కారుపైకి ఎక్కి రోడ్లపై నోట్ల వర్షం కురిపించిన వ్యక్తి.... సోషల్ మీడియాలో వైరల్ అవుతున్న వీడియోలు

అది రద్దీగా ఉన్న రోడ్డు. వాహనాలు, రోడ్లపై వెళ్లేవారు వెళ్తూ ఉన్నారు. సడెన్‌గా అక్కడికి ఓ వ్యక్తి వచ్చాడు. చూడటానికి చాలా వింతగా ఒక రకమైన డ్రెస్ వేసుకుని కనిపించాడు. అచ్చం మనీ హెయిస్ట్ వెబ్ సిరీస్‌లో యాక్టర్లు ధరించే కాస్ట్యూమ్‌ వేసుకున్నాడు. దీంతో అందరూ అతడ్ని ఒక వింత లాగా చూశారు. వెంటనే కారు పైకి ఎక్కిన ఆ వ్యక్తి తన భుజానికి ఉన్న బ్యాగును తీసి అందులో ఉన్న డబ్బుల కట్టలను తీసి నోట్లను రోడ్డుపై విసిరేశాడు. అది చూసిన వాహనదారులు, అక్కడ ఉన్న స్థానికులు.. ఆ వ్యక్తి విసిరేసిన నోట్లను ఏరుకునేందుకు ఎగబడ్డారు. దీంతో రద్దీగా ఉండే ప్రాంతంలో భారీగా జనం గుమికూడటంతో అక్కడ ఏం జరుగుతుందో తెలియక ఆ చుట్టు పక్కల ఉన్న వాళ్లంతా షాక్ అయ్యారు. ఈ సంఘటన రాజస్థాన్‌లో జరిగింది. ప్రస్తుతం దీనికి సంబంధించిన వీడియోలు సోషల్ మీడియాలో తెగ వైరల్ అవుతున్నాయి.

ఓ వ్యక్తి మనీ హెయిస్ట్ వెబ్‌సిరీస్‌లో లాగా ముఖానికి సాల్వడార్ డాలీ మాస్క్‌తో ఎరుపు రంగు జంప్‌సూట్‌ వేసుకున్న వ్యక్తి జైపూర్‌లో రద్దీగా ఉండే మార్కెట్‌కు వచ్చాడు. మాల్వియా నగర్‌ ప్రాంతతంలోని గౌరవ్ టవర్ మాల్ ముందు ఉన్న ఓ కారుపైకి ఎక్కాడు. తన వద్ద ఉన్న డబ్బుతో రోడ్డుపై నోట్ల కట్టల వర్షం కురిపించాడు. రూ.10, రూ.20 నోట్లను రోడ్డుపై చల్లుతూ ఆనందం వ్యక్తం చేశాడు. అయితే ఆ డబ్బులను చేజిక్కించుకునేందుకు స్థానికులు అక్కడ గుమిగూడటంతో బాగా ట్రాఫిక్ జామ్ ఏర్పడింది.

అయితే ఈ విషయం తెలుసుకున్న జైపూర్ పోలీసులు సంఘటనా స్థలానికి చేరుకున్నారు. ఆ మనీ హెయిస్ట్ వేషంలో ఉన్న వ్యక్తిని అరెస్ట్ చేశారు. అసలు ఆ వ్యక్తి ఎవరు. అన్ని డబ్బులు అతని వద్దకు ఎలా వచ్చాయి. వచ్చిన డబ్బును అలా గాలికి ఎందుకు విసిరేస్తున్నాడు అనే కోణంలో పోలీసులు దర్యాప్తు జరుపుతున్నారు. అక్కడ గుమికూడిన జనాన్ని తరలించి ఆ ప్రాంతంలో ట్రాఫిక్‌ను పునరుద్ధరించారు. అయితే ఈ ఘటనకు సంబంధించిన వీడియోలు ఇప్పుడు సోషల్ మీడియాలో చక్కర్లు కొడుతున్నాయి. దీంతో నెటిజన్లు భిన్నంగా స్పందిస్తున్నారు. మనీ హెయిస్ట్ వెబ్ సిరీస్‌ రాజస్థాన్‌లో ప్రత్యక్షంగా చూశామని కొందరు కామెంట్లు చేస్తున్నారు. మరికొందరు డబ్బులు ఎక్కువై పబ్లిసిటీ కోసం, సోషల్ మీడియాలో ఫేమస్ కావాలని చేసిన ఓ ప్రయత్నమని ట్వీట్లు చేస్తున్నారు. ఇక పిచ్చి పీక్స్ రా బాబు అంటూ మరికొందరు విమర్శలు చేస్తున్నారు. డబ్బులు గాల్లోకి వేసి హీరో అవుదాం అనుకుంటే పోలీసులు వచ్చి కమెడియన్ చేశారు అంటూ ఫన్నీగా స్పందిస్తున్నారు.