లైంగిక వేధింపులను తట్టుకోలేక పదవికి రాజీనామా చేసిన మహిళా మంత్రి

పుదుచ్చేరి ప్రభుత్వంలోని ఏకైక మహిళా మంత్రి తన పదవికి రాజీనామా చేశారు. అయితే, తన రాజీనామాకు లైంగిక వేధింపులే కారణమని ఆమె చేసిన వ్యాఖ్యలు సంచలనంగా మారాయి. కేంద్రపాలిత ప్రాంతం పుదుచ్చేరిలో ఎన్నార్ కాంగ్రెస్-బీజేపీ సంకీర్ణ ప్రభుత్వం కొనసాగుతోన్న విషయం తెలిసిందే. ఎన్నార్‌ కాంగ్రెస్‌ పార్టీకి చెందిన రవాణాశాఖ మంత్రి చంద్ర ప్రియాంక మంగళవారం తన పదవికి రాజీనామా చేస్తూ.. దీనికి గల కారణాలను వివరిస్తూ ప్రజలకు ఆమె బహిరంగ లేఖను విడుదల చేశారు. అందులో తాను లైంగిక వేధింపులకు గురయ్యానని, కులవివక్షను ఎదుర్కొన్నానని ఆమె వాపోయారు.

‘అణగారిన వర్గానికి చెందిన నేను కులవివక్ష.. లైంగిక వేధింపులకు గురయ్యాను.. రాజకీయ కుట్రలు, డబ్బు, ఆధిపత్య శక్తులకు వ్యతిరేకంగా పోరాడుతూ మంత్రిగా కొనసాగలేను.. తాను మహిళగా, దళితురాలిగా ఉన్నందుకు గర్వపడుతున్నాను.. అయితే తన కులం, జెండర్ ఇతరులకు చిరాకుగా మారాయని గుర్తించలేదు’ అని ప్రియాంక తన లేఖలో ఆవేదన వ్యక్తం చేశారు. ‘తరుచూ నన్ను టార్గెట్ చేశారు.. నిర్దిష్ట పరిమితులకు మించి దానిని ఎదుర్కోవడం నా వల్ల కాలేదు’ అని ఆమె ఆరోపించారు. కులం, లైంగిక వేధింపుల గురించి ఎలాంటి వివరాలను వెల్లడించలేదు. మంత్రిగా పనిచేసిన సమయంలో తాను సాధించిన విజయాలను వెల్లడించి విమర్శకులకు సమాధానం చెబుతానని అన్నారు. అయితే, తన నిర్ణయానికి హృదయపూర్వకంగా క్షమాపణలు చెబుతున్నానని, ఎమ్మెల్యేగా నిరంతరం కష్టపడి ప్రజలకు సేవ చేస్తానని ఆమె పేర్కొన్నారు. మంత్రిగా పని చేసే అవకాశం కల్పించిన ముఖ్యమంత్రి రంగస్వామికి ఆమె కృతజ్ఞతలు తెలిపారు. తన రాజీనామాతో ఖాళీ అయిన మంత్రి పదవిని వన్నియార్, దళిత లేదా మైనారిటీ వర్గానికి చెందిన వ్యక్తితో భర్తీ చేయాలని ఆమె అభ్యర్థించారు.

దీంతో ఆమెను ఇబ్బందులకు గురిచేసింది ఎవరు అనే దానిపై చర్చ మొదలైంది. కాగా, పుదుచ్చేరిలో 40 ఏళ్ల తర్వాత మంత్రివర్గంలో మహిళకు స్థానం లభించగా ఇప్పుడు ఆమె తీవ్ర విమర్శలు చేస్తూ రాజీనామా చేయడం గమనార్హం. అయితే, రాజ్ భవన్, ముఖ్యమంత్రి కార్యాలయ వర్గాలు మాత్రం సీఎం ఎన్ రంగసామి విధానాలకు అనుసరించడంలో విఫలమైనందున ఆమెను మంత్రి పదవి నుంచి తొలగించినట్లు తెలిపారు. మంత్రి రాజీనామాపై సీఎం స్పందన కోసం జర్నలిస్టులు ఆయనను సంప్రదించగా.. నేరుగా సమాధానం ఇవ్వకుండా తప్పించుకున్నారు. తరువాత తన వైఖరిని స్పష్టం చేస్తానని చెప్పారు. చంద్ర ప్రియాంక తన వ్యక్తిగత కార్యదర్శి ద్వారా రాజీనామా లేఖను సీఎం కార్యాలయం, రాజ్‌భవన్‌కు పంపారు. దీనిపై సీఎం లేదా గవర్నర్ కార్యాలయం కూడా ఎటువంటి ప్రకటన చేయలేదు. ప్రియాంక 2021 ఎన్నికల్లో కరైకల్‌లో నెడుంగడు నియోజకవర్గం నుంచి ఎమ్మెల్యేగా విజయం సాధించారు.