవలం రూ.100 కే అందిస్తున్నారు అంటే నమ్మడానికే ఆశ్చర్యం వేస్తుంది. కానీ బ్రిటన్‌లోని ఓ నగరంలో ఈ ఇళ్లను విక్రయిస్తున్నారు. అయితే వీటికి కొన్ని అర్హతలు, షరతులు పెడుతున్నారు.

బ్రిటన్‌లోని లూయీ సిటీలోని కార్నిష్ టౌన్ సెంటర్‌లో నివసించే వారికి ఇంత తక్కువకే ఇళ్లు లభిస్తున్నాయి. 6,40,000 పౌండ్లు అంటే భారత కరెన్సీలో రూ.6.6 కోట్ల విలువైన గ్రేడ్ 2 లిస్టెడ్ ఫ్లాట్‌లను కేవలం ఒక పౌండ్‌ అంటే భారత కరెన్సీలో రూ.103 కే అందించేందుకు సిద్ధమయ్యారు. ఈ ఇళ్లను విక్రయించడానికి స్థానిక కౌన్సిల్ అంగీకారం తెలిపింది. 11 కోస్ట్‌గార్డ్ ఫ్లాట్‌లను త్రీ సీస్ కమ్యూనిటీ ల్యాండ్ ట్రస్ట్‌కు విడుదల చేయాలన్న సిఫార్సును కార్న్‌వాల్ కౌన్సిల్ కేబినెట్ ఆమోదించింది. అంతేకాకుండా గ్రాంట్ ఫండింగ్ ద్వారా 1 మిలియన్‌ పౌండ్లు అంటే భారత కరెన్సీలో రూ.10 కోట్లతో పునరుద్ధరణ పనులను చేపట్టడానికి ముందుకొచ్చింది.

అయితే ఈ ఫ్లాట్‌లను బహిరంగ మార్కెట్‌లో విక్రయించడం లేదని డిప్యూటీ కౌన్సిల్ లీడర్ డేవిడ్ హారిస్ తెలిపారు. అయితే ఇప్పటికే లూయి నగరంలో సెకండ్ హ్యాండ్ ఇళ్లు, హాలిడే స్పాట్‌లు అధికంగా ఉన్నాయని.. అలాంటి పరిస్థితుల్లో ఇళ్లు తక్కువ ధరకు దొరకడం చాలా కష్టమని వెల్లడించారు. ఈ క్రమంలోనే సామాన్యులు, పేదలు ఇళ్లు కొనుక్కునే సదుపాయం లేకుండా పోయిందని అందుకే ఈ నిర్ణయం తీసుకున్నట్లు పేర్కొన్నారు. కమ్యూనిటీ హౌస్‌ డెవలప్‌మెంట్ పథకం కింద ఈ ఫ్లాట్‌లను కేవలం పేదలకు మాత్రమే అందించేలా ఏర్పాట్లు చేస్తున్నట్లు వివరించారు. అయితే అత్యధికంగా హాలిడే హోమ్‌లు ఉండే ఇంగ్లాండ్‌లో సెకండ్ హోమ్‌లు, హాలిడే హోమ్‌ల సమస్య కార్న్‌వాల్‌ నగరంలో మరీ ఎక్కువగా ఉంటుంది. 2021లో ఈ ప్రాంతంలో 13 వేల సెకండ్ హోమ్‌లు ఉన్నట్లు కార్న్‌వాల్ లైవ్ వెల్లడించింది.

2021లో లూయి కౌన్సిల్ చేపట్టిన నార్త్ రోడ్ భవనం పునర్నిర్మాణం ఆర్థికంగా తీవ్ర ఖర్చుతో కూడుకుందని తెలిపారు. అలాంటి అధిక నిర్వహణ ఖర్చులను నివారించేందుకు ఫ్లాట్లను విక్రయిస్తున్నట్లు వెల్లడించారు. లూయి కౌన్సిలర్లు ఎడ్వినా హన్నాఫోర్డ్, అర్మాండ్ టామ్స్ మద్దతుతో త్రీ సీస్ కమ్యూనిటీ ల్యాండ్ ట్రస్ట్ అనే సంస్థ రూ.10 కోట్ల కంటే ఎక్కువ ఖర్చుతో ఆస్తుల ఈ ఇళ్లను కట్టేందుకు ముందుకు వచ్చినట్లు అధికారులు వెల్లడించారు. అచ్చం ఇలాంటి పథకాన్నే 2015 లో స్టోక్ ఆన్ ట్రెంట్ కౌన్సిల్ కూడా అమలు చేసిందని తెలిపారు. అయితే ఈ ఇళ్లను పొందేవారు కనీసం ఐదేళ్ల పాటు అందులో ఉండటానికి ముందుగానే అంగీకర పత్రం సమర్పించాలని షరతు పెట్టారు. లబ్ధిదారులు ఏదైనా ఉద్యోగం చేస్తూ ఉండాలని.. కుటుంబ ఆదాయం 18 వేల పౌండ్ల నుంచి 25 వేల పౌండ్ల మధ్య ఉండాలని సూచించారు. కొత్త పథకం పోర్ట్‌ల్యాండ్ స్ట్రీట్ ప్రాంతంలో ఉంటుందా లేక నగరంలోని మారుమూల ప్రాంతంలో ఉంటుందా అనేది ఇంకా నిర్ణయించలేదని హౌసింగ్‌ కేబినెట్‌ సభ్యుడు స్థానిక కౌన్సిలర్‌ రాండీ కాంటే చెప్పారు.