సూపర్ నోవా మ్యూజిక్ ఫెస్టివల్‌పై హమాస్ దాడులు,,,,ఇజ్రాయేల్ చరిత్రలో అత్యంత దారుణ ఘటన

అప్పటి వరకు ఉల్లాసంగా సాగుతున్న ఓ మ్యూజిక్‌ ఫెస్టివల్‌పై ఆకాశం నుంచి రాకెట్ల వర్షం మొదలైంది. అయితే, సంగీతాన్ని ఆస్వాదిస్తున్న వారంతా ఆ ప్రమాదాన్ని గుర్తించలేకపోయారు. ఇదే సమయంలో డజన్ల కొద్దీ సాయుధ ముష్కరులు లోపలికి ప్రవేశించి విచక్షణరహితంగా కాల్పులు జరిపారు. దీంతో అక్కడి వారంతా ప్రాణాలను అరచేతుల్లో పెట్టుకుని పరుగులు తీశారు. కానీ, నిష్క్రమణ ద్వారం ఇరుకుగా ఉండటంతో సాయుధ ఉగ్రవాదులకు చిక్కి పదుల సంఖ్యలో ప్రాణాలు కోల్పోయారు. అత్యవసర ద్వారాల వద్ద కూడా కాపుకాసిన ఉగ్రవాదులు కాల్చి చంపారు. హమాస్‌ మిలిటెంట్ల దాడుల్లో మొత్తం 700 మంది ఇజ్రాయెలీలు ప్రాణాలు కోల్పోగా.. . ఈ ఒక్క మ్యూజిక్‌ ఫెస్టివల్‌ ప్రాంగణంలోనే ఇప్పటి వరకు 260 మృతదేహాలను గుర్తించారు. ఈజిప్టు నుంచి యూదుల వలస వచ్చిన రోజున స్మరించుకునే పండుగ సుక్కోట్‌తో పాటు దక్షిణ ఇజ్రాయేల్‌లోని ఎడారిలో నిర్వహించే సూపర్‌నోవా ఉత్సవం కోసం వారాల తరబడి ఉత్సాహంగా ఎదురుచూసిన సంగీత ప్రియులు.. ముష్కరుల ఊచకోతకు బలయ్యారు. సుక్కోట్‌తో సూపర్‌నోవా కలిసి రావడం వల్ల వరుసగా ఏడు రోజుల పాటు సెలవులు వచ్చాయి.

ఈ సందర్భంగా ఇజ్రాయెల్‌-గాజా సరిహద్దు సమీపంలో నెగెవ్‌ ఎడారిలో కిబ్బట్జ్‌ రీమ్‌ సమీపంలోని ఓ విశాల ప్రాంగణంలో ‘ట్రైబ్‌ ఆఫ్‌ నోవా’ కంపెనీ ‘ది సూపర్‌ నోవా’ పేరిట మ్యూజిక్‌ ఫెస్టివల్‌ను నిర్వహించింది. ఈ వేడుకకు దాదాపు 3,000 మంది హాజరైనట్లు స్థానిక మీడియా వెల్లడించింది. శనివారం ఉదయం సంగీత కచేరీ జోరుగా సాగుతున్న సమయంలో హమాస్ రాకెట్ల దాడి మొదలైంది. కానీ, ఆ హోరులో వారికి ఏమీ వినిపించకపోగా.. అంతలోనే ఒక్కసారిగా ఎయిర్‌ డిఫెన్స్‌ సైరన్లు మోత మోగాయి. దీంతో ఏదో జరిగిందని అలజడి మొదలుకాగా... ఆ తర్వాత విద్యుత్తు సరఫరా నిలిచిపోయింది. కొద్ది సేపటికే 50 మందికిపైగా సాయుధ ముష్కరులు వాహనాల్లో వచ్చి.. మ్యూజిక్ ఫెస్ట్‌ ప్రాంగణంలోకి చొరబడి విచక్షణారహితంగా కాల్పులకు జరిపారు. గుళ్ల వర్షం కురిపించడంతో తప్పించుకునే వీల్లేక నిస్సాహయ స్థితిలో ప్రజలు ఆగిపోయారు. వాహనాల్లో ఎక్కి తప్పించుకొనేందుకు యత్నించినా.. అవి మొరాయించడంతో కొందరు ప్రాణాలు కాపాడుకోడానికి అక్కడ నుంచి పరుగులు పెట్టారు.

వేడుక హాజరై ప్రాణాలతో బయటపడిన ఏస్తర్‌ బ్రోచోవ్‌ అనే మహిళ కాల్పులు మొదలు కాగానే కారులో పారిపోయేందుకు ప్రయత్నించింది. కానీ, ఆమె కారు మరో వాహనాన్ని ఢీకొనడంతో ముందుకు కదల్లేదు. సమీపంలో ఓ యువకుడు ఆమెను రక్షించేందుకు తన వాహనంలో ఎక్కించుకున్నాడు. కానీ, కాసేపటికే ఆ యువకుడిని పాయింట్‌ బ్లాంక్‌ రేంజిలో ముష్కరులు కాల్చిచంపారు. దీంతో ఏస్తర్‌ కూడా చనిపోయినట్లు నటిస్తూ.. ఏమాత్రం కదలకుండా అక్కడే పడిపోయింది. తీవ్రవాదులు అక్కడి నుంచి వెళ్లిపోయిన తర్వాత.. ఇజ్రాయేల్‌ సైనికులు వచ్చి ఆమెను రక్షించే వరకూ తాను అలానే ఉన్నట్లు ఆమె తెలిపింది. మరోకొందరు చెట్లు, పొదల చాటున దాక్కొని ప్రాణాలు కాపాడుకొన్నారు. కానీ, ఉగ్రవాదులు ప్రతి చెట్టు వద్దకు వెళ్లి తనిఖీలు చేసి కనిపించిన వారిని విచక్షణా రహితంగా కాల్చిచంపారు. మూడు గంటల తర్వాత ఇజ్రాయేల్ సైనికులు ఆ ప్రాంతానికి చేరుకొని పలువురిని సురక్షిత ప్రదేశాలకు తరలించారు.

‘గ్రనేడ్లు విసిరుతూ కాల్పులు జరిపారు.. మేము వాహనాలను ఆపి పరుగెత్తడం ప్రారంభించాం... నేను ఒక చెట్టు పొదలోకి వెళ్లాను.. వారు వెతికి వెతికి మరీ కాల్పులు జరిపారు.. గాయపడిన వ్యక్తులను చుట్టుముట్టడం నేను చూశాను.. నేను చెట్టులోకి లోపలికి దూరి ఏమి జరుగుతుందో అర్థం చేసుకోవడానికి ప్రయత్నించాను’ అని బ్రోచోవ్ తెలిపింది. ఫెస్టివల్ జరుగుతోన్న నెగెవ్ ఎడారి గాజా స్ట్రిప్ నుంచి కొద్ది దూరంలోనే ఉంటుంది. హమాస్ ఉగ్రవాదులు శనివారం తెల్లవారుజామున ఇజ్రాయేల్ పట్టణాలు, గ్రామాల్లోకి చొరబడి డజన్ల కొద్దీ ప్రజలను బందీలుగా పట్టుకున్నారు. ఈ ప్రాంతంలో రాకెట్ దాడులు జరిగే అవకాశం ఉందని ఫెస్టివల్‌కు వచ్చిన ప్రతి ఒక్కరికీ తెలుసునని ఆడమ్ బారెల్ హారెట్జ్‌ అనే వ్యక్తి అన్నారు.