నన్ను ఏసీబీ కోర్టు జడ్జి అనుకుని దూషిస్తున్నారు.. సీఐడీకి వైసీపీ నేత ప్రియదర్శిని ఫిర్యాదు
Andhra Pradesh Telugu | Suryaa Desk | Published : Sat, Sep 30, 2023, 07:21 PM
చంద్రబాబు అరెస్ట్, రిమాండ్ తర్వాత విజయవాడ ఏసీబీ కోర్టు జడ్జి హిమబిందుపై కొందరు సోషల్ మీడియాలో ట్రోల్ చేశారు. ఈ పోస్టులపై ఓ లాయర్ రాష్ట్రపతి భవన్‌కు ఫిర్యాదు చేయడంతో ప్రభుత్వం హైకోర్టులో క్రిమినల్ కంటెంప్ట్ పిటిషన్ దాఖలు చేసింది. ఏజీ 26మందికి సంబంధించిన జాబితాను కోర్టు ముందు ఉంచారు.. వీరి సోషల్ మీడియా అకౌంట్‌లు పరిశీలించి నోటీసులు ఇవ్వాలని హైకోర్టు ఆదేశించింది. అయితే ఈ ఎపిసోడ్‌లో మరో ట్విస్ట్ తెరపైకి వచ్చింది.
తనను ఏసీబీ కోర్టు జడ్జి అనుకుని దూషిస్తున్నారంటూ వైఎస్సార్‌సీపీకి చెందిన ఇందిరా ప్రియదర్శిని (హిమబిందు రెడ్డి) సీఐడీకి ఫిర్యాదు చేశారు. తన సోషల్ మీడియా వీడియోలను ఏసీబీ కోర్టు జడ్జిగా పేర్కొంటూ దూషిస్తున్నారని ప్రస్తావించారు. తన ఫేస్‌బుక్, ఇన్‌స్టాలో యూజర్ నేమ్‌లు హిమబిందురెడ్డి అని ఉండటంతో.. తనను ఏసీబీ జడ్జి అని పేర్కొంటూ సోషల్ మీడియాలో అసభ్యకర కామెంట్స్‌తో దూషిస్తున్నారన్నారు. ఆమె ఫిర్యాదుపై స్పందించిన సీఐడీ అధికారులు.. 509, 153(ఏ), 505(2), రెడ్ విత్ 120 బీ కింద ఈ నెల 15న కేసు నమోదు చేశారు. చంద్రబాబును అరెస్ట్ చేసి రిమాండ్‌కు పంపిన సమయంలో వైఎస్సార్‌సీపీకి చెందిన మహిళా నేత హిమబిందు రెడ్డిని జడ్జిగా భావించారు. అయితే ఈమె పేరు హిమబిందు, జడ్జి పేరు కూడా హిమబిందు కావడంతో కొందరు వైఎస్సార్‌సీపీ మహిళా నేతను టార్గెట్ చేశారు. ఆమె కేక్ కట్ చేస్తున్న వీడియోను షేర్ చేసి జడ్జిగా ప్రస్తావించారు. దీంతో ఆమె సీఐడీకి ఫిర్యాదు చేశారు.
|
|