సుప్రీం కోర్టులో ఫైబర్ నెట్ బెయిల్ పిటిషన్‌పై విచారణ,,,,చంద్రబాబు అప్పటి వరకు జైల్లోనే

టీడీపీ అధినేత చంద్రబాబు ఫైబర్ నెట్ కేసు బెయిల్ పిటిషన్ మరోసారి వాయిదా పడింది. నవంబర్‌ 9కి వాయిదా వేస్తున్నట్లు జస్టిస్ బోస్, త్రివేది ధర్మాసనం తెలిపింది. చంద్రబాబుపై నమోదు చేసిన మూడు ఎఫ్‌ఐఆర్‌లకు స్కిల్ డెవలెప్‌మెంట్ కేసులో దాఖలు చేసిన క్వాష్ పిటిషన్‌ తీర్పుకు ముడిపడి ఉన్నాయని సీనియర్ లాయర్ సిద్ధార్థ్ లూథ్రా కోర్టుకు వివరించారు.. దీంతో విచారణను నవంబర్‌ 9కి వాయిదా వేశారు. అలాగే క్వాష్ పిటిషన్‌పై తీర్పును వచ్చే నెల 8న వెల్లడిస్తామని ధర్మాసనం తెలిపింది. స్కిల్‌ డెవలప్‌మెంట్‌ కేసుపై తీర్పు తర్వాత ఫైబర్‌ నెట్‌ కేసు అంశాన్ని పరిగణనలోకి తీసుకుంటామని సుప్రీం కోర్టు తెలిపింది. అప్పటి వరకు పీటీ వారెంట్‌పై యథాతథ స్థితి కొనసాగించాలని ఆదేశించింది. ఫైబర్‌నెట్‌ కేసులో తన ముందస్తు బెయిల్‌ పిటిషన్‌ను కొట్టేస్తూ ఏపీ హైకోర్టు ఈ నెల 9న ఇచ్చిన తీర్పును సవాలు చేస్తూ చంద్రబాబు సుప్రీంకోర్టును ఆశ్రయించిన విషయం తెలిసిందే.

అప్పటి వరకూ ఈ కేసులో చంద్రబాబును అరెస్ట్ చేయబోమని ప్రభుత్వం తరఫు లాయర్ కోర్టుకు తెలిపారు. మరోవైపు ఈ కేసులో విచారించేందుకు తమకు అనుమతి ఇవ్వాలని సీఐడీ తరఫు లాయర్ కోర్టులో వాదించారు. చంద్రబాబును అరెస్ట్ చేయడానికి మాత్రం వీల్లేదని సీఐడీ, ఏపీ పోలీసులను సుప్రీంకోర్టు ఆదేశించింది. కాగా సుప్రీం నిర్ణయంతో చంద్రబాబుకు స్వల్ప ఊరట దక్కినట్లయ్యింది. మరోవైపు చంద్రబాబు లీగల్ ములాఖత్‌ల పెంపు పిటిషన్‌ను ఏసీబీ కోర్టు తిరస్కరించింది. ప్రతివాదుల పేర్లు చేర్చనందున ఇప్పుడు విచారణ అవసరం లేదని న్యాయమూర్తి తెలిపారు. సరైన లీగల్ ఫార్మాట్‌లో రావాలని న్యాయమూర్తి సూచించారు. రోజుకు ఒకసారి మాత్రమే చంద్రబాబుతో న్యాయవాదుల ములాఖత్‌కు అనుమతించింది. వివిధ కోర్టుల్లో కేసుల విచారణ ఉన్నందున రోజుకు మూడుసార్లు ములాఖత్‌ను పెంచాలని చంద్రబాబు తరఫు లాయర్లు పిటిషన్‌ వేసిన విషయం తెలిసిందే.