అనారోగ్యంతో ఆస్పత్రికి వెళ్లిన బాలుడికి సిరప్‌కు బదులు ఫినాయిల్ ఇచ్చిన నర్సు

జ్వరం, వాంతులతో ఆస్పత్రిలో చేరిన 11 నెలల బాలుడిని ఆస్పత్రి వర్గాల నిర్లక్ష్యం చంపేసింది. బాలుడికి విటమిన్ సిరప్‌ను డాక్టర్ సూచించగా.. అక్కడ ఉన్న నర్సు ఫినాయిల్ అందించడంతో బాలుడు నురగలు కక్కుకుని చనిపోయాడు. ఈ ఘటన ప్రస్తుతం తీవ్ర సంచలనంగా మారింది. సిరప్ ఇవ్వడానికి బదులు ఫినాయిల్ ఇవ్వడం ఏంటనే విమర్శలు వెల్లువెత్తుతున్నాయి. ఈ నేపథ్యంలోనే బాలుడి తల్లిదండ్రులు ఇచ్చిన ఫిర్యాదుతో రంగంలోకి దిగిన పోలీసులు.. ఈ ఘటనపై దర్యాప్తు జరుపుతున్నారు. ఆ బాలుడికి అందించిన సిరప్‌ను నిర్ధారించేందుకు ఫోరెన్సిక్ ల్యాబ్‌కు పంపించారు. ఈ విషాదం గుజరాత్‌లో చోటు చేసుకుంది.

గుజరాత్‌లోని అహ్మదాబాద్‌లో ఉన్న శారదాబెన్ హాస్పిటల్‌లో చికిత్స పొందుతున్న 11 నెలల బాలుడు చనిపోయాడు. తైమూర్ మియో అనే బాలుడి నోటి నుంచి నురగలు వచ్చాయి. దీంతో తీవ్ర ఆందోళన చెందిన అతని తల్లిదండ్రులు డాక్టర్‌ను సంప్రదించారు. వెంటనే వచ్చి బాలుడిని డాక్టర్ పరిశీలించగా.. అప్పటికే మృతి చెందినట్లు గుర్తించారు. అయితే బాలుడికి డాక్టర్ సూచించిన విటమిన్ సిరప్ కాకుండా ఫినాయిల్‌ను నర్సు అందించినట్లు బాలుడి తల్లిదండ్రులు తెలిపారు.

ఈ ఘటనపై బాలుడి తల్లిదండ్రులు షాహెర్‌కోట పోలీసులకు ఫిర్యాదును చేశారు. రంగంలోకి దిగిన పోలీసులు.. ఆస్పత్రిని సందర్శించి.. ఆ బాలుడికి అందించిన సిరప్‌ను ఫోరెన్సిక్ ల్యాబ్‌కు పంపించారు. అయితే బాధితులు చెప్పిన ప్రకారం.. బాలుడికి ఇచ్చిన సిరప్‌ ఫినాయిల్ అని తేలితే ఆస్పత్రి సిబ్బంది, డాక్టర్‌పై కేసు నమోదు చేస్తామని షాహెర్ కోట సీఐ ఎండీ చంద్రవడియా తెలిపారు.

శనివారం రోజున జ్వరం, వాంతులతో తైమూర్ మియా శారదాబెన్ ఆస్పత్రిలో చేరినట్లు పోలీసులు వెల్లడించారు. అయితే బాలుడిని పరీక్షించిన డాక్టర్లు.. సోమవారం ఉదయం తైమూర్‌కు విటమిన్ సిరప్ ఇవ్వాలని సూచించారు. అయితే ఆ విటమిన్ సిరప్‌కు బదులు.. బాలుడికి ఫినాయిల్‌ను అందించినట్లు బాధితులు ఆరోపిస్తున్నారు. బాలుడికి రోజుకు 3 సార్లు 5 మిల్లీ లీటర్ల సిరప్ అందించాలని డాక్టర్లు సూచించినట్లు తైమూర్ తల్లి ఫైజాన్‌బాను తెలిపారు. అయితే మొదటి డోస్ ఇచ్చిన వెంటనే తైమూర్ నోటి నుంచి నురగ రావడం ప్రారంభమైందని.. దీంతో డాక్టర్‌ను పిలవగా.. అప్పటికే చనిపోయినట్లు వెల్లడించారు.