వాతావరణ మార్పులతో,,,భారత్, పాక్‌లలో నిప్పుల కొలిమిలు

శిలాజ ఇంధనాలను విరివిగా వాడటం.. వాతావరణ కాలుష్యం.. వాతావరణ మార్పులతో ప్రపంచ వ్యాప్తంగా ఏటా ఉష్ణోగ్రతలు పెరుగుతునే ఉన్నాయి. దీంతో భూమి సగటు ఉష్ణోగ్రతలు కూడా పెరుగుతున్నాయి. ఉష్ణోగ్రతలు పెరగడంతో హిమనీ నదాలు క్రమంగా కరుగుతున్నాయి. రాబోయే కొన్నేళ్లలో అంటార్కిటికాలోని మంచు కరిగి సముద్ర నీటి మట్టాలు పెరిగే అవకాశం ఉందని.. ఈ కారణంగా తీర ప్రాంతాల్లో ఉన్న నగరాలకు ముప్పు వాటిల్లే అవకాశం ఉందని పరిశోధకులు తీవ్ర హెచ్చరికలు చేస్తున్నారు. ఇక ప్రపంచ ఉష్ణోగ్రతలు గతం కన్నా ఏటా 2 డిగ్రీ సెల్సియస్ వరకు పెరిగే అవకాశం ఉందని ప్రొసీడింగ్స్ ఆఫ్ ది నేషనల్ అకాడమీ ఆఫ్ సైన్సెస్ (పీఎన్ఏఎస్) పరిశోధనలో వెల్లడించింది. ఈ నివేదిక పీర్ రివ్యూడ్ జర్నల్‌లో ప్రచురితం అయింది. ఈ కారణంగా ఉత్తర భారతదేశంతోపాటు తూర్పు పాకిస్తాన్‌లోని సింధూ లోయలో నివసించే దాదాపుగా 220 కోట్ల ప్రజలను వేడి గాలులు ఉక్కిరిబిక్కిరి చేయవచ్చని పరిశోధనలో వెల్లడైంది. ఉత్తర భారతదేశం, తూర్పు పాకిస్తాన్, చైనా, సబ్ సహారా ఆఫ్రికాలు ప్రధానంగా అధిక తేమతో కూడిన వేడి గాలులకు ప్రభావితం అవుతాయని తెలిపింది.

అయితే అధిక తేమ కలిగిన వేడిగాలులు చాలా ప్రమాదకరమైనవని.. ఎందుకంటే గాలి అధిక తేమను గ్రహించి మనుషుల శరీరానికి వచ్చే చమట త్వరగా ఆవిరయ్యే సామర్థ్యాన్ని తగ్గిస్తుందని పరిశోధకులు వెల్లడించారు. చమట త్వరగా ఆవిరి కాకపోవడంతో శరీర ఉష్ణోగ్రతలు తగ్గే అవకాశం ఉండదని పేర్కొన్నారు. ఇక ఈ హీట్ వేవ్‌ ప్రభావిత ప్రాంతాల్లో ఉన్నవి తక్కువ ఆదాయ, మధ్య ఆదాయ దేశాలు కావడంతో ఏసీలు వాడే పరిస్థితి ఉండకపోవచ్చని పరిశోధకులు తెలిపారు. తేమ, వేడి కలిపి ఉంటే కొంత వరకు మాత్రమే మనుషులు భరించగలరు. ఆ తర్వాత వడ దెబ్బ, గుండె పోటు వంటి అనారోగ్యాలు తలెత్తుతాయి. భూమి యెక్క ప్రపంచ ఉపరితల ఉష్ణోగ్రతలు ఇప్పటికే 1.15 డిగ్రీల సెల్సియస్ పెరిగిందని.. ఇందులో పారిశ్రామిక విప్లవం తర్వాత అభివృద్ధి చెందిన దేశాలే ఎక్కువ కర్బన ఉద్గారాలను విడుదల చేశాయని పరిశోధనలో వెల్లడైంది.

పారిస్ ఒప్పందంపై 2015 లో 196 దేశాలు సంతకం చేశాయి. అయితే ప్రపంచ ఉష్ణోగ్రత పెరుగుదలను పారిశ్రామిక విప్లవం కంటే ముందు ఉన్న దాని కంటే 1.5 డిగ్రీల సెల్సియస్‌ పెరుగుదలకు మాత్రమే కట్టడి చేయాలని లక్ష్యంగా పెట్టుకున్నారు. ఇక ఇంటర్ గవర్నమెంటల్ ప్యానెల్ ఆన్ క్లైమెట్ ఛేంజ్(ఐపీసీసీ) ప్రకారం.. ఈ శతాబ్ధం చివరి నాటికి ప్రపంచ ఉష్ణోగ్రతలు దాదాపుగా 3 డిగ్రీల సెల్సియస్ పెరుగుదలకు దారి తీయచ్చని అంచనా వేసింది. సగటు ఉష్ణోగ్రతల పెరుగుదలను 1.5 డిగ్రీలకు పరిమితం చేయాలంటే 2019 స్థాయిలతో పోలిస్తే.. 2030 లో కర్బన ఉద్గారాలను సగానికి సగం తగ్గించాలని ఐపీసీసీ సూచించింది. తాజాగా పరిశోధనలు చేసిన బృందం 1.5 డిగ్రీల సెల్సియస్ ఉష్ణోగ్రత నుంచి 4 డిగ్రీల సెల్సియస్ వరకు పెరిగితే ఎలాంటి ప్రభావం ఉంటుందని పరిశోధనలు చేశారు.