బంగారం దుకాణానికి కోటి రూపాయల కరెంట్ బిల్లు,,,శ్రీకాకుళం జిల్లా కొత్తూరులో ఘటన

కరెంట్ బిల్లు.. ఏ వెయ్యో, రెండు వేలో వస్తేనే గుండె గుభేల్‌మంటుంది. అలాంటిది ఏకంగా కోటి రూపాయల బిల్లు వచ్చింది. శ్రీకాకుళం జిల్లా కొత్తూరు మండలంలో ఈ ఘటన చోటు చేసుకుంది. కరెంటు బిల్లు మీద అంకెలు చూసి ఖంగుతిన్నాడు. కొత్తూరు మండలానికి చెందిన అశోక్.. నగల షాపు (దుర్గా జువెల్లర్స్, గుడ్ల పెంటయ్య గారి బంగారు షాపు) నిర్వహిస్తున్నారు. ఆ షాప్‌కు ప్రతి నెలా నాలుగు వేల నుంచి ఐదు వేల రూపాయల వరకు కరెంట్ బిల్లు వచ్చేది. విద్యుత్ సిబ్బంది ఎప్పట్లాగే ఇటీవల సెప్టెంబర్ నెలకు సంబంధించిన కరెంట్ బిల్లు అందజేసి వెళ్లారు. అయితే, బిల్లు చూడగానే అశోక్‌కు కళ్లు తిరిగినంత పనైంది.

కరెంట్ బిల్లు చూసి కంగారుపడ్డ అశోక్.. వెంటనే విద్యుత్ శాఖ అధికారులను సంప్రదించారు. కోటి రూపాయల బిల్లు ఏంటని ప్రశ్నించారు. విచారణ చేపట్టిన అధికారులు పొరపాటు జరిగిందని అంగీకరించారు. సాంకేతిక సమస్య కారణంగా బిల్లు అలా వచ్చిందని అశోక్‌కు వివరించారు. అనంతరం సరిచేసిన కరెంట్ బిల్లును ఆయనకు అందజేశారు. విద్యుత్ శాఖ సిబ్బంది తమ తప్పును సరిదిద్దుకోవడంతో ఈ సమస్యకు ముగింపు పడింది. అయితే, కరెంట్ బిల్లు మాత్రం సోషల్ మీడియాలో వైరల్ అవుతోంది. బిల్లు మొత్తం కట్టమంటే పరిస్థితి ఏంటి? అంటూ కొంత మంది సరదాగా వ్యాఖ్యలు చేస్తున్నారు. మరికొంత మంది లాజిక్ లేవనెత్తారు. బిల్లు కోటి రూపాయలు వచ్చింది కాబట్టి అనుమానం వచ్చి ప్రశ్నించారు గానీ.. ఏ ఐదు వేల బిల్లు 6 వేలు వచ్చుంటే, అలాంటి అనుమానమే రాదుగా..! అంటున్నారు. నిజమే మరి.. కరెంట్ బిల్లు చెల్లించే ముందు జాగ్రత్తగా చెక్ చేసుకోవాలి.